Se Mba sha Ikyev i Atindiakaa a Puee?
Ityough 24
Se Mba sha Ikyev i Atindiakaa a Puee?
1. Ka tindi u nyi yange Mose ngohol za na ioroo?
KA ATINDI a nyi Yehova Aôndo a soo er se̱ waan a ikyo? Ka u saa se kura kwagh u Bibilo i yer er “atindi a Mose” laa, shin shighe u genegh ka i yila er “atindi” la? (1 Utor 2:3; Titu 3:9) Shi ka i yila er “tindi u TER,” sha ci u ka Un a ne a ye. (1 Kroniku 16:40) Yange Mose ngohol Tindi la za na ior di tsô.
2. I er tindi la sha nyi?
2 Tindi u Mose la ngu a atindi keregh kposo kposo hemba 600, shin atindiakaa, kua a 10 a jim jim la kpaa. Ka vough er yange Mose kaa la er: “Man A [Yehova] pase ne ikuryan na, i a kaa er ne̱ er sha mi la, ka atindiakaa a pue la; shi a nger a sha ikpande i awen ihiar.” (Duteronomi 4:13; Ekesodu 31:18, King James Version) Kpa ka unô yange Yehova na ve Tindi la, kua Atindiakaa aa Pue? Ka uumace cii yange na ve a yee? Awashima u Tindi la lu nyi?
I NA HEN ISERAEL SHA CI U AWASHIMA JIM JIM
3. Se fa sha nyi ser ka hen Iserael tseegh yange i na Tindi laa?
3 Ka uumace cii yange i na ve Tindi la ga. Yange Yehova ya ikyur a ve, shin iceghzwa, a tsombor u Yakob, u yange hingir ikyurior i Iserael la. Ka ve tseegh yange Yehova na ve atindi a na ye. Bibilo i pase kwagh ne waeng je ken Duteronomi 5:1-3 man Upasalmi 147:19, 20.
4. Ka sha ciu nyi yange i na ikyurior i Iserael Tindi laa?
4 Apostoli Paulu yange pine mpin er: “Nahan atindi nga a inja sha nyi?” Een, ka sha ci u nyi yange Yehova na Iserael tindi na nee? Paulu shi na ikyar er: “Ka sha ci u mbamper mba i per tindi la man i seer a ye, zan zan vor u i tende zwa sha mi la ua kar van. . . . Kape tindi a lu orkuran wase [shin, ortesen] u zan a vese ken Kristu sha u i na se ishô sha jighjigh u nan yô.” (Mbagalatia 3:19-24) Awashima u Tindi la jim lu sha u kuran shi hemen ikyurior i Iserael la sha er vea wa agoiyol u ngohol Kristu zum u una va yô. Iniaav mbi ve lu nan kpishi sha ci u Tindi kaa nahan la lu sha u umbur Mbaiserael sha u ve̱ fa er vé lu mbaasorabo mba kwagh a gbe ve a Oryiman yô.—Mbaheberu 10:1-4.
“KRISTU KA MKUR U TINDI”
5. Shighe u Kristu va kpe sha ci wase la, yange i er a Tindi la nena?
5 Ka mimi, Yesu Kristu ka Oryiman u sha ityendezwa, vough er yange ortyom vande yôôn sha shighe u mmar na la nahan. (Luka 2:8-14) Nahan er yange Kristu va man va na naagh sha uma na u waeng la kera yô, Tindi la hingir nena? I kar a mi kera. “Se kera mba sha ikev i orkuran ga,” kape Paulu yange pase je la. (Mbagalatia 3:25) Mtee u i tôô Tindi kera la gema lu ikav mbi shirin sha ciu Mbaiserael. Yange tindi pase ve er ve lu mbaaasorabo yô, sha ciu ve cii or môm yange nan fatyô u kuran Tindi la tsembelee ga. Paulu shi pase er, “Kristu paa se, due a vese ken ifan i tindi la kera.” (Mbagalatia 3:10-14) Shi Bibilo i pase er: “Kristu ka mkur u tindi.”—Mbaromanu 10:4; 6:14.
6. (a) Shighe u Tindi la kule la, mlu u Mbaiserael kua mba ve lu Mbaiserael ga mbara lu nena, sha ciu nyi? (b) Yange Yehova er aa Tindi la nena?
