ሓድሓደ ግዜ፡ ገሊኦም ኣገልገልቲ ኣምላኽ ብስርዓታት መጽሓፍ ቅዱስ ምምልላስ ጥቕሚ ዘይብሉ ዀይኑ ይስምዖም። (መዝሙር 73:2, 3) በዚ ኸምዚ ምስ ሕግታት የሆዋ ዚጋጮ ነገራት ኪገብሩ ይጅምሩ፡ ነቲ ሕማቕ ባህርያቶም ብምሕባእ ከኣ ንኻልኦት ኣገልገልቲ ኼታልሉ ይፍትኑ።

 እዛ ዓንቀጽ እዚኣ፡ ነቶም ከምዚ ዓይነት ህይወት ዜሕልፉ ግናኸ፡ ነቲ ናይ ምትላል ተግባሮም ደው ኬብሉ ዚደልዩ ንምሕጋዝ ተባሂላ እያ ተዳልያ።

ኣብዛ ገጽ እዚኣ፦

•  ክልተ ዓይነት ህይወት ምንባር ኪብሃል ከሎ እንታይ ማለት እዩ፧

•  ክልተ ዓይነት ህይወት ምንባር ክፉእ ሰብ ይገብረኒ ድዩ፧

•  ክልተ ዓይነት ህይወት ምንባር ደው ከብል ዝኽእል ብኸመይ እየ፧

•  መዛኑኻ እንታይ ይብሉ

 ክልተ ዓይነት ህይወት ምምራሕ ኪብሃል ከሎ፡ ምስቶም ንየሆዋ ዘይእዘዙ መዛኑኻ ኽትከውን ከለኻ፡ ነቲ ጌጋ ምዃኑ እተፈልጦ ነገራት ትገብር፣ ምስ ኣመንቲ ብጾትካ ኽትከውን ከለኻ ግና፡ ንየሆዋ ኸም እተገልግል ኴንካ ትቐርብ። ኣብ ክልቲኡ መዳይ ነቲ ናይ ሓቂ መንነትካ እናሓባእካ ምንባር እዩ።

 “ክልተ ዓይነት ህይወት ክትመርሕ ከለኻ፡ ካብ ክልቲኦም ወገናት፡ ሓደ ነገር ትሓብእ ኣለኻ። ስለዚ፡ እቲ ናይ ሓቂ መንነትካ ኣይፍለጥን እዩ። ክልተ ዓይነት ህይወት ተሕልፍ እንተ ኣሊኻ፡ ምስ ኵሉ ሰብ ብዘይ ቅንዕና ትመላለስ ኣለኻ ማለት እዩ።”—ኢሪን።

 ትፈልጥዶ፧ ክልተ ዓይነት ህይወት ምንባር ነቲ በይንኻ ኽትከውን ከለኻ የሆዋ ዚጸልኦ ነገራት ምግባር እውን ዜጠቓልል እዩ።

 “ወዲ 14 ከለኹ፡ ኣብ ኢንተርነት ርኹስ ስእልታት ክርኢ ጀሚረ፡ ምስ ካልኦት ክኸውን ከለኹ ስእለ ጽዩፍ ከም ዝፍንፍን ኰይነ እየ ዝቐርብ፡ ብልበይ ግና ከም ዘይጸልኦ እፈልጥ ነይረ እየ።”—ኖላን።

 ስርዓት መጽሓፍ ቅዱስ፦ “ንኽልተ ጐይተት ኪግዛእ ዚኽእል ሓደ እኳ የልቦን። ወይ ነቲ ሓደ ጸሊኡ፡ ነቲ ሓደ ይፈቱ፣ ወይ ከኣ ናብቲ ሓደ ለጊቡ፡ ነቲ ሓደ ይንዕቕ።”—ማቴዎስ 6:24።

 ከምኡ ማለት ኣይኰነን። ርግጽ እዩ፡ ገሊኦም ሰባት ብመለክዒታት መጽሓፍ ቅዱስ ከይመላለሱ ወሲኖም እዮም። ንስኻ ግና ብሓቂ ኸምኡ ዓይነት ሰብ ዲኻ፧ ወይስ ክልተ ዓይነት ህይወት ከም እትመርሕ ዚገብረካ ረቛሒታት ኣሎ እዩ። ንኣብነት፡-

•   ካብ መዛኑኻ ፍልይ ዝበልካ ምዃን የሕፍረካ ይኸውን።

•   ካብ ምስቶም ኣብ ጉባኤኻ ዘለዉ ምስ መማህርትኻ ዝያዳ ዜቀራርበካ ነገር ዘሎ ዀይኑ ይስምዓካ ይኸውን።

•   ንዅሉ ትእዛዛት ኣምላኽ ክትሕሉ ሓይልን ክእለትን ዘይብልካ ዀይኑ ይስምዓካ ይኸውን።

 “ገሊኦም መንእሰያት ክልተ ዓይነት ህይወት ዚመርሑ፡ ምስቶም ንክርስትያናዊ ስርዓታት ዘይቅበሉ መንእሰያት ኪዀኑ ኸለዉ ፍዅስ ስለ ዚብሎም እዩ። ከመይሲ፡ ብመሳቱኦም ተቐባልነት ኪረኽቡ ስለ ዚደልዩ እዩ።”—ዴቪድ።

