Yehova nengen iceghzwa i nom ka a er vea kwase la ér ka beerkwagh ga. Shi a kaa ér nom man kwase ve de paven mayange ga. (Mt 19:5, 6) Noov man kasev mbacivir Aôndo kpishi ver ikyav i dedoo sha kwagh u ivesegh. Nahan kpa, ivese i môm ban a zayol ga. Zayol vea fatyô u van. Kpa gba u se lu a mnenge u ior kpishi ve lu a mi ér ivaapaven shin u undun or u u vese la ka gbenda u sôron zayol ken ivese la ga. Noov man kasev mba ve lu Mbakristu la vea kura ivese ve nena?

Nenge ase igbenda i itian ne.

1. Kura ishima you sha u palegh u hian a or u u vese nan ga la. Palegh uvidio man akaa a i tese ieren i ijimbagh ker la. Akaa ne nga vihin ivese.—Mt 5:28; 2Pe 2:14.

2. Taver ikyar i u ye vea Aôndo la, shi seer isharen i u lu a mi u eren kwagh u doon un ken ivese you la.—Ps 97:10.

3. Za hemen u haan or u he iyol, shi eren akaa a doon a or u u vese la, a lu a kiriki je kpaa, sha er a kpe nan iyol yô.—Kol 3:8-10, 12-14.

4. Eren nen kwagh a ayol a en sha icivir, shi lamen nen a ayol a en sha icivir.—Kol 4:6.

5. Eren nen kwagh u kwase a nom la sha dooshima.—1Ko 7:3, 4; 10:24.

Mbakristu ka vea naan ivese ve icivir yô, i tese ér ka Yehova, wen u yange hii kwagh u ivesegh la je ve lu nan un icivir ye.

NENGE VIDIO I GBA KENG U SE ‘GBA AYEM SHA ISHIMA I TAVER’—DONDON ATINDI A GESA LA, MAA NA MLUMUN SHA MBAMPIN MBA VE DONDO NE:

• Shin er ivese ka i hii i doo nahan kpa, ka mbamzeyol mba nyi vea fatyô u van kere?

• Akaawan a Bibilo aa wase mba i lu ve inja er ivese ve ban a dooshima la nena?

• Ka atindi a nyi Yehova a we sha kwagh u ivesegh?

• Cii man ivese i za i doo yô, ka nyi i gbe u nom man kwase vea ere?