Yakob yange fa ér gba u a civir Yehova tswen shin er Yehova lu a wa tindi sha kwagh u civir akombo ga nahan kpaa. (Ek 20:3-5) Nahan Yehova va kaan a na ér a hide ken Betel yô, Yakob kaa a hanma or u nan lu vea na la ér nana haa ieev mbi nan lu a mi la cii kera. Yakob maa haa ieev mbira cii kera, kua mbaabinkwini mba a shi nan kpa, i waan sha u ve lu kura iyol la. (Ge 35:1-4) Kwagh u Yakob er ne, doo Yehova je ka ashe tugh ga.

Hen shighe wase ne kpa, se fatyô u civir Yehova tswen nena? Ka se hii sha u palegh nyityôkwagh i i gbe i zough a akombo a civir man kwagh u mbaimev cii. Kwagh ne wa u haan akaa a a gbe a zough a kwagh u mbatsav cii kera shi tôvon sha iemberyolough yase zulee. Ikyav i tesen yô, pine iyol you wer: ‘Ka i doom u ôron ityakerada shin nengen ufiim mba i tese mbamanawambe shin mbakuv gayô ma ieren i i gande tahav mbu uumace ken inya laa? Akaa a m zough a msaanyol sha mi la, nga a tese ahir a eren shin u tamben ior shin wan ve ifyan ér, ka iemberyolough di tsô, kwaghbo ngu ker gaa?’ Gba u se tile paleghaa a hanma kwagh u Yehova a ker un ihyom cii.—Ps 97:10.

NENGE VIDIO I “HENDAN NEN A DIABOLO” LA, MAA NA MLUMUN SHA MBAMPIN MBA VE DONDO NE:

• Ka zayol u nyi kwase u henen Bibilo ugen, u i yer un ér Palesa la yange tagher a mini?

• Ka a inja u se ker iwasen hen mbatamen shighe u se tagher a akaa a a gbe a zough a kwagh u mbaimev la sha ci u nyi?

• Ka akaa a nyi nahan i gbe u mba ve soo ér Yehova a kuran ve cii vea haa kera vindi vindii?

• Ka nyi kwagh nahan Palesa yange er fese?

• Ka sha igbenda igen i nyi nahan u fatyô u palegh u nyôron iyol ken kwagh u azôv hen ijiir i u lu laa?