Yesu yange kpe sha er uumace ve zua a mde u asorabo man uma u tsôron yô. (Mbaromanu 6:23; Mbaefese 1:7) Ku u Yesu la shi tese ér orumace nana fatyô u zan hemen u civir Aôndo sha mimi, shighe u nan tagher a ameen a hemban taver la je kpaa.—Mbaheberu 4:15.

 Nenge ase er ku u or môm ua fatyô u eren akaa kpishi yô.

1.   Yesu kpe sha er se zua a ‘mde u asorabo’ yô.—Mbakolose 1:14.

    Yange i gba Adam, orumace u hiihii la, lu vough, lu a isholibo ga. Nahan kpa, tsua u hemban Aôndo ato. Ihyembeato i Adam, shin isholibo na la bende a tsombor na cii sha gbenda u vesen. “Er ior kpishi ve hingir mbaasorabo sha ihembeato i or môm yô, kape ior kpishi di ve hingir mbaperapera sha ikyo i wan i Or môm kpaa la.”—Mbaromanu 5:19.

    Yesu kpa yange lu vough, kpa mayange er isholibo ga. Sha nahan yô, fatyô u nan “iwom i asorabo ase.” (1 Yohane 2:2) Er ihyembeato i Adam la i na tsombor u uumace u saa ishe nahan, kape ku u Yesu la kpa u dugh msaaishe u isholibo i ve a mi la ken ior cii mba ve ne un jighjigh la kera je la.

    Se fatyô u kaan ser, Adam yange tee tsombor u uumace isholibo yam. Er Yesu yange kpe sha ci u wase a ishima na yô, a yam tsombor u uumace hingir u na. Sha nahan yô, “aluer anti or nana er isholibo kpaa, se mba a Orwasen hen Ter, Yesu Kristu Orperapera.”—1 Yohane 2:1.

2.   Yesu yange kpe ‘sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.’—Yohane 3:16.

    Er yange i gba Adam ér a lu uma gbem shawon nahan kpa, isholibo na la, i va un a mtsaha u kuugh. “Isholibo nyôr shin tar sha or môm [Adam], man ku gema va sha ci u isholibo yô, nahan ku va sha ior cii sha ci u ve cii ve er isholibo yô.”—Mbaromanu 5:12.

    Nahan kpa, ku u Yesu la dugh ifan i isholibo kera tseegh ga, shi u bee a mtsaha u kuugh la sha ior mba ve ne un jighjigh la cii kera. Bibilo er tom a asember kpuaa sha u pasen kwagh ne sha imba gbenda ne nahan ér: “Er isholibo i tema tor sha ku yô, kape mlumun u sha mhôôn di kpaa a̱ tema tor sha perapera u zan ken uma u tsôron sha Yesu Kristu Ter wase la.”—Mbaromanu 5:21.

    Jighilii yô, uumace nyian vea fatyô u lun uma gbem shawon ga. Nahan kpa, Aôndo tôndo zwa ér una na uumace mba perapera uma u tsôron shi una nder mbakpenev sha er ve kpa vea fatyô u zuan a mtsera ken ku u Yesu kpe, na naagh sha uma na la.—Pasalmi 37:29; 1 Mbakorinte 15:22.

3.   Yesu “hingir u ungwan kwagh zan zan ar ken ku,” sha nahan yô, a tese ér orumace nana fatyô u civir Aôndo sha mimi ken hanma imeen shin mtaver cii.—Mbafilipi 2:8.

    Er i gba Adam lu a iyol man mhen u vough nahan kpa, a tsua u hemban Aôndo ato, sha ci u kwagh u lu u na ga la sar un, sha u keren mtsera na. (Genese 2:16, 17; 3:6) Shighe kar yô, orihyom u Aôndo u hemban cii la, Satan, kaa ér or môm nana fatyô u civir Aôndo a u keren mtsera u nan shio ga, hemban je yô shighe u uma u nan a lu sha zongo yô. (Yobu 2:4) Nahan kpa, Yesu or u vough la, yange ungwa imo i Aôndo shi za hemen u civir un sha mimi, shin er lu u una kpe ku u kunya man u nyoon tsung nahan kpaa. (Mbaheberu 7:26) Kwagh ne wanger ikyaa ne wang, ér: Orumace nana fatyô u zan hemen u civir Aôndo sha mimi, aluer nan tagher a imeen shin alaghga a lu mtaver i ve a mi sha a nan je kpaa.

