Ka a dugh or wase ken tiônnongo u Kristu kera sha ci u nan er isholibo kpa nan venda u geman ishima nahan, i nyoon se kpishi. Gbenda u se dondon kwaghwan u ken Bibilo sha kwagh ne la ka u tese er Aôndo a doo se ishima man er se kegh iyol u dondon mserakaa na kpaa yô. * Time sha mbampin mbagen mba ior ve pin sha ikyaa ne yô.

Doo u se eren a mba i dugh ve ken tiônnongo kera la nena? Bibilo kaa ér: “De zough nen a ma or u i yer nan er anmgbian kpa nan gem nan lu or u idya shin or u hua shin or u civir akombo shin or u ityuhwan shin or u hunden msôrom shin or u numun gbenda ga; imbaor la yô, kwaghyan tsô kpaa de ye a nan imôngo ga.” (1 Mbakorinte 5:11) Bibilo ôr kwagh u hanma or u “nan kera [lun] ken ityesen i Kristu ga” la ér: “De nyer nen a nan ken ya wen ga, msugh tsô kpaa, de sughun nen nan ga. Gadia u nan sugh nan yô, nan ngu nyôron nongo a nan sha aeren a na a bo la.” (2 Yohane 9-11) Se mba kera civir Aôndo imôngo a or u i dugh nan ken tiônnongo u Kristu kera la ga, shi akaa agen kpa se mba eren vea a nan ga. Iyoukura (zwa Buter) i Setemba 15, 1981 la kaa sha peeji 25 ér: “U kaan a or wer ‘M sugh u’ la tseegh kpa ka gbenda u hiin iliam a nan, man ashighe agen je yô, mkaanem mara tseegh maa na ne hingir ijende. Nahan doo u se hii iliam a or u i dugh nan ken tiônnongo kera yôô?”

Jighilii yô, ka hange hange u palegh or u i dugh nan ken tiônnongo kera laa? Een, sha ci u atôakyaa kposo kposo. Hiihii yô, kwagh la ka a tese ér se mba civir Aôndo sha mimi shi se mba dondon Mkaanem nam kpaa. Se mba ongo imo i Yehova sha shighe u i gbe se i doo la tseegh ga, kua sha shighe u i taver se u eren nahan je kpaa. Yehova doo se ishima, sha nahan yô, se mba kor atindi a na cica cii, gadia se fa ser ngu Aôndo u perapera man u dooshima shi atindi a na nga sha ci u mkpeyol wase. (Yesaia 48:17; 1 Yohane 5:3) Ityôkyaa i sha uhar yô, u palegh orsholibo u nan vende u geman ishima la kor se kua mbagenev mba ken tiônnongo sha er se  hôngor mlu wase vea Aôndo ga yô, shi tiônnongo kpa una za hemen u lun a iti i dedoo. (1 Mbakorinte 5:6, 7) Ityôkyaa i sha utar yô, alaghga mtil u se til dông se sue kwaghwan u ken Bibilo la una wase or u i dugh nan ken tiônnongo kera la. Aluer se dondo kwagh u kômatii u ôron ijir a kur la yô, alaghga kwagh la una bende a orsholibo u nan lumun iwasen i mbatamen ga ve i dugh nan ken tiônnongo u Kristu kera la. Nana kera kohol imôngo vea anmgbianev mba ve doo nan ishima la ga, nahan alaghga kwagh la una wase nan nana hide a ‘tile a ishima’ shimi, nana nenge er nan er kwaghbo u vesen yô, nahan nana ker gbenda u hiden hen Yehova.—Luka 15:17.

Aluer or u i dugh nan ken tiônnongo kera la ka or u hen tsombor wase di ye? Ka a lu nahan yô, mlu u kôôsôô u hen tsombor la a na yô i taver kpishi u tilen sha mimi dondon atindi a Aôndo kpen kpen. Doo u se er a or u hen tsombor wase u i dugh nan ken tiônnongo kera la nena? Se fatyô u timen sha hanma kwagh u i gbe u se er la heen ga, kpa de se time sha akaa a vesen ahar.

Ashighe agen yô, alaghga or u hen tsombor wase u i dugh nan ken tiônnongo kera la nan tse hen ya môm vea vese. Er mdugh u i dugh nan ken tiônnongo la a pav nan vea tsombor u nan ga yô, vea fatyô u eren akaa a ve eren ayange ayange imôngo la shi lamen imôngo kpaa. Nahan kpa, isholibo i nan er la i tese ér nan tsua u kera icivir Aôndo imôngo vea mba hen tsombor u nan mba ve lu civir Aôndo sha mimi her la ga. Nahan aluer se soo u civir Yehova sha mimi yô, se lumun ser nana wa zwa shighe u se lu eren akaa a a gbe a zough sha mciviraôndo la ga. U tesen ikyav yô, aluer tsombor tema Bibilo i henen man or u i dugh nan ken tiônnongo kera la nan ngu her yô, nana wa zwa ken kwaghhenen la ga. Kpa aluer or u i dugh nan ken tiônnongo la ka wanye u kiriki u nan lu sha ikyev i mbamaren mba nan her yô, ka tom u mbamaren mba nan u tesen nan shi tsahan nan. Nahan mbamaren mba lun a dooshima mbara vea fatyô u henen Bibilo a wanye shon. *—Anzaakaa 6:20-22; 29:17.

Ashighe agen di yô, alaghga or u i dugh nan ken tiônnongo  kera la nan tse hen ya vea tsombor u nan ga. Shin er ashighe agen a gba u a er kwagh vea nan sha u sôron ma zayol u hen tsombor nahan kpa, doo u se eren kwagh a nan biishii je ga. Mbakristu mba hen tsombor la mba ve civir Aôndo sha mimi yô, vea keren a ker igbenda i eren kwagh a or u hen tsombor ve u i dugh nan ken tiônnongo kera, u nan tse hen ya môm vea ve ga la ga. Kpa er ve civir Yehova sha mimi shi ve dondon nongo na yô, mba suen kwaghwan u ken Ruamabera u a kaa ér i dugh orsholibo u nan vende u geman ishima ken tiônnongo kera la. Ieren ve i mimi la ka i tese ér kwagh u orsholibo u i dugh nan ken tiônnongo kera la gba ve ishima, shi alaghga ia na nana zua a iwasen ken tsaha u i ne nan la kpaa. *—Mbaheberu 12:11.