Anyom ka aa karen yô, ior mbagen mba ve vese ayol a ve yô, ve kera tesen ayol a ve dooshima kpishi ga. Aluer kwagh ne ngu eren ken ivese you yô, er nan i doo u u er kwagh sha mi?

•  Kwagh u i doo u u fa yô

•  Kwagh u u fatyô u eren yô

 Gba u a tesen dooshima keng ve ivaa ia taver ye. Ka a tesen dooshima ken ivese yô, ivese la i seer taver shi i doo vough er or ka nana yaan kwaghyan u dedoo ve nan taver iyol shi nan lu gbong gbong nahan. Aluer nom man kwase er ivese anyom kar kpishi je kpa, gba u hanmô ve nana tesen ikyar u nan ér nan soo nan shi nan we nan ikyo kpaa.

 Dooshima u mimi we iyol na ikyo tseegh ga. Dooshima u mimi keren msaanyol sha ci u orgen. Sha nahan yô, nom shin kwase u nan we ikyar u nan u ken ivese ikyo yô, ka nan ker u fan igbenda i ikyar u nan la a soo ér i tesen nan dooshima yô, shi nan er kwagh sha mi kpaa. Nan den ér nana tese ikyar u nan dooshima shighe u i kende nan tseegh ga.

 Ka i hemba saren kasev u i tesen ve dooshima a noov. Alaghga nom una soo kwase na kpishi je. Kpa aluer ngu tesen kwase na dooshima la pepe man aikighe tseegh shin shighe u a soo u yaven a kwase na tseegh yô, alaghga kwase na una nenge ér un gba nom na kwagh yum ga. Hemba doon u a tesen dooshima fele fele ken iyange hanma shighe cii.

 Tese dooshima sha mkaan. Mkaanem ma cuku er “U doom ishima” shin “U gbam kwagh kpishi” nahan ma a na ikyar u nana fa je ér u soo nan.

 Kwaghwan u ken Bibilo: “Ka sha m-iv u ken ishima man zwa u er kwagh ye.”—Mateu 12:34.

 Kwaghwan: Ka sha kwaghôron tseegh u tesen ikyar u wer nan doo u ishima ga. Ngeren kwagh naan nan, alu an-washika shin loho u sha Intanet shin sha hanseeti kpaa.

 Eren akaa a tesen wer ikyar u doo u ishima. Aluer u kuve ikyar u shin u suse nan zwa shin u kôr nan uwegh tseegh kpa a tese ér ka wea kaa a nan wer “U doom ishima” yô, u ôr kwagh ne i lu sha mimi wou. Aluer u bende nan uwegh iyol teghelee shin u kenger nan sha dooshima gayô ashighe agen u yam nan iyua kpa a tese je ér u wa nan ikyo. Shi alaghga we nom u fatyô u eren akaa a wasen kwase wou, er u wasen nan u kôron ikyav shin bughun nan hunda gayô kiren agbande man akondo shin eren kwaghyan nahan. Kasev kpishi ka a er kwagh ne a ve yô, ve nenge ér ka wasen ve a wase di tsô ga, ka ve nenge ér ve doo nom ve ishima!

 Kwaghwan u ken Bibilo: “Dooshima wase a̱ de kera luun sha mkaan shin sha nombor [tseegh] tsô ga, kpa i̱ lu sha ieren.”—1 Yohane 3:18.

 Kwaghwan: Eren kwagh a ikyar u sha ue er yange u eren a nan shighe u ne lu sôôr ayol a en la nahan.

 Luun nen a shighe ayol a en. Ka nea ker shighe u lun imôngo ne tseegh yô, kwagh ne a taver ivese yen shi mlu wen u kôôsôô la a na yô, kwase wou shin nom u a hemba nan we jighjigh. Nahan kpa, ka i taver u zuan a imba shighe la zum u mbayev ve lu shin akaa agen a hange hange a lu a eren kpishi hanma iyange yô. Nahan cii kpa ne fatyô u sôron ian veren sha er ne due ahumbe a man yô—ne uhar tseegh.

 Kwaghwan u ken Bibilo: “Fa akaa a a hembe lun a inja yô.”—Mbafilipi 1:10.

 Kwaghwan: Noov man kasev mbagen ka ve tsuwa ashighe tugh gayô sha wikeende aa vea luun ve tseegh er mba ve vese ayol a ve yô.

 Fa ikyar u. Hanma or yô mlu u nan kaha kposo sha gbaa u tesen or dooshima la. Gba aseka nenge nen er hanma wen nan hembe soon er i tesen nan dooshima man aluer ka u ne seer eren nahan yô. Nahan de gbe uwer u kuren isharen i ikyar u ga. Umbur wer, u tesen or u u vese dooshima la ka kwagh u vesen u taver ivaa yen.

 Kwaghwan u ken Bibilo: “Dooshima . . . keren kwagh na iyol na tsô ga.”—1 Mbakorinte 13:4, 5.

 Kwaghwan: De kighir a kighir ikyar u we a tese u dooshima ga, kpa pine iyol you wer, ‘Ka nyi me er ve me hemba doon ikyarem ishima?’