Paseka u Yesu yange mase eren ve kpe la lu u injaa kpishi. Er kera shi ica ga u una kpe yô, a wa iyol u yan Paseka vea mbaapostoli nav shi a tese ve gbenda u he u vea eren mkombo u Kwaghyan u Ter u Aikighe la hanma inyom yô. Nahan a tindi Peteru man Yohane ér ve za sôr ijiir i vea za ya Paseka her yô. (Luka 22:7-13; nenge foto u sha Igbende la.) Kwagh ne umbur se er i gbe u se wa iyol sha M-umbur u a va er ken uwer u Maaci 27 la yô. Alaghga atôônanongo vande tsuan or u nana na kwaghôron shi mba a bredi man wain shi ve wa iyol sha akaa agen kpaa. Nahan kpa, ka nyi se asange asange se fatyô u eren sha u wan ago iyol sha Mkombo u Umbur Ku u Yesu ne?

Sôr ishima you. Ôr avur a Bibilo a i gbe u a ôr sha shighe u Umbur Ku u Yesu la shi gbidye kwar sha mi. Nga ken antakeda u U Timen ken Ruamabera Ayange Ayange la. Ngeren u Appendix B12 u ken Bibilo i New World Translation of the Holy Scriptures i i hidi i ser la hemba tesen avur a i gbe u a ôr la vighe vighe. (Shi nenge Uma Wase u Mbakristu man Tom Wase—Antakerada u Mkombo u uwer u Aipor inyom i 2020 la kpaa.) Icombor ia fatyô u zuan a akaa a seer timen sha mi ken mcivir u hen tsombor sha kwagh u mluainja u ipaan la ken takeda u Watch Tower Publications Index gayô ken Takerada u Tôvon sha Kwagh ú Mbashiada mba Yehova la.

Lôhô ior mbagenev. Lôhô ior Mkombo u Umbur Ku u Yesu la kpoghuloo shighe u a lu yôôn angwe u mkombo ne la. Vande henen fan ior mba u fatyô u lôhôn ve yô, er mba u sôron ve, man mba yange u henen Bibilo a ve, man ior mba u fe ve, man mba hen tsombor wou nahan. Mbatamen ve umbur u lôhôn mba ve mem tom la. Umbur wer aluer u lôhô or man nan ngu ka hen haregh wou ga je kpa, u fatyô u tôvon fan shighe man ijiir i a lu eren Mkombo u Umbur Ku u Yesu hen ijiir i nan la. Za sha jw.org, ape i nger sha ityough nagh ér KWAGH WASE la, maa kighir sha “M-umbur.”

Ka nyi igen se fatyô u eren sha u wan ago iyol?