ITYOUGH 11
“Ivaa i̱ Lu Kwagh u Icivirigh”
“Ember kwase wou u sha uye la.”—ANZAAKAA 5:18.
1, 2. Ka mpin u nyi se time sha mini, man ka sha ci u nyi?
U ER kwase shin nom vee? Aluer ka nahan yô, u ngu zuan a msaanyol ken ivaa you kpa, shin u ngu tagher a mbamzeyol mba vesene? We man ikyar u ne kera doo ayol a en gaa? Er man u lu ember ivaa you yô, u gema u ngu loughon a lough i shinii? Aluer kwagh ngu nahan yô, ka keng a vihi u kpishi er mlu u kundu kundu u yange lu ken ivaa you la a kera lu ga yô. Er u lu Orkristu yô, se fa keng je ser u soo wer ivaa you i na Yehova Aôndo u a doo u ishima la icivir. Sha nahan yô, ishima ia za u iyol kpishi sha mbamzeyol mba ve lu ken ivaa you hegen ne. Aluer kwagh ngu nahan je kpa, de henen wer we yô kwagh hemba u a hemba je ga.
2 Nyian ne, Mbakristu kpishi mba ve vese ayol a ve, mba ngise ve lu imôngo kpa mmem lu hen atô ve ga yô mba ember ivaa ve. Yange ve ker gbenda u sôron mbamzeyol vev. We kpa u fatyô u seer zuan a mkom ken ivaa you. U zua a mi nena?
KPOROM HEN AÔNDO MAN HEN IKYAR U
3, 4. Aluer nom man kwase mba nôngon ér vea seer kporom hen Aôndo yô, vea hemba lun ikyua ayol a ve sha ci u nyi? Tese ikyav.
3 Aluer we man ikyar u ne kporom hen Aôndo yô, ne seer doon ayol a en. Sha ci u nyi? De se tese ikyav: Tôô wer nomsoor tile hen itinewoogh vegher ne kwase di gema tile vegher la. Uwo ne gbanger shin itine kpa u gema u za hor sha ityough nagh. Nomsoor man kwase la hii u unden uwo ne. Er ve lu a unde ve yem sha atô ga yô, ve gba ica a ayol a ve. Kpa mba ngur unden yemen sha ityough nagh ape u hor la yô, ve hii u kporom ikyua a ayol a ve. U nenge er ikyav ne i tese er i doo u u taver ishima kpa?
4 A fatyô u tôôn iniôngon you i civir Yehova sha gbashima la karen sha iniôngon i or ka nan nôngo kpoghuloo u unden uwo la. Er Yehova a doo u ishima yô, a fatyô u kaan ér u ngu nôngon sha afatyô wou cii unden uwo ne. Nahan kpa aluer we man ikyar u ne kera mba ikyua a ayol a en ga yô, alaghga tsô ne mba a unde u ne za ica ga. Kpa aluer ne za hemen u unden yemen sha atô yô, kanyi ia ere? Fa wer sha hiihii la ne lu ica a ayol a en kpishi. Kpa er ne lu nôngon kpoghuloo ner ne kporom ikyua a Aôndo, sha u unden yemen a yem sha atô yô, we man ikyar u ne hemba kporom ikyua a ayol a en. Sha mimi yô, kwagh u una wase ú u kporom ikyua a kwase wou shin orya wou yô, ka u kporom hen Aôndo. Kpa u kporom hen Aôndo nena?
Aluer nom man kwase er tom a mfe u ken Bibilo yô, ivaa ve ia seer taver
5. (a) Nom man kwase vea kporom hen Yehova man hen ayol a ve sha nyi gbenda? (b) Yehova nengen ivaa nena?
5 Gbenda môm u injaa u we man ikyar u ne unde uwo u sha ikyav ne yô, ka u dondon akaawan a sha kwagh u ivesegh a a lu ken Mkaanem ma Aôndo la. (Pasalmi 25:4; Yesaia 48:17, 18) Time ase sha kwaghwan u apostoli Paulu ne. A kaa ér: “Ivaa i̱ lu kwagh u icivirigh hen ior cii.” (Mbaheberu 13:4) Inja i kwagh la ér nyi? Ishember i “icivirigh” la tese kwagh u a lu a inja kpishi yô. Man kape Yehova a nengen ivaa vough je la, ngi un kwagh u injaa kpishi.
