Agumaior kpishi ishima ze ve iyol sha kwagh u nengen sha oruange ga. Kera kpa, ve nenge ér anyom aa kar kpishi cii ve, mbamaren vev vea hii u lun a zayol u uange ye.

 Kpa aluer dadi wou shin mômi wou gba angev shighe u u lu vesen a vese la ye? Nenge ase agumaior ahar a yange kwagh ne bende a ve yô.

•  Kwagh u Emmaline

•  Kwagh u Emily

 Ngôm gba angev mbu i yer ér Ehlers-Danlos syndrome (EDS) la, man ka icôronuange u nyoon tsung u wuan or igbila man uijuan man kwavyolough.

 Angev mbun mbu a icigh ga, man ken anyom pue a a kar ne, angev mbun hemba vihin ngôm ave cii. Sha mimi yô, ashighe nga a yange awambe a uma un ken iyol je ashe a kungu un ikôr yô, shin i va vihi un iyol kpoghuloo je a tom ku yô.

 Mo man tsombor wam cii se mba Mbashiada mba Yehova, man mba ken nongo u Kristu wase mba surun hanmô wase ishima kpoghuloo je! Ikyav i tesen yô, semberee ne wankwase ugen u lun sha kwar wam nger tsombor wase washika u pasen se er se doo un ishima yô, shi pase se ér shighe u kwagh a gbe se a iwasen na yô, se ôr un. Ka kwagh u doon tsung u lun a imba ijende la!

 Bibilo wasem sha gbenda u kpilighyol kpen kpen. U tesen ikyav yô, môm ken avur a Bibilo a a wasem kpishi yô, ka Pasalmi 34:18, ape i kaa ér: “TER ngu ikyua a mba asema a vihin ve la.” Ivur igen yô, ka Mbaheberu 13:6, ape i kaa ér: “Ter ka Orwasen mo, me kera cia ga” la.

 Ivur Bibilo i masetyô la hemba ngin mo a inja cii. Kwagh u ka a hemba cier mo iyol cii yô, ka u mômi va kpen la. A doom ishima dedoo, man hanma iyange yô, ka m sugh Yehova sha er m lu vea mômi wam yô. Ivur Bibilo la wasem u lun a vangertiôr mer nyityôkwagh i m va tagher a mi cii kpa ia hemban u nôngon a mi ga.

 Nahan kpa, ishima ka i nyian mo sha kwagh ugen kpaa. U fa, mba maren a mar or a angev mbu EDS. Mômi wam zua a mbu hen mômi na, mo di m va zua mi hen mômi wam. U nenge kpa? Mo kpa mo kpa m ngu a EDS. Kpa Mbaheberu 13:6 wasem u fan mer sha ikyaa ne kpa Yehova una va lu “Orwasen mo.”

 Hegen ne yô, m ngu nôngon tsung mer me ver ishima sha kwagh u m lu a mi hegen ne, ka kwagh u yange m lu a mi la ga—shi ishima nyian mo sha kwagh u ken hemen kpaa ga. Aluer m tôô kwagh u ngôm yange a er la m kar sha kwagh u a lu kanen shio u eren hegen ne yô, ishima a vihim me ure kpishi. Bibilo kaa ér akaa a lu tagher a mi hegen ne ka a “sha anshighe kpeghee,” a kuma sha uma u tsôron u se lu veren ashe u va zuan a mi ken hemen, shighe u angev mbua kar kera la ga.—2 Mbakorinte 4:17; Mpase 21:1-4.

 Henen sha kwagh ne: Ka nyi yange i wase Emmaline u lun a mnenge u voughlo? We ka nyi ia wase u u lun a mnenge u vough shighe u u tagher a mbamtavera?

 Shighe u m lu ken kôleeji la, dadi wam nyôr ken ishimavihin tsung sha anshighe kpuaa sha kwa u hiihii la. Dadi wam yange gema inja, nahan lu inja er ka dadi u m vande lun a mi la ga kpa ka ugen nahan. Hii hen shighe la je dadi wam hingir or u uren kpishi shi lu a gbaa cian kwagh tsô, shi ishima i nyian un sha akaa kpishi. Kwagh ne er un ka anyom 15 je ne. Nenge imba er yange a vihi un u nengen er ijungwen i ye tor ken na, man ityôkyaa i môm tsô kpa i lu uren nahan ga yô.

 Se mba Mbashiada mba Yehova, man mba ken kwaghaôndo wase mba se kohol imôngo a ve la mba suen se kpishi je. Ka ve eren kwagh a vese kundu kundu man sha kwaghfan, man ma ve môm kpa nan ngu a er a dadi sha gbenda u una hen ér un gba kwagh ga ze. Ka mea nenge er dadi wam a lu wan ishima a mbamtaver mban yô, kwagh na a seer doon mo ishima.

 Ka i sarem er dadi wam ma a lu sha mlu na u tse, u yange ishima nyian un sha kwagh ga, shi yaan ican ga, kpa lu ken msaanyol la nahan. Ka i vihim kpishi u nengen er a lu yan ican hanma sev a orihyom u ken ityou, u a nengen a mi ga la yô.

 Nahan kpa, dadi wam haa iyol inya ga, ngu nôngon kpoghuloo u lun a mnenge u vough. Semberee u se nyôr ken mtaver zum u iuren na la seer kpishi la, a kange ishima ér una ôron Bibilo cuku cuku hanma iyange, aluer ka avur kpuaa je kpaa. Kwagh ne yange na un ishimataver kpen kpen. Er lu inja er kwagh u lu eren ne lu kwagh u ikyoo ga nahan kpa, kwagh shon gema war uma na. Yange m ta ave vanger a terem hen shighe u vihin ne hemba ashighe agen cii.

 Kwagh u i er ken Nehemia 8:10 la doom kpishi. I kaa her ér: “Iember i ne ember [Yehova] la ka agee a en je.” Kwagh ne ka mimi. Msaanyol u ka m zua a mi shighe u m lu hen atô u mbaciviraôndo a mo imôngo, m eren akaa vea ve kpoghuloo la, ka a wasem zum u ishima i vihim shin m hen mer m gba kwagh ga yô. Ikyav i dadi wam ne wasem u nengen mer, nyityôkwagh i u nyer ker cii Yehova una za hemen u wasen we.

 Hen sha kwagh ne: Emily yange wase ter na ken angev shin zayol na nena? U wase or u wan ishima a ijungwen shin uren nena?