‘Vande Keren Tartor La’
Ityough Pue Kar Môm
‘Vande Keren Tartor La’
1. (a) Er nan ve Yesu yange taver mba ve lu ungwan un la asema ér ve̱ vande keren Tartoro? (b) Ka nyi mpin i doo u se pine ayol a asa?
ER YESU lu taver mba ve lu ungwan un la asema sha shighe u lu nan kwaghôron ken gar u Galilia, anyom a kar hegen i hembe 1,900 la yô, a kaa ér: “Vande keren nen tartor Na man perapera [u Aôndo]” la. Kpa er nan ve kwagh ne yange lu torough torough yumu? Shighe u a va na Kristu tahav mbu Tartor la lu ica ken hemen uderimbaanyomov imôngo je gaa? Een, kpa lu u a lu sha ikyev i Tartor u Mesiya la Yehova una paa hementor na iyol shi una iv icighan awashima na sha ci u tar kpaa ye. Lu u hanma or u nan kav mluainja u akaa la yô, nana ver Tartor la ua lu kwagh u hiihii ken uma u nan kpee. Aluer sha derianyom u hiihii la je kpa kwagh ne lu nahan yô, nyian u i ver Kristu Tor ne je yô, hemba kan nahan cii! Nahan, mpin u i gbe u hanmô wase nana pine iyol i nan yô ér, Inja uma yam ngi tesen ér m ngu vanden keren Tartor u Aôndo kpa?—Mateu 6:33.
2. Ka nyi akaa ior kpishi ve sasen a sase kerene?
2 Sha mimi yô, ior umiliôn imôngo tar sha won cii mba vanden keren Tartor la nyian. Mba tesen ér ve sue hemen u Tartor la sha u haren uuma vev sha m-er u eren ishima i Yehova, gadia ve tsegha ayol a ve hen a na. Kpa, gema ken vegher ugen yô, hemba gban uumace kpishi ishima u keren akaa a taregh. Ior mba keren inyaregh kua akaa a ki a fatyô u yamen la, kua msaanyol u a fatyô u zuan a mi sha inyar la kpaa. Ka vea deen heela yô, i lu u nôngon kwagh taveraa ér vea ker mzehemen ken ityom i sha tôndo i ve eren la. Igbenda i uma ve cii tese ér ve har sha ayol a ve man uyôughyôughmbaakaav man msaanyol u keren tseegh. Ka vea lagh vea na Aôndo jighjigh je kpa, ve gema un ve ver ken ijime.—Mateu 6:31, 32.
3. (a) Ka akaa a injaa a nyi nahan Yesu yange taver mbahenen nav ishima ér ve̱ kerene, man lu sha ci u nyi? (b) Er nan ve ityôkyaa í lu í ishima ia zer nyian se sha ikyaa i uyôughyôughmbaakaav ga?
3 Nahan kpa, Yesu yange wa mbahenen nav kwagh, kaa a ve ér: “De koson nen akaa a injaa sha ci wen shin tar” ga, gadia mô ken ambaakaa la tsô kpa una tsa gbem sha won ga. Shi a za hemen a kaa ér: “Kpa koson nen akaa a injaa sha ci wen Sha” sha u civir Yehova. Yesu shi kaa a mbadondon un ér ishe ve i lu “dedoo” sha u geman tahav vev cii haren sha u eren ishima i Aôndo. A kaa a ve ér: “Ne fatyô u eren Aôndo tom kua inyaregh kpaa ga.” Kpa sha kwagh u ugbayol asev—amba er kwaghyan man ikyondo i zeren man ijiir i tsan nahan di ye? Yesu wa kwagh kaa ér: “Asema a̱ de nyian ne” ga. Á ôr ve kwagh u inyon—á pase ve e̱r Aôndo a koson í yô. Yesu shi taver mbadondon un asema ér ve̱ hen sha kwagh u ityombo—ka Aôndo á zeren í ikondo ye. Uumace mba kaven kwagh mba ve civir un la ve hemba akaa ne cii gaa? Nahan Yesu za hemen kaa a ve ér: “Vande keren nen tartor Na man perapera Na, man akaa [a hange hange] ne cii á seer ne a ye.” (Mateu 6:19-34) Ieren you i tesen ér ú na kwaghôron ne jighjigh kpa?