 ርግጽ እዩ፡ ከምዚ ዓይነት ረቛሒታት ክልተ ዓይነት ህይወት ክትነብር ተቐባልነት ዘለዎ መመኽነይታ ኣይኰነን። ይኹን እምበር፡ ጥዑያት ሰባት ኪጋገዩ ኸም ዚኽእሉ ንኽንርዳእ ኪሕብረና ይኽእል እዩ። ከምኡ እንተ ኣጋጢሙካ፡ እንታይ ክትገብር ትኽእል፧

1.  1. እንታይ ዓይነት ህይወት ትነብር ከም ዘለኻ መርምር። ንርእስኻ ኸምዚ ኢልካ ሕተታ፦ ‘ብሓቅዶ ኸምዚ ዓይነት ሰብ ክኸውን እየ ዝደሊ፧ ከምዚ እንተ ቐጺለ ሳዕቤኑ እንታይ እዩ ዚኸውን፧’

    ስርዓት መጽሓፍ ቅዱስ፦ “ጐራሕሲ ሓደጋ ይርኢ . . . ዘይለበሙ ግና ህሩግ ይብሉ እሞ ብሳዕቤናቱ ይጕድኡ።”—ምሳሌ 27:12።

2.  2. ብቕንዕና ተመላለስ። ንዅነታትካ ምስ ወለድኻ ወይ ምስ ሓደ ንሕግታት የሆዋ ዜኽብር ብሱል ፈታዊ ተመያየጠሉ። ሓገዝ ደሊኻ ናባታቶም ብምምጻእካ ኺሕጐሱ እዮም። ቅኑዕ ክትገብር ምድላይካ ምፍላጦም ድማ ኬሐብኖም እዩ።

    “ንጌጋታተይ ኣብ ቅድሚ ኻልኦት ምእማን ኣዝዩ እዩ ኸቢዱኒ ነይሩ፡ ንጌጋታተይ ምስ ተኣመንኩሉ ግና ዓብዪ እፎይታ እየ ረኺበ።”—ኖላን።

    ስርዓት መጽሓፍ ቅዱስ፦ “ኣበሳኡ ዚሓብእ፡ ኣይሰልጦን፣ ዚናዘዘሉን ዚሓድጎን ግና፡ ምሕረት ይረክብ።”—ምሳሌ 28:13።

3.  3. ሳዕቤናቱ ተቐበል። ካብ ወለድኻን ካብ ጉባኤን ሓደ ነገር ትሓብእ እንተ ኣሊኻ፡ ንኺኣምኑኻ ኸም ዜጸግሞም ኣይትረስዕ። ከም ሳዕቤኑ ኸኣ ወለድኻ ወይ ሽማግለታት ጉባኤ ገለ ቐይድታት ኪገብሩልካ ይኽእሉ እዮም። ነቲ ሳዕቤናት ተቐበሎ፡ ‘ብዅሉ ቕንዕና ኽትነብር’ ድማ ቈራጽነት ግበር።—እብራውያን 13:18።

    ስርዓት መጽሓፍ ቅዱስ፦ “ኣብ መጻኢኻ ጥበበኛ ምእንቲ ኽትከውንሲ፡ ምኽሪ ስማዕ፡ ተግሳጽ እውን ተቐበል።”—ምሳሌ 19:20።

4.  4. ኣምላኽ ከም ዜፍቅረካ ድልዱል እምነት ይሃሉኻ። የሆዋ ስለ ዜፍቅረና ንዅሉ ተግባራትና ይዕዘቦ እዩ። ስለዚ፡ ክልተ ዓይነት ህይወት ትነብር እንተ ኣሊኻ፡ ይፈልጦ እዩ፡ የጕህዮ እውን እዩ። በቲ ሓደ ወገን ግና ‘ስለ ዚሓልየልካ’ ኣካይዳኻ ኸተዐሪ ኺሕግዘካ ይደሊ እዩ።—1 ጴጥሮስ 5:7።

    ስርዓት መጽሓፍ ቅዱስ፦ “ኣዒንቲ የሆዋስ፡ ስለ እቶም ልቦም ምሉእ ብምሉእ ናብኡ ዝዀነ ብርታዐኡ ምእንቲ ኼርኢ፡ ኣብ ብዘላ ምድሪ እየን ዚዞራ።”—2 ዜና መዋእል 16:9።