IKYAR U A DOO U ISHIMA SHA CI U YEHOVA DOO U ISHIMA TSUNG
6. Kwaghwan u Paulu sha kwagh u ivesegh la tese ér nyi, man er nan i doo u se fa kwagh ne wang-na?
6 Er we man ikyar u ne lu mbacivir Aôndo yô, ne vande fan er ivaa i lu kwagh u icivirigh, shin i lu icighankwagh je kpaa yô. Ka Yehova iyol na a hii ivaa ye. (Mateu 19:4-6) Nahan kpa, aluer mbamzeyol mba ken ivaa yen hegen yô, nea fa er ivaa i lu kwagh u icivirigh je kpa, mfe ne tseegh una wase ne u tesen ayol a en dooshima shi nan ayol a en icivir ga. Tsô kanyi ia wase ne? Nenge ase gbenda u Paulu yange ôr kwagh u noov man kasev nan ayol a ve icivir ne yô. A kaa ér “ivaa ka kwagh u icivirigh” ga; kpa ér ‘ivaa i̱ lu kwagh u icivirigh.’ Paulu yange lu ôron kwagh u un nenge tsô ga, kpa lu wan a wa kwagh jighilii. * Aluer ne fa kwagh ne wang yô, alaghga kwagh ne una na kwase wou shin nomou una hemba doon we ishima. Er nan ve kwagh a lu nahana?
7. (a) Ka tindi u Ruamabera u nyi se dondono, man ka sha ci u nyi? (b) U ungwan kwagh la ve a akaa a dedoo a nyi?
7 Hide time sha gbenda u ú nengen atindi a ken Ruamabera agen la, er tindi u geman ior hingir mbahenen shin u kohol imôngo sha u civir Aôndo la nahan. (Mateu 28:19; Mbaheberu 10:24, 25) Sha mimi yô, ashighe agen ka i taver kpishi u kuran atindi ne. Alaghga ior mba u pasen ve kwagh la vea soo u ungwan ga, shin tom u uke u ú eren la ka u na ú u vôr kpishi, nahan u zan a za mkombo kpa i taver we. Nahan kpa u gbe uwer u pasen ior loho u Tartor ga, shi u ze mbamkombo mba Mbakristu hanma shighe. Or môm kpa nana fatyô u yangen we u eren akaa ne ga, Satan je kpaa ga! Una fatyô ga sha ci u nyi? Sha ci u Yehova doo u ishima a ishima you cii nahan u soo u kuran atindi a na. (1 Yohane 5:3) Kanyi i dedoo ia due kere? Aluer u ngu duen kwaghpasen shi zan mbamkombo yô, u zua a bemshima shi a saan we iyol kpaa, gadia u fa je wer u ngu eren ishima i Aôndo. Mlu u kundu kundu u ken ishima ne una gema a seer we agee. (Nehemia 8:10) Kwagh ne tese se nyi?
8, 9. (a) Kanyi ia na ve se dondo kwaghwan u ivaa yase i lu kwagh u icivirigh laa, man ka sha ci u nyi? (b) Ka atôakaa ahar a nyi se time sha mi hegene?
8 Er Aôndo a doo u ishima tsung yô, u kor atindi a a we ér se pasen kwaghaôndo shi se kohol imôngo la, ka wea tagher a mbamtaver je kpaa. Mdoo u Yehova a doo u ishima la shi una wase u u dondo kwaghwan u ken Ruamabera u a kaa ér: “Ivaa [you] i̱ lu kwagh u icivirigh” la, a lu inja er taver u eren nahan je kpaa. (Mbaheberu 13:4; Pasalmi 18:29; Orpasenkwagh 5:4) Heela tseegh ga, er Aôndo a veren we doo doo sha tom wou u pasen kwagh man sha mbamkombo mba u ze la nahan, kape iniôngon you i nan ivese you icivir la kpa Yehova una nenge a mi shi una ver i doo doo je la.—1 Mbatesalonika 1:3; Mbaheberu 6:10.