De Deen Wer i Imbishi Mimi u Tartor La Ga
4. Aluer or gema ishima i nan cii har sha kwagh u inyar nahan, kanyi kwagh ia fatyô u van kere?
4 Ka a inja u kwagh a gba se u zuan a inyaregh ki se kure ugbayol asev man mba tsombor wase yô. Nahan kpa, aluer or gema ishima i nan cii har sha inyaregh ki keren yô, kwagh la una fatyô u van nan a anzughul. Shin er alaghga nana senge ér nan na Tartor la jighjigh nahan kpa, aluer nan ver akaa agenegh hiihii ken ishima i nan yô, akaa la aa fatyô u imbishi mimi u Tartor la, dughun un ken a nan kera. (Mateu 13:18-22) U tesen ikyav yô, kwa gen la gum ornyar ugen pine Yesu ér: “Me er nan man me zua a uma u tsôrono?” Or la vanden kuran atindi shi eren a mbagenev doo doo kpaa, kpa ya ijende a inyaregh nagh kangenaa je lu kwagh u oghom ga. Lu u una fatyô u paven a ki sha u una dondo Kristu ga. Nahan ian i á lu a mi í za lun vea Kristu sha Tartor u sha la maa kar un. Yesu kaa sha iaven shon la ér: “Ka ican tsô, u mba ve lu a inyaregh kpishi vea nyôr sha tartor u Aôndo.”—Marku 10:17-23.
5. (a) Ka nyi akaa nahan yange Paulu taver Timoteu ishima ér una zua a á yô, i kuma unu, man lu sha ci u nyi? (b) Satan tee “inyaregh ki saren” hônon to u van a mtim nena?
5 Anyom nga karen yô, apostoli Paulu nger washika tindi Timoteu a mi ken Efese ape ngula lu sha iaven shon la, gar la gema lu ijiir i vesen i eren kpenga. Paulu umbur un ér: “Se nyôr ken tar ne a ma kwagh môm ga, u duen yemen a kwagh kpaa se fatyô ga. Kpa aluer sea lu a kwaghyan man akondo yô, i kuma se.” Ka a inja u eren tom sha u or a zua a “kwaghyan man akondo” sha ci u nan iyol i nan kua tsombor u nan yô. Kpa Paulu ta icin kaa ér: “Mba i sar ve pe lun mbanyarev yô, ka ve gba ken imeen man ken to u hônon man ken asaren kposo kposo a gbilinigh man a vihin. Ka a mire a ior ken mtim man ken msaaishe.” Satan wa atseregh je zua ga. Alaghga sha hiihii la una mee or sha igbenda i kiriki tseegh. A zaan deghôô yô, shi una seer van a ameen, alaghga una va a ian i zuan a mzehemen ken tom shin ian i zuan a tom u ua hemba van a inyaregh, kpa ua gema a ya shighe u kera yô ú ver sha ci u akaa a ken jijingi yô. Aluer se mba per tsevaa ga yô, “inyaregh ki saren” kia imbishi akaa a Tartor á á hembe lun hange hange la, aa kera gba se kwagh ga. Paulu una kera kaa ga yô: “Mbagenev yô, ki hange ve nahan ve tsume ve undu jighjigh u nan, ve kuma ayol a ve sha atsan atô kposo kposo.”—1 Timoteu 6:7-10.
6. (a) Aluer ka u se palegh to u hônon u inyaregh ki saren la yô, kanyi i gbe u se er keng ne? (b) Er akaa a taver sha tar nyian nahan je kpa, ka vangertiôr u nyi se fatyô u lun a mini?
