ድሕሪ ቐረባ ግዜ፡ እታ ሓዳስ ሰማያዊት መንግስቲ ኣምላኽ ኣብ ልዕሊ ዅሎም ደቂ ሰባት ምግዛእ ምስ ጀመረት፡ ምድሪ ብስኒት ዚነብሩን ሰናይ ዚገብሩን ዜዕግብ ስራሕ ዚሰርሑን ሰባት ኪመልእዋ እዮም። ኣምላኽ ንየሱስ ኣብ መላእ ምድሪ ኺገዝእ ሸይምዎ ኣሎ። የሱስ፡ ዘይከም እቶም ሎሚ ዘለዉ ሓያሎ ገዛእቲ፡ ብዛዕባ ተገዛእቱ ኻብ ልቡ ዚግደስ መራሒ እዩ። ግዝኣቱ ኣብ ፍቕሪ እተመስረተ ለዋህን መሓርን ፍትሓውን ንጉስ ኪኸውን እዩ።—ኢሳይያስ 11:4።

እቲ ኣብታ ምድሪ ዚነብር ሓድሽ ሰብኣዊ ሕብረተ ሰብ፡ ብዜግነት ወይ ብዓሌት አይኪመቓቐልን እዩ። ደቂ ሰብ ሓድነት ዘለዎም ሓደ ህዝቢ ኪዀኑ እዮም። (ራእይ 7:9, 10) ኵሎም እቶም ኣብ ምድሪ ዚነብሩ ሰባት ንኣምላኽን ንኻልኦትን ዜፍቅሩ ኪዀኑ እዮም። ከምቲ ኣምላኽ ኣብ መጀመርታ ዝዓለሞ፡ ነታ መንበሪቶም ዝዀነት ምድሪ ብስኒት ኪከናኸንዋ እዮም።—መዝሙር 115:16።

መንግስቲ ኣምላኽ ንምድሪ ኽትገዝእ ኣብ እትጅምረሉ እዋን፡ ፈጣሪ ንዅሉ መዳይ ኵነታት ኣየር ኪቈጻጸሮን ኬመጣጥኖን እዩ። (መዝሙር 24:1, 2) የሱስ ኣብ ምድሪ ኸሎ፡ ነቲ ኣምላኽ ዝሃቦ ሓይሉ ተጠቒሙ ንብርቱዕ ማዕበል ብቐሊሉ ኣህዲኡ እዩ። (ማርቆስ 4:39, 41) ኣብ ትሕቲ ኣገዛዝኣ ክርስቶስ፡ ሓደ እኳ ብባህርያዊ ሓደጋ ኣይኪሰግእን እዩ። መንግስቲ ኣምላኽ ነቲ ኣብ ፈለማ ኣብ መንጎ ተፈጥሮን ሰባትን ዝነበረ ስኒት ዳግም ክትመልሶ እያ።—ሆሴእ 2:18።

ኵሉ ሰብ ፍጹም ጥዕና ኺህልዎ እዩ። ዋላ ሓደ ሰብ ኣይኪሓምምን ኣይኪኣርግን ወይ ኣይኪመውትን እዩ። (ኢሳይያስ 35:5, 6) ሰባት ከምታ ናይ መጀመርታ ሰብ ሓዳር ዚነብሩላ ዝነበሩ ገነት ኤደን፡ ጽብቕትን ጽርይትን መንበሪት ክትህልዎም እያ። ኣብ ሓዳስ ዓለም፡ ከምቲ ኣብ ኤደን ዝነበረ፡ ምድሪ ኣኺሉ ዚተርፍ እኽሊ ኸተብቍል እያ፣ ኵሎም ነበርታ ኸኣ እኹል ምግቢ ኺህልዎም እዩ። (ዘፍጥረት 2:9) ኣብ ገነት ኵሎም ሰባት ከምቶም ጥንታዎት ህዝቢ ኣምላኽ ዝዀኑ እስራኤላውያን ‘ክሳዕ ዚጸግቡ እንጌራኦም ኪበልዑ እዮም።’—ዘሌዋውያን 26:4, 5።

ኣብ ትሕቲ እታ ዓለምለኻዊት መንግስቲ ኣምላኽ፡ ኵሎም ሰባት ብሰላም ኪነብሩን ኪለዋውሁን ንሓድሕዶም ድማ ኣይኪበዳደሉን እዮም። ውግእን ጭቈናን ኣይኪህሉን እዩ፣ ዋላ ሓደ ሰብ ድማ መሰረታዊ ነገር ንምርካብ ኣይኪሽገርን እዩ። መጽሓፍ ቅዱስ፡ “ነፍሲ ወከፍ ኣብ ትሕቲ ተኽሊ ወይኑን ኣብ ትሕቲ ኦም በለሱን ኪቕመጥ እዩ፣ ሓደ እኳ ኣይኬፍርሆምን እዩ” ይብል።—ሚክያስ 4:3, 4።

