ንመጽሓፍ ቅዱስ ኽትርድኦ እንታይ ከም ዜድልየካ መጽሓፍ ቅዱስ ባዕሉ ይገልጽ እዩ። ድሕረ ባይታኻ ብዘየገድስ እቲ መልእኽቲ ኣምላኽ ዝሓዘ መጽሓፍ ቅዱስ “ንዓኻ ኣዝዩ ኣጸጋሚ ኣይኰነን፡ ክትበጽሖ ዘይትኽእል እውን ኣይኰነን።”—ዘዳግም 30:11።

መጽሓፍ ቅዱስ ንምርዳእ ዚሕግዝ ነጥብታት

1.   ቅኑዕ ኣረኣእያ ይሃሉኻ። ንመጽሓፍ ቅዱስ ከም ቃል ኣምላኽ ጌርካ ተቐበሎ። ኣምላኽ ንዕቡያት ስለ ዚጻረሮም ትሑት ኩን። (1 ተሰሎንቄ 2:13፣ ያእቆብ 4:6) ይኹን እምበር፡ ብዓይኒ ዕሙተይ ኣይትእመን። ኣምላኽ ‘ንኣእምሮኻ’ ኽትጥቀመሉ ይደልየካ እዩ።—ሮሜ 12:1, 2።

2.   ጥበብ ኪውሃበካ ጸሊ። መጽሓፍ ቅዱስ ኣብ ምሳሌ 3:5፡ “ኣብ ኣእምሮኻ . . . ኣይትጸጋዕ” ይብል። የግዳስ፡ ንመጽሓፍ ቅዱስ ምእንቲ ኽትርድኦ፡ ጥበብ ኪህበካ ‘ንኣምላኽ ለምኖ።’—ያእቆብ 1:5።

3.   ብስሩዕ ኣጽንዕ። ንመጽሓፍ ቅዱስ ሓሓሊፍካ ዘይኰነስ፡ ኣዘውቲርካ እተጽንዖ እንተ ደኣ ኴንካ ብዙሕ ክትጥቀም ኢኻ።—እያሱ 1:8።

4.   በብኣርእስቲ ኣጽንዕ። በብኣርእስቲ ጌርካ ምጽናዕ፡ ቅዱስ ጽሑፋዊ ሓቅታት ንምርዳእ ዚሕግዝ ውጽኢታዊ መገዲ እዩ። በቲ “ናይ መጀመርታ ትምህርቲ” ጀሚርካ፡ ‘ናብ ብስለት ገስግስ’ ኢኻ። (እብራውያን 6:1, 2) ጥቕሲ ምስ ጥቕሲ እናኣነጻጸርካ ምጽናዕ ሓጋዚ ዀይኑ ኽትረኽቦ ኢኻ። ከምዚ ምስ እትገብር፡ እተፈላለየ ኽፋላት መጽሓፍ ቅዱስ፡ እቲ “ንምርዳኡ ዜሸግር” እውን ከይተረፈ ኺበርሃልካ እዩ።—2 ጴጥሮስ 3:16።

5.   ሓገዝ ካልኦት ድለ። ቃል ኣምላኽ ካብቶም ንመጽሓፍ ቅዱስ ዚርድእዎ ሰባት፡ ሓገዝ ክንቅበል የተባብዓና እዩ። (ግብሪ ሃዋርያት 8:30, 31) ናይ የሆዋ መሰኻኽር ብናጻ ትምህርቲ መጽሓፍ ቅዱስ ይህቡ እዮም። ልክዕ ከምቶም ቀዳሞት ክርስትያናት፡ ሰባት፡ መጽሓፍ ቅዱስ ብሓቂ እንታይ ከም ዚምህር ምእንቲ ኼስተውዕሉ፡ ካብ ቅዱሳት ጽሑፋት እናጠቐሱ እዮም ዜረድኡ።—ግብሪ ሃዋርያት 17:2, 3።

ዘየድልየካ ነገራት

1.   ዝለዓለ ፍልጠት ወይ ትምህርቲ። እቶም 12 ሃዋርያት የሱስ፡ ቅዱሳት ጽሑፋት ይርድእዎን ንኻልኦት ከኣ ይምህሩን ነይሮም እዮም። ካልኦት ግና ከም “ዘይተማህሩ ተራ ሰባት” ገይሮም እዮም ዚቘጽርዎም ነይሮም።—ግብሪ ሃዋርያት 4:13።

2.   ገንዘብ። መጽሓፍ ቅዱስ ብዘይ ክፍሊት ክትምሃር ትኽእል ኢኻ። የሱስ ንደቀ መዛሙርቱ፡ “ብናጻ ተቐቢልኩም ኢኹም እሞ፡ ብናጻ ሃቡ” ኢልዎም እዩ።—ማቴዎስ 10:8።