6 Er Timoteu yange lu anmgbian u ken Kristu u doon Paulu ishima tsung yô, a wa un kwagh ér: “Yevese akaa ne,” shi a seer ér, “Nôngo ityav mbi dedoo mbi jighjigh u nan la.” (1 Timoteu 6:11, 12) Aluer ka u se palegh gbenda u taregh ú ú har sha inyaregh ki keren tseegh ne, sha u u̱ de kombor se cii u̱ yemen a vese ga yô, saa se nôngo kwagh se gema ijime se gema ikyum kpee. Kpa aluer iniôngon yase la i har sha jighjigh u nan wase yô, mayange Yehova una gbihi se ga. Shin er akaa á taver ishe kpishi, shi tom u eren kpa ú ze ihyen kpishi nahan kpa, una nenge ér se zua a kwagh u se kure gbayol wase a mi yô. Paulu nger kwagh kaa ér: “Inyaregh ki saren ki de luun ken uma wen ga. Kwagh u ne lu a mi yô, a̱ kuma ne, gadia [Aôndo] kaa er: Mayange Me undu u ga, Me kende u kpaa ga. Nahan yô, se fatyô u kaan vangertiôr ser: Ter ka Orwasen mo, me kera cia ga, ka nyi je or á ereme?” (Mbaheberu 13:5, 6) Shi Tor Davidi yange nger wener: “Ngise m lu iyev, hegen m bee iyol, nahan kpaa, mayange m ngu a nenge i ta orperapera kera ga, shin tsombor u nan kpaa u sônon kwaghyan ga.”—Pasalmi 37:25.
Mbahenen Mba sha Ayange a Tsuaa Mbara Ve Ver Ikyav
7. Ka nyi akaa Yesu yange ôr mbahenen nav sha kwagh u kwaghaôndo u pasene, man er nan ve akaa ne yange lu sha injaa?
7 Yange Yesu tesen mbaapostoli nav been cii yô, a tindi ve ken Iserael ér ve̱ za pase loho u dedoo, ve̱ kaan ér: “Tartor u Sha mgbôghom ve.” Loho la yange ú doo tsôô! Yesu Kristu, Tor Mesiya iyol na, lu hen atô ve. Er mbaapostoli gema ayol a ve cii ver sha u eren Aôndo tom yô, Yesu lu taver ve ishima ér ve̱ na jighjigh ér Aôndo una wa ve ikyo. Nahan a kaa ér: “De tee nen ma kwagh sha ci u gbenda ga, shin aga, shin ikpa, shin kwaghyan, shin inyaregh kpaa ga, man shi de luun nen a uriga uhar ga. Hanma iyou i nea nyôr yô, tsaan nen her zan zan né kar moughon heregh.” (Mateu 10:5-10; Luka 9:1-6) Lu u Yehova una nenge ér Mbaiserael mbagenev kure ugbayol vev, gadia lu gado ve u eren a mbavannya doo doo.
8. (a) Er yange kera shi ica ga u Yesu una kpe la, er nan ve yange tese akaa a he sha kwagh u pasen kwaghaôndo? (b) Kanyi yange gba u ia za hemen u lun kwagh u hiihii ken uma u mbadondon Yesu?
8 Ken masejime yô, er kera shi ica ga u Yesu una kpe la, a shi a ôr mbaapostoli nav ér ken hemen yô, ajiir a vea lu pasen kwaghaôndo la aa kera lu er tsuaa la lu nahan ga. Tôvacan u mbahemen tar vea va a mi sha tom ve la una na yô, ashighe agen á kera ngohol ve doo doo ken Iserael ga. Shi ica a gba ga tsô vea gba zan aa loho u Tartor ne ken ityar i Atôatyev kpaa. Kwa ne i kaa ér ve̱ tôô “asukunyar,” shi “ikpa” kpaa ve̱ tôô. Nahan je kpa, ve̱ vande keren Tartor u Yehova man perapera na, ve̱ lu a vangertiôr ér Aôndo una ver iniôngon i ve lu nôngon ér vea zua a kwaghyan man ikyondo i zeren la doo doo.—Luka 22:35-37.