ስድራ ቤታት ባዕሎም ዚውንንዎ ኣባይቲ ኺህልዎም እዩ፣ ኵሉ እንዓዮ ዕዮ ዓስቢ ኺህልዎ እዩ። ከምቲ መጽሓፍ ቅዱስ ዚብሎ ዅሎም እቶም ኣብታ ናይ ኣምላኽ ሓዳስ ዓለም ዚነብሩ “ንኸንቱ ኣይኪጽዕሩን” እዮም።—ኢሳይያስ 65:21-23።

መጽሓፍ ቅዱስ፡ “ምድሪ ብርግጽ ብፍልጠት የሆዋ ኽትመልእ እያ” ኢሉ የተስፉ እዩ። (ኢሳይያስ 11:9) ኣባላት እቲ ሓድሽ ሰብኣዊ ሕብረተሰብ፡ ካብቲ ማእለያ ዘይብሉ ጥበብ ፈጣሪኦም ዝዀነ የሆዋ ኺምሃሩ እዮም። ብዛዕባ እቲ ንሱ ዝፈጠሮ ዜደንቕ ነገራት እውን ኪምሃሩ እዮም። ንፍልጠቶም ኣጽዋር ንምስራሕ ወይ ንኻልኦት ንምጕዳእ ኣይኪጥቀሙሉን እዮም። (ኢሳይያስ 2:4) ኣብ ክንዳኡስ፡ ኣብ ንሓድሕዶም ብኸመይ ብሰላም ከም ዚነብሩን ብኸመይ ንምድሪ ኸም ዚከናኸንዋን ኪምሃሩ እዮም።—መዝሙር 37:11።

ኣምላኽ ንህይወት ወትሩ እናኣስተማቐርና ምእንቲ ኽንነብር ኢሉ፡ ንምድሪ ጽቡቕ ገይሩ ፈጢርዋ እዩ። ንሱ ሰባት ንዘለኣለም ኣብ ምድሪ ኺነብሩ እዩ ዚደሊ። (መዝሙር 37:29፣ ኢሳይያስ 45:18) ስለዚ፡ ነቲ ናይ መጀመርታ ዕላማኡ ንምፍጻም፡ “ንሞት ንዘለኣለም ኪውሕጦ እዩ።” (ኢሳይያስ 25:8) መጽሓፍ ቅዱስ፡ “ደጊም ሞት ኣይኪኸውንን፡ ደጊም እውን ሓዘን ወይ ኣውያት ወይ ስቓይ ኣይኪኸውንን እዩ” ኢሉ የተስፉ እዩ። (ራእይ 21:4) ኣምላኽ ንዅሎም ደቂ ሰብ ማለት፡ ነቶም እዛ እክይቲ ዓለም ክትጠፍእ ከላ ኻብ ጥፍኣት ዚድሕኑን ነቶም ኣብታ እትመጽእ ሓዳስ ዓለም ካብ ምዉታት ዚትንስኡ ማእለያ ዘይብሎም ሰባትን ንዘለኣለም ናይ ምንባር ኣጋጣሚ ኺህቦም እዩ።—ዮሃንስ 5:28, 29፣ ግብሪ ሃዋርያት 24:15።

 ሎሚ እውን ኣብ መላእ ዓለም ዚርከቡ ብሚልዮናት ዚቝጸሩ ሰባት፡ ኣብታ ቐሪባ ዘላ ሓዳስ ዓለም ኪነብሩ ድሉዋት እዮም። ንሳቶም ዘይፍጹማት እኳ እንተ ዀኑ፡ ከምቶም ኣምላኽ ኣብ ሓዳስ ዓለሙ ኪነብሩ ዚደልዮም ዓይነት ሰባት ኪዀኑ ይጽዕሩ እዮም። ከምኡ ዚገብሩ ብኸመይ እዮም፧ ነዚ ዚገብሩ ብዛዕባ የሆዋ ኣምላኽን ብዛዕባ እቲ ንሱ ዝለኣኾ የሱስ ክርስቶስን ብምፍላጥ እዩ።—ዮሃንስ 17:3።

ካብ ጥፍኣት እዛ ዓለም ድሒንካ፡ ኣብታ ቐሪባ ዘላ ሓዳስ ዓለም ክትነብር እንታይ ክትገብር ከም እትኽእል ዝያዳ ፍልጠት ርኸብ። በታ መጽሓፍ ንዘለኣለም ብህይወት ንበር! ምስ ሓደ ናይ የሆዋ ምስክር ናጻ ኣሳታፊ ትምህርቲ መጽሓፍ ቅዱስ ክትገብር ትኽእል ኢኻ።