Kwagh u vihin tsung una fatyô u eren hanma or cii. Bibilo kaa ér: “Ayem a gban ka or u fefa nan hembe ga, ityav kpaa ka or u taver nan hembe ga, . . gadia shighe man aikyor mba ve sha gbenda ve cii.” (Orpasenkwagh 9:11) Kwagh ne kua agumaior a a tagher a akaa a vihin tsung la kpa ker. Ka nyi ka ve er shighe u ve tagher a akaa a vihin tsung laa? Nenge akav a ahar ne.

•  REBEKA

•  CORDELL

 Mbamaren av yange ve pav ivaa shighe u m lu anyom 14 la.

 Yange m kaa a iyol yam mer mbamaren av pav ivaa jighilii ga, kpa terem soo di tsô ér una zua a shighe kpuaa u lun tswen. Ngôm doo terem ishima nahan una undu un sha ci u nyi? Man mo di una undum sha ci u nyi?

 Yange taver mo kpishi u pasen mbagenev kwagh u lu zan hemen la. Yange m soo u henen sha kwagh shon tsô kpaa ga. Ishima yange i vihim kpishi, kpa hen shighe la, m fa kwagh u lu zan hemen ga. Nahan m nyôr ken ishimanyian, shi m kera faantyô u yaven ga.

 M va nyer anyom 19 yô, ngôm kpe angev mbu kyansa. Ngôm yange lu ijende yam i ishima ishima.

 Aluer ivaa i mbamaren av pav la tseegh kpa yange kundam iyol yô, ku u ngôm je yô yange na hemba huran mo iyol pirin cii. Zan zan nyian kpa ishima ngi a de u zan mo iyol ga. Ka i taver mo kpishi u yaven, shi ishima ngi nyian mo her.

 Nahan cii kpa, m zua a akaa a wasen mo kpishi. Ikyav i tesen yô, Anzaakaa 18:1 ta se icin ér se de dugh iyol yase kposo ga, nahan ka m nôngo mer me dondo kwaghwan la.

 Shi er m lu Kwaseshiada u Yehova yô, ka m nôngo u ôron ityakerada i pasen Bibilo i taver se ishima la. Takerada u yange u wasem shighe u mbamaren av pav ivaa la yô, lu Questions Young People Ask—Answers That Work. M umbur shighe u m ôr ityough kigen ken Tihi u sha 2 la, ki a itinekwagh ér “Can I Be Happy in a Single-Parent Family?” (A Fatyô u Saan Mo Iyol hen Tsombor u Lun Ormaren Môm Tseeghe?)

 Avur a Bibilo a doon mo kpishi a a wasem u nôngon a ishimanyian yô, ka Mateu 6:25-34. Yesu kaa ken ivur i sha 27 la ér: “Ka an wen je sha ishima i nyian i nan la, nana fatyô u seer ishiva a i môm sha ityaven i nan ase?”

 Kwaghbo una fatyô u eren hanma wase cii, kpa m hen kwagh ken ikyav i ngôm la mer, ka gbenda u se nengen sha mbamzeyol asev la u hembe lun kwagh u hange hange ye. Akaa a vihin kpishi yange er un—yange pav ivaa shi va gba icôronuange —nahan kpa, yange za hemen u lun a mnenge u vough, shi jighjigh na u nan hen Aôndo kpa za hemen u taver zan zan kar kpen. Mayange me hungur a akaa a yange tesem sha kwagh u Aôndo la ga.

 Mpin u henen sha mi: Aluer u ngu ôron Bibilo man ityakerada i pasen Bibilo yô, kwagh ne una wase u u wan ishima a akaa a vihin tsung a a er u la nana?—Pasalmi 94:19.

 Yange terem kpe shighe u m lu anyom 17 la. Ku na la yange lu kwagh u hemban vihin mo ken uma wam cii. Yange huram iyol kondo.

 Yange lum er a kpe mimi ga nahan, lum er ka terem i cir un ikyôndo i orkpen ga nahan. M kaa a iyol yam mer, ‘Kper tsô una nder.’ Yange m ure shi lum er kwagh wam bee nahan.

 Mo vea tsombor wam se mba Mbashiada mba Yehova, man tiônnongo wase yange wase se kpishi shighe u terem kpe la. Yange ve na se kwaghyan, shi ve lu vea vese shi ve lu kôôsôô a vese, lu sha anshighe kpuaa tseegh ga kpa lu sha shighe naleghaa je. Hen a mo yô, iwasen i ve nam la lu kwagh u tesen mo ér Mbashiada mba Yehova ka Mbakristu mba mimi.—Yohane 13:35.

 Ivur Bibilo i i hembe taver mo ishima yô, lu 2 Mbakorinte 4:17, 18. Ivur la kaa ér: “Gadia ancan u peesa u sha anshighe kpeghee ne ngu sôron se a sôr iengem i tsôron i vesen i ganden cii. Se mba kera veren asema sha akaa a i nengen a mi la ga, kpa ka akaa a nengen a mi ga la, gadia akaa a i nengen a mi la ka a karen kera, kpa a i nengen a mi ga la gema ka a tsôron je.”

 Ivur i masetyô la yange i doom kpishi. Ican i terem la lu i sha anshighe kpuaa tseegh, kpa kwagh u Aôndo a tendezwa u van a mi ken hemen la yô, ka uma u tsôron. Ku u terem la nam ian i hiden henen kwagh u m eren a uma wam yô, man er me sôr akaa a m tsough u eren ken uma la kpaa.

 Mpin u henen sha mi: Kwagh u vihin tsung u a er u la una wase u u hiden sôron akaa a u tsough u eren ken uma wou la nena?—1 Yohane 2:17.