Se mba cie ku ser ka orihyom, nahan ka se er hanma kwagh u se fetyô cii sha u kuran uma wase. (1 Mbakorinte 15:26) Nahan kpa, ior mbagenev ka ve gbaa cian ku tsô, sha ci u mbaaie shin akaa a mbatsav a ve ongo sha kwagh u kuugh yô. Kwagh ne na yô, mba “ken uikyangen sha mciem ma kuugh . . . er i mar ve la je.” (Mbaheberu 2:15) Aluer u fa mimi sha kwagh u ku yô, u kera cia ku u wa tsa ityô ga. Mciem man ma a na u kera zua a msaanyol ken uma wou ga.—Yohane 8:32.

Mimi sha kwagh u kuugh

• Mbakpenev fa ma kwagh môm ga. (Pasalmi 146:4) Nahan ityôkyaa ngi i u cian wer zum u va kpe yô, u za ya ican mape ga, sha ci u Bibilo too ku kar sha mnya.—Pasalmi 13:3; Yohane 11:11-14.

• Mbakpenev vea fatyô u eren se kwaghbo ga. Ior mba yange ve lu mbaihyomov asev mba wan ipila la je kpa kera mba a “tahav shin ku ga.” (Anzaakaa 21:16, NW) Bibilo kaa ér “ihyom ve i kôron man iwuhe ve cii saa ishe ngise je.”—Orpasenkwagh 9:6.

• Or ka nana kpe yô, kwagh u nan bee a bee ga. Aôndo una va nder ior shin ku, nahan mba ve kpe la cii vea hide a lu uma.—Yohane 5:28, 29; Aerenakaa 24:15.

• Aôndo tôndo zwa ér shighe ngu van u “ku ua kera lu . . . ga” yô. (Mpase 21:4) Bibilo or kwagh u iyange la ér: “Mbaperapera vea ya dyako u tar, vea lu ken u gbem,” vea kera lu a mciem sha kwagh u kuugh cuku kpaa ga.—Pasalmi 37:29.