መጽሓፍ ቅዱስ ናይ ሕክምና መጽሓፍ እኳ እንተ ዘይኰነ፡ ግብራውን ጠቓምን ምኽሪ ይህብ እዩ። እዚ ምኽሪ እዚ፡ ንሓደ ምስ ኣእምሮኣዊ ጸገም ዝቃለስ ሰብ ኪሕግዞ ይኽእል እዩ። ገለ ኣብነታት ንርአ።

“ሓኪም ንሕሙማት ደኣ እምበር፡ ንጥዑያት ኣየድልዮምን እዩ።”—ማቴዎስ 9:12።

መጽሓፍ ቅዱስ ሕክምና ኼድልየና ኸም ዚኽእል ይገልጽ እዩ። ናይ ኣእምሮ ሕማም ዘለዎም ብዙሓት ሰባት፡ ብዛዕባ ሕማሞም ካብ ዜተኣማምን ምንጪ ቕኑዕ ሓበሬታ ብምርካቦምን ናብ ሓኪም ብምኻዶምን ኪሕገዙ ኽኢሎም እዮም።

‘ምውስዋስ ኣካላት ጠቓሚ እዩ።’—1 ጢሞቴዎስ 4:8፡ ናይ 1990 ትርጉም።

እቲ ኣካላዊ ጥዕናኻ ንምድልዳል እትገብሮ ጻዕሪ፡ ንኣእምሮኣዊ ጥዕናኻ ኸመሓይሾ ይኽእል እዩ። ከም ስሩዕ ምውስዋስ ኣካላት፡ ጥዑይ ኣመጋግባ፡ እኹል ድቃስ ዝኣመሰለ ልማዳት ሓጋዚ እዩ።

“ሕጉስ ልቢ ጽቡቕ መድሃኒት እዩ፣ ስቡር መንፈስ ግና ብርታዐ ይጽንቅቕ።”—ምሳሌ 17:22።

ዜተባብዕ ጥቕስታት መጽሓፍ ቅዱስ ምንባብ፡ ሚዛናውን ኪብጻሕ ዚኽእልን ሸቶ ምውጻእ፡ ሕጉስ ክትከውን ኪሕግዘካ ይኽእል እዩ። ምስ ኣእምሮኣዊ ጸገም ኣብ እትቃለሰሉ  እዋን፡ ኣወንታውን ትስፉውን ኴንካ ምእንቲ ኽትቅጽል ሚዛናዊ ኣርኣእያ ምሓዝ ሓጋዚ እዩ።

“ጥበብ ግና ምስ ትሑታት እያ።”—ምሳሌ 11:2።

ኵሉ ነገር ባዕልኻ ኽትገብሮ ዘይትኽእል ኰይኑ እንተ ተሰሚዑካ፡ ካብ ካልኦት ሓገዝ ክትቅበል ፍቓደኛ ኹን። ፈተውትኻን ስድራ ቤትካን ኪሕግዙኻ ይደልዩ ይዀኑ፡ ግናኸ ብኸመይ ከም ዚሕግዙኻ ኣይፈልጡን ይዀኑ። ስለዚ፡ እንታይ ዓይነት ሓገዝ ከም ዜድልየካ ሓብሮም። ብዛዕባ እቲ ኻብኦም እትጽበዮ ነገራት ምኽንያታዊ ኹን፡ ነቲ ዚገብሩልካ ሓገዝ ድማ ወትሩ ኣመስግን።

“ውሽጠይ ጽቡቕ ስለ ዘይተሰመዓኒ ንሓኪም ኣማኺረ። ንሳ ድማ ብዛዕባ ሕማመይ ነጊራትኒ። እዚ ድማ ንዅነታተይ ክቕበሎን ንጥዕናይ ዝሓሸ ኣማራጺ ሕክምና ኺደልን ሓጊዙኒ።”—ኒኮል፡ a ብባይፖላር ዲስኦርደር እትሳቐ።

“ምስ ብዓልቲ ቤተይ ኰይነ መጽሓፍ ቅዱስ ኣዘውቲረ ምንባበይ፡ ንመዓልተይ ብኣወንታውን ሃናጽን ሓሳባት ኪጅምሮ ኣኽኢሉኒ። መብዛሕትኡ ግዜ፡ ጭንቀት ኪብርትዓኒ ኸሎ፡ ምስ ኵነታተይ እትሰማማዕ ጥቕሲ ንልበይ ትትንክዮ እያ።”—ፒተር፡ ብሕዱር ጭንቀት ዚሳቐ።

“ኵነታተይ ስለ ዜሕፍረኒ ብዛዕባኡ ንኻልኦት ምዝራብ ይኸብደኒ እዩ። ሓንቲ ዚቐርባ መሓዛይ ግና ስምዒተይ ትርድኣለይን ትድንግጸለይን እያ። ጽቡቕ ኪስምዓንን በይነይ ከም ዘይኰንኩ ኺስምዓንን ሓጊዛትኒ እያ።”—ጂ ዩ፡ ምስ ምምዝባል ኣመጋግባ እትቃለስ።

“መጽሓፍ ቅዱስ ንስራሕን ንዕረፍትን ብዚምልከት ሚዛናውን ምኽንያታውን ኪኸውን ሓጊዙኒ እዩ። እቲ ኣብ መጽሓፍ ቅዱስ ዚርከብ ጥበብ፡ ነቲ ዜጋጥመኒ ስምዒታዊ ጸገም ኪዋጽኣሉ ሓጊዙኒ እዩ።”—ቲሞቲ፡ ምስ ኦብሰሲቭ ኮምፕለሲቭ ዲስኦርደር ዚቃለስ።