9 Nahan yô, u er nan ve ivaa you ia lu kwagh u icivirighi? Gba u ú palegh aeren a aa vihi ivese you la. U seer yô, er akaa a aa seer taver ivese you yô.
PALEGH ILIAM MAN AEREN A A VIHIN IVAA LA
10, 11. (a) Ka ieren i nyi i vihin ivaa? (b) Ka mpin u nyi i doo u se pine ikyar yasee?
10 Kwaseya ugen u a lu kwase Kristu yô yange kaa ér: “M ngu sônon Aôndo mer a nam tahav mbu wan ishima.” U wan ishima a nyi? Kwaseya shon kaa ér: “Orya wam ka a shi lahan mo. M ngu a avav iyou ga, kpa asôngo a ka a shi wan mo, kaan ér ‘U ngum a iwasen ga!,’ ‘U ngu an-gbilin kwase!’ la gbam avav ken ishima kpishi.” Kwaseya ne due a ikyaa igen i i doo u se nenge sha mi yô, ka iliam i dang ken ivaa.
11 Noov man kasev mba ve lu Mbakristu ka vea kaan ayol a ve akaa vea ôron akaa a sôôn ken ishima, a nan ishima vihin nahan i vihi kpen kpen! Sha mimi yô, aluer nom man kwase mba lahan ayol a ve hanma shighe yô, mba nan ivaa ve icivir ga. U ngu eren nena ken ivaa you sha gbaa nee? Gbenda môm u fan kwagh ne yô, ka u hiden a iyol you jime pinen ikyar u wer, “Kwaghôron wam benden a we nena?” Aluer kwase wou shin nomu kaa ér ashighe kpishi mkaanem ou ka ma na nan ishimavihin yô, nôngo sôr inja you sha er mlu u hen tsombor wou una doo yô.—Mbagalatia 5:15; Mbaefese 4:31.
12. Mcivir u or una hingir gbilin kwagh sha ishigh ki Aôndo nena?
12 Fa wer gbenda u ú yaren tom a nombor wou ken ivese you la bende a mlu wou vea Yehova. Bibilo kaa ér: “Aluer ma or ngu henen er nan cie Aôndo, kpa nan ker nombor u nan tsaha ga nan tsughun ishima i nan iyol i nan yô, mcieaôndo u nan la, ka gbilin tsô.” (Yakobu 1:26) Kwaghôron wou gba zua vea mcivir wou; u fatyô u paven akaa a ahar ne ga. Bibilo lumun a kwagh u ior ve kaan ér aluer or senge ér nan ngu civir Aôndo yô, hanma kwagh u nan er hen ya u nan cii kwagh gba sha mi ga la ga. De tsughun iyol you ga. Ikyaa ne ka i eren asenge sha mi ga. (1 Peteru 3:7) Aluer u ngu a mfe shi u ngu civir Aôndo sha gbashima, kpa u gem u kaan kwase wou shin nomu akaa sha apera wer i nyoon un iyol yô, u ngu vihin ivese you, nahan Aôndo una nenge mcivir wou ér ka gbilin kwagh.
13. Nom shin kwaseya nana na ishima ia vihi ikyar u nan ker nena?
13 Shi doo u nom man kwase vea wa ikyo sha er vea eren akaa a nan ayol a ve ishimavihin sha igbenda i ken myer ga yô. Time ase sha akav a tesen a ahar ne: Hanma shighe yô ngô ugen u a nengen sha uôn tswen yô ka a yila Orkristu ugen ken tiônnongo u a lu a kwase yô sha telefon ér a wa un kwagh, nahan ve lam shighe gôgônan; hanma shighe yô, Orkristu ugen u a lu kwav yô ka a due kwaghpasen vea kwase Kristu ugen u a lu kwaseya yô, ve shi ker gbem. Alaghga Orkristu u nan lu a kwase shin kwase Kristu u a lu kwaseya ken akav a se tese sha heen ne vea lu a ma kwagh u bo ken ishima ga; kpa ieren ve la ia bende a akar a ve nena? Kwaseya ugen u yange tagher a imba kwagh ne yô kaa ér: “Ka mea nenge orya wam una hemba veren ishima sha anmgbian u kwase ugen ken tiônnongo nahan, ishima i vihim je i zua ga. Ieren na la na yô ka i lum er m gba kwagh ga nahan.”