9. Paulu yange nengen sha ugbayol nav kpa vanden keren Tartor hiihii nena, man yange wa kwagh sha ikyaa ne ér nyi?
9 Apostoli Paulu yange lu ikyav i tesen i dedoo i mba yange ve dondo kwaghwan u Yesu yô. Uma u Paulu cii yange har sha tomshiren na la. (Aerenakaa 20:24, 25) Yange una za kwaghpasen mape kpa, a nengen sha ugbayol nav iyol na, kwa gen je yô a eren tenti. Yange veren ashe ér mbagenev ve̱ nengen sha a na ga. (Aerenakaa 18:1-4; 1 Mbatesalonika 2:9) Nahan kpa, yange mbagenev vea er a na doo doo, vea na un iyua yô, a ngohol a iwuese je. (Aerenakaa 16:15, 34; Mbafilipi 4:15-17) Paulu yange wa Mbakristu kwagh ér ve̱ de gbihin ityom ve i hen tsombor la sha u pasen kwaghaôndo ga, kpa ve̱ gema ve̱ eren ityom i ve lu a mi sha ave wue wue la sha inja vough vough, ve̱ de eren ugen ve̱ undun ugen ken ijime ga. A wa ve kwagh ér ve̱ eren tom, icombor ve i doo ve ishima, shi ve̱ panden kwagh ve̱ naan mbagenev kpaa. (Mbaefese 4:28; 2 Mbatesalonika 3:7-12) A taver ve ishima ér ve̱ suur sha Aôndo, i de lu sha inyar ga, shi ve̱ eren a uuma vev sha gbenda u ua tese ér mimi je ve kav akaa a á hembe lun a inja yô. Sha kwagh u Yesu yange tese yô, u eren nahan la a gba u vanden keren Tartor u Aôndo man perapera na kpaa.—Mbafilipi 1:9-11.
Ver Tartor La U̱ Lu Kwagh u Hiihii ken Uma Wou
10. U vanden keren Tartor la inja na ér nyi?
10 Se asange asange se mba pasen mbagenev loho u dedoo ú Tartor ne nan je? Ngula har sha imba ian i se lu sha mi la man er se lu a iwuese i za kighir la. Umbur wer, Yesu yange kaa ér, ‘Ker Tartor la shighe u ú kera lu a kwagh ugen u eren ga la, ga.’ Er a fa mluainja u Tartor la yô, a pase ishima i Ter na, a kaa ér: “Ker nen tartor Na man akaa ne cii á seer ne a ye.” (Luka 12:31) Er i gbe u se mbagenev kpishi se er tom sha u kuren ugbayol asev kua mba icombor yase nahan kpa, aluer se na jighjigh yô, uma wase cii una har sha u eren tom u Tartor shon ú Aôndo a ne se la. Nahan kpa shi se lu nengen sha ityom yase i hen tsombor la her.—1 Timoteu 5:8.
11. (a) Yesu yange tese ikyav ér ka ior cii vea fatyô u samber aa loho u Tartor la kwagh môm ga nena? (b) Ka nyi akaa nahan ia ture tom u or nana kôr cio u eren la ia hide a mi ijime?
11 Se mbagenev se mba hembe zuan a shighe u pasen loho u dedoo u Tartor ne. Kpa ken injakwagh i Yesu i sha kwagh u inyaagh la yô, yange tese ér mbara mba asema ve a lu er inya i dedoo la nahan cii yô, vea ume atam. Kpa vea ume á a kuma nena nahana? Mbamlu mba iorov mba kposo kposo. Anyom a or man gbon gbon u ken iyol man tom u nengen sha tsombor, akaa ne cii aa va a mkposo. Kpa aluer or ngu a iwuese sha mimi yô, nana shire tom ua gba ave.—Mateu 13:23.
12. Ka avershigh u injaa u ken jijingi u nyi i hembe taver agumaior ishima ér ve̱ gbidye kwar ve̱ nenge ciilii?
12 Ka a inja u se lu a avershigh u una wase se u seer ci wase ken tom u Tartor ne yô. Agumaior a̱ gbidye kwar dedoo a̱ nenge ikyav i injaa i gum Orkristu u tseen ishima Timoteu yange ver la. (Mbafilipi 2:19-22) Kanyi je ia doo a hemba u̱ ve̱ nyôr tom u pasen kwagh hanma shighe la zum u ve bee makeranta laa? Mbaganden kpa vea zua a mtsera aluer avershigh ve ngu sha akaa a ken jijingi yô.