Mbampin mba ior ve pine sha kwagh u ku u Yesu yô.

•   Yange gba u Yesu una ya ican shi una kpe sha u paan uumace sha ci u nyi? Aôndo yange kar a mtsaha u kuugh la kera ga sha ci u nyi?

   Tindi u Aôndo kaa ér, “injar i isholibo i kimbin yô, ka ku.” (Mbaromanu 6:23) Er Aôndo ma yer Adam tindi ne yô, a er nahan ga, a kaa a na ér mtsaha u ihyembeato yô ka ku. (Genese 3:3) Adam va eren isholibo yô, Aôndo “u A eren aie ga” la, maa kure kwaghôron na a Adam. (Titu 1:2) Adam yange na tsombor na isholibo tseegh ga, kpa shi na ve injar i isholibo la kpaa, ka ku je la.

   Er uumace mbaasorabo ne ve kom u zuan a mtsaha u kuugh nahan kpa, Aôndo na ve ‘mlumun Na u sha mhôôn u ngeen yum la.’ (Mbaefese 1:7) Er Aôndo yange tindi Yesu sha u a va na naagh ku vough sha u paan uumace yô, kwagh u vesen u er ne lu u vough shi lu mhôônom ma zungwen ma hemban cii.

•   Lu hanma shighe Yesu kpe?

   Yesu yange kpe “sha ahwa atar” atetan u iniongo i Paseka u Mbayuda la. (Marku 15:33-37) Sha kwagh u kalenda u sha ayange ase ne a tese yô, werayange ne zua sha iyange i Tomataan Aipor 1, 33 la.

•   Lu hana Yesu kpe?

   Yange i wua Yesu hen ijiir i i “yilan ér ijiir i igbôndotyou la, man ken zwa u Heberu yô, er Golgota.” (Yohane 19:17, 18) Ijiir ne yange i lu hen “hundagar ken won” u Yerusalem, sha ayange a Yesu la. (Mbaheberu 13:12) Er Bibilo i kaa ér mbagenev “tile ken ica lu kenger” er i lu wuan Yesu yô, tese ér alaghga lu sha igyungu i wua un ye. (Marku 15:40) Nahan kpa, ijiir i Golgota a lu hegen ne, a fatyô u kaan ér ka pe Golgota yange lu kpôô kpôô je la shin ka her ga ze.

•   Yesu yange kpe nena?

   Er ior kpishi ve ne jighjigh ér yange i mande Yesu sha terankon nahan kpa, Bibilo kaa ér: “Aôndo u uter asev A nder Yesu u ne wua Un ne mande Un sha kon la.” (Aerenakaa 5:30) Ka asember a ken zwa Grika a mbangeren Bibilo ve kaa ér a tese kwagh u yange i wua Yesu sha mi la je ne; stau·rosʹ man xyʹlon. Mbafantakerada kpishi kure ikyaa ér asember ne nga ôron kwagh u kon u u lu jighilii shin u lu nôô yô.

•   Gba u a umbur ku u Yesu nena?

   Hen tugh mbu iniongo i Paseka u Mbayuda u i eren hanma inyom la, Yesu tese mbadondon un gbenda u ican ga u vea umbur ku na yô, maa kaa a ve ér: “Eren nen kwagh ne sha u umbur Mo.” (1 Mbakorinte 11:24) Ahwa nga kar yô, i wua Yesu.

   Mbangeren Bibilo tôô Yesu kar sha waniyôngo u yange i na naagh a mi sha shighe u Paseka la. (1 Mbakorinte 5:7) Er iniongo i Paseka yange i umbur Mbaiserael ér i pase ve ken kpan kera nahan, kape ku umbur u Yesu Kristu la kpa, ka u umbur Mbakristu ér i pase ve sha ikyev i isholibo man ku i tuhwa je la. Yange i er Paseka sha iyange i Nisan 14 kwa môm ken inyom, er kalenda u ken Bibilo a tese la; Mbakristu mba sha ayange a mbaapostoli la kpa, yange ve umbur ku u Yesu kwa môm ken hanma inyom.

   Hanma inyom yô, ior umiliôn imôngo tar sha won cii ka ve umbur ku u Yesu, sha iyange i i zough sha uwer u Nisan 14 la.