14. (a) Ka tindi u nyi sha kwagh u ivesegh a lu ken Genese 2:24? (b) Ka mpin u nyi i doo u se pine ayol a ase?
14 Aluer ishima vihi kwaseya u se er kwagh na sha heen ne man mbagenev mba mlu ve a lu kwagh môm a u na la je kpa ve er kwaghbo ga. Akar a ve la dondo kwaghwan u Aôndo a we sha kwagh u ivesegh la ga ve, kwagh a lu nahan ye. Aôndo kaa ér: ‘Or ka nan undu ter u nan kua ngô u nan, nan var ken kwase u nan.’ (Genese 2:24) U ngu wer, ka u mba ve lu a kasev shin noov la vea gema a lahan a laha mbamaren vev ga; kpa, Aôndo kaa ér gba u vea hemba veren ishima sha kasev vev shin noov vev. Mbakristu soo mba ve civir Aôndo a ve imôngo la; nahan kpa tom ve u hiihii yô, ka u nengen sha akar a ve. Sha nahan yô, aluer Orkristu u nan vese kwase shin kwase Kristu u nan vese nom nan ngu vihin shighe kpishi vea anmgbian u kwase shin u nomso u ve civir Aôndo imôngo yô, nan ngu van a mzeyol ken ivese i nan. Alaghga tsô ka kwagh u a lu van a ayôôso ken ivese you je ne shinii? Pine iyol you wer, ‘Sha mimi yô, m vihin shighe vea kwase wam shin orya wam shi m eren a na sha dooshima er i doo u me eren a na la kpa?’
15. Kwagh u i nger ken Mateu 5:28 la tese ér doo u Mbakristu mba ve lu a kasev shin noov vea vihin shighe kpishi a kwase shin nomsoor u nan lu ikyar ve ga la ga sha ci u nyi?
15 Heela tseegh ga, aluer Orkristu u nan lu a kwase shin kwase Kristu u nan lu a nom nan ngu vihin shighe kpishi a nomsoor shin kwase u nan lu ikyar u nan ga yô, nan ngu wan iyol i nan ken kwaghbo. Kwagh ka a er i vihi yô, Mbakristu mbagenev mba ve lu a kasev shin noov yô hingir u hian a mbagenev mba ve vihin shighe a ve kpishi la. (Mateu 5:28) Sha nahan yô, ve hingir u nyôron iyol ken ieren i hemban vihin a vihi ivese cii. Nenge ase kwagh u apostoli Paulu yange ôr sha ikyaa ne yô.
‘GAMBE U IVAAGH A̱ DE LU A ACÔGHOR GA’
16. Ka tindi u nyi Paulu a we sha kwagh u iveseghe?
16 Paulu yange we Mbakristu kwagh ér “ivaa i̱ lu kwagh u icivirigh” been a bee nahan, maa a ta ve icin ér: “Gambe u ivaagh kpaa a̱ de lu a acôghor ga, gadia Aôndo Una ôr mbaerenijimba man mbavihin ivaa sha idya la ijir.” (Mbaheberu 13:4) Ishember i “gambe u ivaagh” i Paulu a ter heen ne tile sha ityough ki myav u nom man kwase yaven ayol a ve la. Aluer nom man kwase mba yaven ayol a ve tseegh yô, mlu ve la una lu a “acôghor” ga. Sha nahan yô Mbakristu mba dondon kwaghwan u a kaa ér: “Ember kwase wou u sha uye” la.—Anzaakaa 5:18.
17. (a) Er nan ve i doo u Mbakristu vea dondo gbenda u tar u nengen idya i eren la ga? (b) Se dondo ikyav i Yobu la nena?