13. (a) Ka an nan tsough kwagh u se ayol a ase se fatyô u eren ken tom u Tartor laa? (b) Aluer mimi je se mba vanden keren Tartor la yô, se lu tesen ser nyi?
13 U ma se tem a tema ma se lu puun mbagenev mba se hen ser vea fatyô u nôngon kwagh hemban er ve lu eren hegen la yô, doo u jighjigh u nan una mgbegha se u nôngon nyôôso iyol sha er se civir Aôndo er mbamlu asev ayol a ase ve ne se ian u civir un la cii yô. (Mbaromanu 14:10-12; Mbagalatia 6:4, 5) Er kwagh u Yobu la yange tese nahan, Satan senge ér ityôkyaa i vesen í í ne ve se civir Aôndo yô, ka sha ci u akaa a se zough a mi la man sha ci u mkpeyol wase man sha ci u mkunduyol wase ayol a ase, nahan awashima wase ka u mimi ga. Kpa aluer se mba vanden keren Tartor la hiihii yô, se kpa se lu tesen ser Diabolo ka icôr oraie. Se lu tesen ikyav ser kwagh u a hembe gban kwagh ken uma wase yô ka u civir Aôndo. Nahan se lu tesen sha mkaan man sha ieren kpaa ser, Yehova doo se ishima kpishi, shi se lu tesen mtil wase sha kwagh u hementor na la, man mdoo u uumace mbagenev kpa ve doo se ishima la.—Yobu 1:9-11; 2:4, 5; Anzaakaa 27:11.
14. (a) Er nan ve i lu a inja u veren ashighe a duen kwaghpasene? (b) Mbashiada kpishi mba eren tom u kwaghpasen ne nan je?
14 Aluer se ver ashighe a eren akaa kposo kposo yô, kwagh la una wase se u hemban zan kera. Yehova iyol na je kpa “ver shighe” u una kure awashima na yô. (Ekesodu 9:5; Marku 1:15) Aluer gba doo yô, ka a inja u a̱ bunde kpa se duen kwaghpasen kwa môm shin kwa har nahan sha ashighe a i ver ken hanma sati la. Mbashiada mba Yehova udubu udubu tar sha won cii nyôr tom u ishuen pania la, ka ve pase loho u dedoo i kuma er ahwa ahar nahan ken iyange. Mbagenev udubu udubu mba eren tom pania, mba yôôn loho u Tartor la kuman er ahwa ahar man tiôn nahan ken iyange. Ikpur mba pania man mbamishen ka ve shi ken tom u Tartor i hemba nahan. Shi se fatyô u keren hanma ian í í dugh cii sha u pasen hanma or u nan kegh ato a vese cii ishimaverenkeghen i Tartor ne. (Yohane 4:7-15) Isharen yase yô, i lu u eren tom la er mlu wase a ne se ian u eren la cii, gadia Yesu yange tsengakaan ér: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”—Mateu 24:14; Mbaefese 5:15-17.
15. Sha kwagh u tom wase ne yô, er nan ve ú hen wer kwaghwan u ken 1 Mbakorinte 15:58 la ngu sha shighe voughlo?
15 Hanma kpentar u Mbashiada mba Yehova ve lu ker sha tar cii yô, mbá eren tom ne ken mzough kangenaa. Mbá dondon kwaghwan u Bibilo i we la, i kaa ér: “Tile nen dông, de kpoghor nen ga, eren nen tom u Ter ngegh je sha hanma shighe cii, gadia ne fa, ken Ter yô, tom wen ngu gbilin ga.”—1 Mbakorinte 15:58.
Kwaghôron u Hiden Kimbir Kwagh
• Zum u Yesu yange kaa ér vande “keren nen tartor” la, kanyi yange lu tesen ér i gema i ver ken ijime?
• Ka mnenge u nyi i doo u se lu a mi sha kwagh u wan iyol yase ikyo kua icombor yase laa? Ka iwasen i nyi Aôndo una na se?
• Ka aan a tom u Tartor á nyi se fatyô u nyôrono?
[Mbampin Mba Ngeren u Henen]
[Foto u sha peeji 107 la]
Ken hanma tar yô, Mbashiada mba Yehova mba pasen loho u dedoo nyian, cii man mkur una va ye
