Aluer Ieren i Nengen Ufoto mba Ijimbagh la Ya Tor ken a Mo di Ye?

KUHWA

Kwagh u u fatyô u eren yô

Fa kwagh u a lu foto u ijimbagh la. Foto u ijimbagh ka gbenda u lahan kwagh u civirigh u Aôndo a gbe di tsô. Aluer u fa kwagh u a lu foto u ijimbagh la sha imba gbenda ne nahan yô, kwagh ne una wase u u “kôr . . . kwaghbo ihyom.”—Pasalmi 97:10.

Hen sha akaabo a a lu ker la. Foto u ijimbagh ngu a hee ior mba ve lu ken foto shon la. Shi ngu a hee or u nan lu nengen un la kpaa. Bibilo kaa ér: “Orfankwagh ka nan nenge a kwaghbo, nan yer.”—Anzaakaa 22:3.

Kange ishima. Orjighjigh Yobu yange kaa ér: “M ya ikyur a ashe am; nahan á er nan man me kenger sha iniunkwasa? (Yobu 31:1) Nenge ase akaa agen a u fatyô u kangen ishima wer u er yô:

Me za sha Intanet shighe u m lu tswen ga.
Shighe u m ze hen ijiir i i lu tesen ufoto mba wanger mo ga yô, me pir fele.
Kpa shighe u m per tindi ne yô, me lam a organden sha kwagh ne.

Ufoto mba ijimbagh mba ye tor ken or; ka wea nengen ve hanma shighe yô, i hemba taver we u den u nengen

Er msen sha kwagh shon. Orngeren pasalmi yange zamber a Yehova ér: “Gemam ashe kera sha u kenger gbilinkwagh.” (Pasalmi 119:37) Aôndo soo ér we u za ikyura, nahan a lu u er msen hen na yô, una na u tahav mbu eren kwagh u shami!—Mbafilipi 4:13.

Lam a orgen sha kwagh shon. Ashighe kpishi ka wea ker or u u ne nan jighjigh, wea lam a nan sha ikyaa ne yô, kwagh ne a wase u u den ieren ne.—Anzaakaa 17:17.

Umbur kwagh ne: Hanma shighe u u palegh foto u ijimbagh cii yô, u hemba ityav mbi vesen. Pase Yehova kwagh u ityav mbi vesen mbi u hembe ne shi sugh un sha tahav mbu a ne u la kpaa. Aluer u palegh foto mba ijimbagh yô, u na a saan Yehova iyol.—Anzaakaa 27:11.