Aôndo Pase Se Mbaawashima Nav
Vegher u sha 4
Aôndo Pase Se Mbaawashima Nav
1, 2. Ka nena se fe ser Aôndo ne mba ve pin sha mimi mbara akara?
MIMI je Aôndo u dooshima pasen mbaawashima nav hen mba ve keren un sha mimi la. Ne akar hen uumace mba ve pin un ambampin er i hii man a ne ican i yan ian la.
2 Bibilo kaa er: “Aluer u ker [Aôndo] yô, ú zua a Na.” “Kpa Aôndo ngu Sha u A pasen akaamyer” yô. “Mimi je TER Una gba eren ma kwagh môm ga saa Una vande pasen kwaghmyer Na la hen mbatomov Nav, uprofeti ve.”—1 Kroniku 28:9; Daniel 2:28; Amoshi 3:7.
Akar la Nga Hana?
3. Ka hana se ker se fa er i hii ve Aôndo a ne ican i yan iana?
3 Akar sha ambampin er i hii man Aôndo a ne ican i yan ian kua kwagh u una er shami la cii á zua a mi ken kwagh u yange na i nger sha ci wase la. Kwagh shon ka Mkaanem nam, Icighan Bibilo. “Gadia icighanruamabera cii ka Aôndo A ne i nger ye. Ngu a inja sha ityesen man sha mkôôm man sha myange man sha myese u ken perapera kpaa, sha u or u Aôndo nana̱ kuma nana̱ lu a agoyol sha ci u hanma tom u dedoo.”—2 Timoteu 3:16, 17.
4, 5. Kanyi i̱ ne ve Bibilo i̱ hembe?
4 Mimi je Bibilo ka takerada u u hembe lun tseer tseer yô. Ngi a abaver a a hembe lun vough sha kwagh u mhii u orumace yô shi yem ken ijime hiinii sha shighe u í lu a̱ gba uumace ga la je kpaa. Shi ngi hegh her, gadia akaaôron a uprofeti a a lu kimi kpaa ka sha mlu u hen shighe wase ne kua sha shighe u ken hemen kpaa.
5 Ma takerada ugen môm ngu a mimi sha akaa a mbayiase vough er ú ga. Ikyav i tesen yô, ka akaangeren a hemban a mbayiase kpeghee tseegh a shi her ye. Kpa akaangeren kpishi a ken Bibilo nga heregh, agenegh ka avegher kpa agenegh di nga jimin: akaa a ken Ruamabera u ken zwa Heberu a kuman er 6,000 nahan (ityakerada i 39 ken “Ityendezwa i Tse” la) kua a Ruamabera u Mbakristu u ken zwa Grika kuma er 13,000 nahan (ityakerada i 27 i ken “Ityendezwa i He” la).
6. Ka sha nyi se fe ser Bibilo i nyian ne ngi kwagh môm a i sha shighe u Aôndo na i nger la?
6 Aôndo Uhembanagee, u yange na i nger Bibilo la, a nenge er mkaanem ma ishimaveren i lu shami la ma her ken ngeren mbara. Nahan á fatyô u kaan er Bibilo asev nyian mba kwagh môm a ngeren mba yange i nger sha icighan mne u hiihii la. Kwagh ugen u shi a wase u kaven kwagh ne yô agbenger a ngeren agenegh a Ruamabera u Mbakristu u ken zwa Grika kuma anyom deri nahan tseegh a mba yange i hii ngeren la. Agbenger a akaangeren kpeghee a ior mba ken tar a a shi her la taver u mô a̱ zulum uderimbaanyomov imôngo tsô kpaa a mba yange i hii ngeren sha hiihii la.
Iwua i Aôndo
7. Msamber u Bibilo ngee kuma nena?
7 Bibilo ka takerada ú i hembe samber a mi sha won cii yô. I gber i̱ kuma er ukôpi ubiliôn utar nahan. Ma takerada ugenegh môm tsô kpaa va ikua a ingegh kira ga. Shi i gema Bibilo jimin cii shin avegher a i̱ ken ijô kuma er 2,000 nahan. Sha nahan yô, i hen er iyenge ior kuma er 98 sha ityou ki deri ken iyenge ior sha tar cii vea fatyô u zuan a Bibilo.
8-10. Ka atôakaa agenegh a nyi a ne ve Bibilo i kom i̱ se time kereghe?
8 Mimi je takerada ú u senge er ú due sha ikyev i Aôndo shi akav a ken won man a kimi cii á tese mimi u ú nahan ú kuma u se time shami. * Ú pase awashima u uma, inja i mlu u tar u hegen, kua kwagh u a lu van ken hemen kpaa. Ma takerada ugenegh ua fatyô u eren kwagh la ga.
9 Een, Bibilo ka kwaghôron u Aôndo hen tsombor u uumace. Yange na i nger i̱ sha mtese u tahav mbu tomov nav shin jijingi na, lu iorov kuma 40 nahan ve nger i̱ ye. Sha nahan yô Aôndo lamen a vese ken Mkaanem nam, Icighan Bibilo. Apostoli Paulu yange nger er: “Gadia zum u ne ngohol kwaghôron u Aôndo u ne ungwa hen vese la yô, ne rumun un er ka kwaghôron u ior ga, kpa er ka kwaghôron u Aôndo.”—1 Mbatesalonika 2:13.
10 Abraham Lincoln, Presiden u sha 16 u United States, yange yila Bibilo er “iwua i hembancii i Aôndo a ne or yô . . . Á i̱ shio yô ma se fe mkposo u kwagh u vough man u bo ga.” Nahan hegen, kanyi iwua i hemban ne i̱ ôr se sha er yange ican i yan hii, man er i hii ve Aôndo a ne i̱ ian, man kwagh u una er shami yô?
[Ngeren mba shin kpe]
^ Ikyum. 8 U seer zuan a iwanger vindi vindi sha kwagh u mtese vough u Bibilo yô, nenge takerada u i yer er The Bible—God’s Word or Man’s?, i gber ú ken 1989 sha ikyev i Watchtower Bible and Tract Society of New York, Inc.
[Mbampin Mba Ngeren u Henen]
[Foto u sha peeji 10 la]
Bibilo, i Aôndo yange na i nger la, ka kwaghôron na hen tsombor u uumace
