I lu nahan nom u shin kwase wou kaa a we ér ishima ka i za un iyol sha msorom ma u me laa? Aluer ka nahan yô, ka akaa agen a i gbe u u hen sha mi je ne.

Ken ngeren ne

•  Msôrom ma hunden man ivese mba zough ga, zayol ka a lu

•  Msôrom ma yan tor ken a wee?

•  De bumen iyol you wer u ngu a zayol u msôr ga ze

•  Kwagh u u fatyô u eren yô

 Or ka nana maan msôrom kpishi shin a hunden yô, nan zua mbamzeyol kposo kposo, er angev mbu ishimav man angev mbu sha mtema man kyansa nahan. Kpa mbamzeyol mba msôr saa sha kwagh u uange tseegh ga, kwagh ne ka a va zayol ken ivese kpaa, sha ci u msôrom ka ma va a num hen ya kua zayol u inyar, shi or kera eren kwagh a kwase shin nom u nan sha mimi ga shin nom man kwase ve hingir u paven ivaa je kpaa.

 Bibilo kaa ér ior ka vea maan msôrom kpishi shin a hunden msôrom yô, ma “nyuma er iyô yô, ka [ma] gber er igbinde nahan.” (Anzaakaa 23:32) U er nan ve u fa wer msôrom ma yan tor ken a wee?

 Mbampin mban vea wase u u fan aluer kwagh ngu nahan yô, ka ve je ne:

•   Ka wea hii u man msôrom nahan u kera faantyô u den gaa?

•   Ashighe kpishi ka u henen sha kwa gen u shi u zua a msôrom u ma yôô?

•   Msôrom va u a mbamzeyol ken uma kpishi je, kua ken ivese you kpaa, kpa u ngu man ma here?

•   Ka wea hii wer u de msôrom ma man nahan kwagh shon a na i kera doo u iyol gaa?

•   Ka wea ma msôrom nahan ashighe agen kwase wou shin nomou a eren ayôôso a we ér u ma ngee yumu?

•   U ngu hemban man msôrom hegen ngeen er ngise u maan laa?

•   Ka u maan msôrom myer ken ya shin u yer msôrom mape hen ya shin hen ijiir tomo?

 Aluer u na mlumun sha mpin môm heen shin mbampin mban imôngo wer een yô, alaghga tsô msôrom ya tor ken a we. Kwagh la tese ér u ngu a zayol sha kwagh u msôr.

 Ishima ka i za kwase wou shin nomou iyol sha gbenda u u me kwagh la, je shi nan ôr kwagh a mi? Aluer ka nahan yô, alaghga yange u hii u keren ishô shin nôngon wer i lu inja er kwagh shon ga zayol ga nahan. Alaghga u lu nan mbagen ibo kua kwase wou shin nomou shon je kpaa, adooga u ôr akaa ne nahan:

•   “Luun er u eren a mo sha inja yô, ma m maan msôrom kpaa ga.”

•   “Luun er ka orvesen wam u sha tom la a lu orvesen wou yô, we kpa ma u fe wer gba u u ma kwagh.”

•   “M fa ior kpishi mba ve me kwagh je, mo m zulum ikyua ga yô.”

 Aluer u ôr ambaakaa ne nahan yô, tese ér hemba saren we u man msôrom a u ivese you i lu saan saan ga zee? Ka nyi u nenge wer doo u ma i hembe lun kwagh u vesene?

 Kwaghwan u Bibilo: “Or u nan er kwase yô, ishima ka i nyian nan . . . er nana er ve a doo kwase u nan a nan yô.—1 Mbakorinte 7:33.

•  De nengen ishima i i lu zan kwase wou shin nomou iyol sha kwaghman wou la beelee ga. Aluer ishima ngi zan kwase wou shin nomou iyol sha kwagh ne ka karen ikyaa inya je kpa, er kwagh sha mi. Kpa aluer kwagh gba u sha mi ga, u za hemen u man msôrom her nahala yô, ka ikyav i tesen je ér a shi nan kpa u ngu a zayol sha kwagh u msôr.

   Kwaghwan u Bibilo: “Hanma or nana̱ keren u eren kwagh u una lu mbagenev a iwasen yô, i̱ de lu sha ci u iwasen i nan iyol i nan ga.”—1 Mbakorinte 10:24.

•   Kwagh u i doo u u fa yô. Cii ve orshoja nana hemba ityav yô, ka i gba u nana fa ayom a orihyom u nan. We kpa ka kwagh u u tagher a mi je la, gba u u hemba orihyom wou, nahan gba u u fa kwagh u msôr tsembelee kua er ka ma kôr or kpan la kpaa. Shi a gba u u fa igbenda i u kar ve u hemba ma, ma a kera ya tor ken a we ga shi u kera va hide u hii u man ma ken hemen ga yô.

   Kwaghwan u Bibilo: “Za nen hemen u palegh asaren a iyolough a a lu nôngon ityav a ven la.”—1 Peteru 2:11.

•   Ker iwasen. Akaa a tweregh nga kpishi a a ôr kwagh u msôrom ma hunden shin man karen ikyaa inya yô; uporogeram mbara mbagen ka mba wasen or u den msôrom kua ajiir a i sôron ior mba ve lu a zayol ne yô, kua ayouacii. U fatyô u pinen ijende you i i lu a mkav yô, i wase u u fan aluer akaa nga aa ne ve msôrom ma ye tor ken a we yô. Nahan shighe u msôrom ma lu saren we yô, yila or shon ôr nan.

   Kwaghwan u Bibilo: “Huror yô, lu a dooshima gbem, man shi i mar anmgbian sha ci u ayange a ican.”—Anzaakaa 17:17.

 Zayol u msôr ka kwagh u a lu ican kpishi u nengen sha mi yô. Ka kwagh u u ôr di ngeren tiônnôô shin u kaa wer “de me nôngo me pande msôron ma man” tsô man u bee a mi ga. Nahan kpa, doo u u fa wer kwagh u u er sha ikyaa ne la una bende a mluyol wou tseegh ga, una bende a ivese you kpaa.

 Wea soo u seer fan yô: Ôr ngeren mba ve lu shin heen ne sha er u fa er ior mbagenev ve nôngo a zayol u msôr ne shi ve hembe yô.

 “M Kera Eren Tswam Ga”

 “Kunya De u Kôron Mo a Iyol Yam”

 “Godobi Hingir Ya Wam”

 Shi u fatyô u nengen vidio i ‘M Vôr a Uma u M Lu Eren La’