Ikyaior Kwagh Wen Gba Mbamaren Enev Ishima

APOSTOLI Yohane yange nger ér: “Aluer m ungwa mer, mbayev av mba zenden sha mimi yô, kam iember je hemba akaa agen cii.” (3 Yohane 4) Yohane lu orbeenyol shighe u nger mkaanem man la. Mbayev mba Yohane a ter ken ivur Bibilo ne la ka mbahenen mba ken Kristu, nahan cii kpa ormaren u cian Aôndo kpa nana fatyô u ôron kwagh nahan. Er kwagh u mbamaren ve eren la ka a bende a mbayev vev kpishi nahan, kape kwagh u mbayev ve eren di kpa a benden a mbamaren vev je la.

Tor Solomon yange fa wener mbayev vea fatyô u eren kwagh u una bende a mbamaren vev tsung yô. Nahan a nger ér: “Wan u fan kwagh ka nan na i saan ter u nan iyol, kpa ibumewan yô, ka nan na ngô u nan ishima i zunguluu.” (Anzaakaa 10:1) Nahan yô, hanma wanye—a̱ lu u ganden sha kpaa—nana̱ hen sha gbenda u ieren i nan ia fatyô u benden a mbamaren mba nan la. Er nan i doo u ônov vea er nahana?

Gbidye ase kwar nenge er mbamaren ou mba cian Aôndo la ve ye ican u yesen we yô! Er ve lu a mar u ga la je tsô ishima hii u zan ve iyol sha kwagh wou shi ve lu eren msen sha ci wou kpaa. Mba maren we yô, ter u man ngô u lu ikyua a we, shi alaghga ve sugh Aôndo sha ian i a ne ve kua tom u kpilighyol man u vesen u a ne ve ér ve yese u la. Shighe u ve mar u la u lu anikyundan u forototo, nahan ve lu koson we, man er ve lu mbacivir Yehova yô, mayange ve kende u ga.

Er mbamaren ou ve lu Mbakristu mba mimi yô, ve lu ôron Bibilo man ityakerada i pasen Bibilo sha er vea zua a mkaanem ma mimi ma ma a tese ve er vea yese u yô, shi ve ngohol kwaghwan hen mba ve vande yesen ônov yô. Heela tseegh ga, ve lu eren msen hen Aôndo sha ci wou kpaa. (Mbaajiriv 13:8) Er u lu vesen la, mbamaren ou fa aeren a ou a dedoo, mbamyina ou kpa ve lan ga. (Yobu 1:5) U va nyer anyom pue kar yô, u hii u lun a mbamzeyol mbagenev. Alaghga ú taver mbamaren ou ityough ashighe agen, nahan kwagh ne na yô ve hingir u eren msen kpoghuloo shi ôron Bibilo kua ityakerada i pasen Bibilo kpaa shi ve lu henen ken ishima kpoghuloo er vea wase u u za hemen u civir Yehova, Ter u u sha la yô.

Mbamaren ou za hemen u wan we ikyo, ve lu ngô u man ter u. Er u lu ganden or je kpa, ve wa u ikyo sha u nan we akaa a iyolough shi ve soo ér kwagh a za u iyol ken ishima ga, shi ve lu tesen we igbenda i Aôndo kpaa. Nahan kpa, mbamaren ou fa er ú lu a ian i tsuan kwagh u ú er yô, shi ve fa kpaa ér alaghga ú lu or u ve soo ér ú gande ú lu la ga. Kohol cii yô, ka we ú tsua kwagh u ú soo u eren a uma wou ye.

Kpa sha kpôô yô, aluer ‘mbayev mba zenden sha mimi,’ man kwagh ne gema ka mbamaren “iember je hemba akaa agen cii” yô, shighe u ve lu zenden sha mimi ga la di ye, a vihi mbamaren kpishi ga zee? Sha kpôô yô, mbayev mba lanen kwagh mba ne mbamaren vev ishima i zunguluu. Solomon kaa ér: “Wan u lanen kwagh nan ne ter u nan ishima i vihin, shi nan ne ngô u a mar nan la ishimavihin tsung.” (Anzaakaa 17:25) Wan ka nana undu mcivir u Aôndo u mimi nahan i vihi mbamaren je i saa her!

Sha mimi yô, kwagh u ne mbayev ne eren la ngu a bende a tsombor wen sha gbenda u vesen kua mbagenev kpaa. Ieren yen i ker mbamaren enev ken ishima tsung je. Aluer ne undu Aôndo man atindiakaa a na yô, mbamaren enev vea ya ican ken ishima. Kpa aluer ne er nahan ga yô, a doo ve. Aluer ne za hemen u civir Yehova sha mimi shi ne mba ungwan imo na yô, a saan mbamaren enev iyol. Yô, kange nen ishima ner ne na i saan mbamaren enev iyol! Ka iyua i hemban doon i ne na mbamaren enev mba ve yese ne shi ve kor ne, shi ne doo ve ishima kpaa je ne.