17 Nom u nan yaven a kwase u i lu u nan ga shin kwase u nan yaven a or u nan lu nom u nan ga cii yô, nan ngu peren atindi a Aôndo sha kwagh u aeren a wang la sha apera. Ior kpishi nyian tôô ér idya i eren ka kwaghbo ga. Nahan kpa, doo u gbenda u mbagenev ve nengen idya la ua bende a mnenge u Mbakristu sha kwagh u idyaa ga. Sha ci u ve fa ér ka ‘Aôndo una ôr mbaerenijimba man mbavihin ivaa sha idya la ijir’ ye, ka orumace ga. (Mbaheberu 10:31; 12:29) Sha nahan yô, Mbakristu mba mimi mba dondon mnenge u Yehova sha kwagh u ivesegh. (Mbaromanu 12:9) Aluer u umbur yô, tertamen Yobu yange kaa ér; “M ya ikyur a ashe am.” (Yobu 31:1) Sha kpôô yô, aluer Mbakristu mba mimi soo u palegh u eren kwagh u una na ve vea er idya yô, gba u vea wa ikyo sha er vea zer kenger kasev shin nomso mbagenev sha gbenda u tômon ve ga yô.—Nenge Ngeren u Seer u a lu a itinekwagh ér, Kwaghwan u Bibilo sha Kwagh u Ivaa Paven man u Undun Ivaa la.
18. (a) Idya i eren ka isholibo i vesen sha ishigh ki Yehova nena? (b) Idya i eren ngi kwagh môm a akombo a civir nena?
18 Idya i eren ka isholibo i vesen sha ishigh ki Yehova nena? Tindi u Mose la wase se u fan mnenge u Yehova sha kwagh ne. Ken tar u Iserael yô, idya i eren man akombo a civir lu ken akaabo a yange or a er ve i wua nan kpee yô. (Levitiku 20:2, 10) U nenge er idya i eren i lu kwaghmôm a akombo a civir kpa? Oriserael yange nana civir akombo yô, nan vihi ikyuryan i nan vea Yehova. Kape Oriserael yange nana er idya ve nan vihi iceghzwa i nan vea ikyar u nan je la. Nahan or u civir akombo man or u eren idya la cii er kwagh sha mimi ga. (Ekesodu 19:5, 6; Duteronomi 5:9; Malaki 2:14) Sha nahan yô, or u civir akombo man or u eren idya cii mba a ibo sha ishigh ki Yehova, Aôndo u jighjigh man u mimi la.—Pasalmi 33:4.
19. Kanyi ia seer taver or ishima u vendan idya i erene, man ka sha ci u nyi?
19 Mbakristu kera mba sha ikyev i Tindi u Mose la ga. Nahan kpa, aluer ve umbur ér idya i eren yange i lu kwaghbo u vesen ken tar u Iserael u tsuaa la yô, kwagh ne una wase ve vea seer kangen ishima ér vea er idya ga. Sha ci u nyi? Nenge ase ikyav ne: U fatyô u nyôron ken iyou adua guren anu sha ishigh ki eev eren msenee? Alaghga u kaa wer ‘mayange ga!’ Kpa aluer i na u zege inyar ér u er kwagh ne nahan, u lumunu? Heela kpa u venda inyigh i môm. Sha kpôô yô, mhen u eren Yehova isholibo sha u civir akombo la ka Orkristu u mimi kwagh u ndôhôrshima kpen kpen. Nahan doo u Mbakristu vea nenge ér u eren ikyar ve man Yehova, Aôndo ve kwaghbo sha idya i eren la kpa ka kwagh u ndôhôrishima, aluer isharen i eren kwaghbo la ia taver nan nan je kpaa. (Pasalmi 51:1, 4; Mbakolose 3:5) Mayange se soo u eren kwagh u una na a saan Satan iyol kpa una gema a va a ilyahan sha Yehova man ivaa yase i i lu icighankwagh la ga.
