ሄንሪ ሻምናይን መጽሓፍ ቅዱስን

 ዊንስተን ቸርችል ኣብታ ሂስትሪ ኦቭ ዘ ኢንግሊሽ-ስፒኪንግ ፒፕልስ (ጥራዝ 2) ዘርእስታ መጽሓፉ ከምዚ ኢሉ ጸሓፈ:- “እቲ ተሃድሶ ኣብ ዓውዲ ሃይማኖታዊ እምነት ዓቢ ለውጢ ኣምጺኡ ኢዩ። መጽሓፍ ቅዱስ ሓድሽ ምንጪ ምኽርን ኣብ እተፈላለየ መዳያት ጽልዋ ዘለዎን ኰነ። ኣቐዲሙ ዝነበረ ወለዶ: ቅዱሳት ጽሑፋት ኣብ ኢድ ዘይምሁራት እንተ ኣትዩ ሓደገኛ ስለ ዝዀነ: ብኣቕሽሽቲ ጥራይ ክንበብ ኣለዎ ዝብል ኣተሓሳስባ ነበሮ።”

እቲ ጸብጻብ ቀጺሉ ኸምዚ ይብል:- “ብቲንደልን ኮቨርዴልን እተተርጐመ ምሉእ መጽሓፍ ቅዱስ ንመጀመርታ ግዜ እተቐልቀለ ኣብ መወዳእታ ቐውዒ ናይ 1535 ኢዩ። ብድሕሪኡ ድማ ሓያሎ ሕታማት ክዳሎ ጀመረ። እቲ መንግስቲ ድማ ነቶም ኣቕሽሽቲ ንባብ መጽሓፍ ቅዱስ ከተባብዑ መዓዶም።” ዓዲ እንግሊዝ ንዘመናት ዝኣክል ናይ መጽሓፍ ቅዱስ መሃይምነት ወሪስዋ ድሕሪ ምጽናሕ: ሳላ ቤተ⁠-​ክርስትያን ዘይኰነስ ሳላ መንግስቲ ሄንሪ ሻምናይ ንመጽሓፍ ቅዱስ ንኽትፈልጦ ኣጋጣሚ ተኸፍተላ። a

“ነቶም ናይ ቀደም ኣተሓሳስባ ዝነበሮም ሰባት ዘሰንበዶም ካልእ ነገር ድማ: እቲ መንግስቲ ኻብቲ ኣቐዲሙ ዝነበረ ሕታማት ዝበልጽ ናይ እንግሊዝኛ መጽሓፍ ቅዱስ ብብዝሒ ኣብ ፓሪስ ንኽሕተም ምእዛዙ ኢዩ። ኣብ መስከረም 1538 ነፍሲ ወከፍ ኣብታ ሃገር ዝርከብ ሰበኻ: እቲ ዝዓበየ ጥራዝ ናይ እንግሊዝኛ መጽሓፍ ቅዱስ ክዕድግን ኣብቲ ምእመናን ብቐሊሉ ኽጥቀሙሉን ከንብብዎን ዝኽእልሉ ቦታ ናይቲ ቤተ⁠-​ክርስትያን ክቕመጥን ተኣዘዘ። ኣብቲ ኣብ ለንደን ዝርከብ ካቴድራል ቅዱስ ጳውሎስ ሽዱሽተ ቕዳሓት ተቐመጠ። ብዙሓት ሰባት ምሉእ መዓልቲ ናብኡ ይውሕዙ ነበሩ: ብፍላይ ከኣ ከምቲ እተነግረና እንተ ዀይኑ ንጹር ድምጺ ዘለዎ ሰብ ክርከብ ከሎ ዓው ኢሉ ኸም ዘንብብ ይግበር ነበረ።”

እቲ ዘሕዝን ግን: ኣብ ብዙሓት ሃገራት ዝነብሩ መብዛሕትኦም ሰባት: ስርዓታውያን ዀይኖም መጽሓፍ ቅዱስ ንምንባብ ዘለዎም መሰል ኣይጥቀሙሉን ኢዮም። እዚ ኣዝዩ ዘተሓሳስብ ጕዳይ ኢዩ: ከመይሲ መጽሓፍ ቅዱስ ጥራይ ኢዩ ‘ንትምህርቲ: ንተግሳጽ: ንምቕናዕ: ንጽድቂ ዚኸውን ምእዳብ ዝጠቅም።’​—⁠2 ጢሞቴዎስ 3:⁠16

[እግረ-ጽሑፍ]

[ኣብ ገጽ 32 ዘሎ ምንጪ ስእሊ]

Henry VIII: Painting in the Royal Gallery at Kensington, from the book The History of Protestantism (Vol. I)