KWAGH U Ú ER VE IVESE YOU IA SEER TAVER YÔ
20. Kanyi i ze iyol ken avese agene? Tese ikyav.
20 Dugh u palegh aeren a vihin ivaa la sha yô, kanyi kwagh igen nahan u er ve u seer nan nomu shin kwase wou iciviri? Wea soo u zuan a mlumun sha mpin ne yô, tôô wer ivaa ka iyou; kwaghôron u kundu kundu man aeren a dedoo kua akaaôron agen a a ne ivaa icivir la di gema ka ikyav mbi hweev mbi ka mbi na iyou i seer engem ashe yô. Aluer ne soo ayol a en tsung yô, ivaa yen ia lu er iyou i í hee ikyav mbi hweev ker, i i̱ engem ashe shi i kundu iyol ker kpaa yô. Kpa aluer dooshima la ndôhôr yô, hingir inja er ikyav mbi hweev mbira kera mbi ga yô, nahan ivaa yen ia hingir caveraa er iyou i i̱ lu a kwagh môm u injaa ker ga nahan. Er i sar ú u kuran tindi u Aôndo u a kaa ér “ivaa i̱ lu kwagh u icivirigh” la yô, ishima ia mgbegha ú u sôron mzeyol u a lu ken ivaa you la. Gadia, ikyagh ki doon we ishima ka kia vihi yô, u ker gbenda u sôr ki. U er kwagh ne nena? Mkaanem ma Aôndo kaa ér: “Ka sha kwaghfan i maa ya ye, shi ka sha mkav kpaa i taver un ye; ka sha mfe kpaa i ivin ayou sha akaa a injaa kua a dedoo kpaa ye.” (Anzaakaa 24:3, 4) Time sha mkaanem man tsô u nenge er ma zough sha ivese yô.
21. Se er nan ve ivaa yase ia hide a taver here? (Nenge ngeren u a lu a itinekwagh ér, ME ER NAN VE IVAA YAM IA SEER DOONOO? la.)
21 “Akaa a injaa” agen a a lu hen ya u msaanyol a lu her yô, ka dooshima u mimi man mcieaôndo kua jighjigh u nan taveraa. (Anzaakaa 15:16, 17; 1 Peteru 1:7) Akaa ne ka a na ivaa i taver. Kpa ú nenge gbenda u i iv ayou a ken injakwagh i se er sha heen ne a akaa a injaa kpa? “Ka sha mfe.” Aluer nom vea kwase er tom a mfe u ken Bibilo yô, una gema mhen ve shi una seer taver dooshima u hen atô ve la kpaa. (Mbaromanu 12:2; Mbafilipi 1:9) Sha nahan yô, hanma kwa u we man ikyar u ne tem imôngo ne tim sha ma ivur Bibilo, er ivur i sha hanma iyange shin ma ngeren u ken Iyoukura shin Awake! u a er kwagh u ivesegh yô, ka inja er ne mba keren kwagh u hweegh u ne ver ken iyou yen ve ia seer doon ashe yô. Aluer mdoo u Yehova a doo ne ishima la mgbegha ne, ne mba dondon akaa a ne hen la ken ivese yen yô, ne mba van a ikyav mbi hweev mbira ken ‘iyou’ yen. Sha nahan yô, mlu u saan saan man u kundu kundu u yange lu ken ivaa yen la una hide her.
22. Aluer se mba nôngon kpoghuloo eren kwagh u i gbe u se er sha u seer taver ivaa yase yô, ka msaanyol u nyi se zua a mini?
22 Sha kpôô, u hiden a akaa a injaa veren sha ajiir a a vough vough la ka tom u kiriki ga. Nahan kpa, aluer u nôngo kpoghuloo u er kwagh u i gbe u ú er yô, a saan we iyol, gadia u fa je wer u ngu dondon tindi u Bibilo u a kaa ér: “Hemen nen sha u nan ior icivir” la. (Mbaromanu 12:10; Pasalmi 147:11) U hemban cii yô, iniôngon you i keren wer ivaa you i lu kwagh u icivirigh la ia na u u lu ken dooshima u Aôndo.
^ Ikyum. 6 Avur ne tese ér kwaghwan u Paulu sha kwagh u ivesegh la ngu môm ken akaawan a Paulu agen.—Mbaheberu 13:1-5.