6 Tindi la jim yange lu ikyondo i yisan shi lu “kpekpe” hen atô u Mbaiserael a mba yange ve lu sha ikyev i tindi la ga la. Sha naagh ku yange va na sha uma na la, Kristu “bunde . . . akaawan a a lu sha gbaaôndo la kera ye, sha u Una gema ve uhar cii [ka Mbaiserael man mba ve lu Mbaiserael ga mbara] Una gba or u he môm, ken iyol Na.” (Mbaefese 2:11-18) Sha kwagh u ieren i Yehova Aôndo iyolna yange va a mi sha kwagh u tindi u Mose la yô, i ôr se er: “A de se atindi a se per la cii. Mnger u anzô ase a atindi a na [i wa Atindiakaa aa Pue la kpa keregh], u a lu nan se ibo la [sha aciu nan Mbaiserael ibo er ka mbaasorabo] yô, A ese un kera, A bunde un A gema A mande un sha [kon, NW ].” (Mbakolose 2:13, 14) Nahan yô, yange Tindi kule, sha naagh ku waeng ku yange Kristu va na la.
7, 8. Kanyi kwagh i tese er yange i pav Tindi la ker avegher ahar ga?
7 Kpa, mbagenev mba kaan er Tindi pav ker avegher ahar: Ka Atindiakaa a Pue, kua atindi a genegh la. Ka ve kaa er, ka atindi a genegh la a kur ye, kpa Atindiakaa a Pue la yô nga heregh. Kpa ka mimi ga. Ken Ityesen na i sha Uwo la yange Yesu ôr kwagh u ken Atindiakaa a Pue kua ajiir a genegh ken Tindi la a u tesen mkposo ve shio. Nahan yange Yesu tese mpav u tindi u Mose ker avegher ahar ga.—Mateu 5:21-42.
8 Shi, ver ase ikyav sha kwagh u Aôndo yange na apostoli Paulu er a nger ne: “Kpa hegen er i sagh se ken atindi kera” yô. Yange i lu atindi di tsô yange i sagh Mbayuda mbara ker kera ye kpa lu Atindiakaa a Pue la ga zee? Ei, Paulu za hemen u kaan er: “Mayange ga. Luun sha atindi ga yô, ma m fe isholibo ga, gadia aluer tindi una kaa er, de tem ga, ga yô, ma m fe mtôm ga.” (Mbaromanu 7:6, 7; Ekesodu 20:17) Er i lu “De tem ga” la a lu tindi u maseityô u ken Atindiakaa aa Pue la yô, ka tesen er yange i sagh Mbaiserael kera ken Atindiakaa aa Pue la kpaa.
9. Kanyi i tese er yange i kar a tindi u iyange i Memen la kera?
9 Inja na yô tindi u sha kwagh u tseghan iyange i Memen sha hanma lahadi, u a lu u sha unyiin ken Atindiakaa a Pue la kpaa, yange i sagh se ker kera zee? Een, i sagh se ker kera. Kwagh u Bibilo i kaa ken Mbagalatia 4:8-11 kua Mbakolose 2:16, 17 la tese er Mbakristu mba sha ikyev i atindi a ngise Aôndo na Mbaiserael, shi kaa er ve̱ kuran iyange i Memen kua ayange a genegh ken inyom la ga. Er i gbe u Mbakristu vea kera kura iyange i Memen ken hanma lahadi ga la a fatyô u zuan a kwaghôron shami ken Mbaromanu 14:5.
ATINDI A A LU SHA CI U MBAKRISTU LA
10. (a) Mbakristu mba sha ikev i atindi a nyi? (b) Atindi a genegh ne kpishi va hana, shi á due ker ka sha inja sha ciu nyi?
10 Ka u kaan ér, e̱r Mbakristu ve lu sha ikyev i Atindiakaa a Pue la ga yô, gba u vea kera kura ma tindi ga shinii? Mayange ga cii. Yange Yesu va a “ikuryan i he,” sha naagh ku hembandoon cii ku sha uma na u vough la. Nahan Mbakristu hingir u lun sha ikyev i ikuryan i he ne nahan mba sha ikyev i atindi a Mbakristu. (Mbahebru 8:7-13; Luka 22:20) Atindi ne kpishi i dugh a ken tindi u Mose la. Kwagh ne ka kwagh u lanen ishima shin u cieryol kpaa ga. Ashighe kpishi zum u gomoti u he ka una kar a tema u hemen má tar yô injakwagh ne ka i er. Ka i gba u á kar a atindi a tse la kera shi a va a ahe, kpa atindi ahe la shi ka a lu yaren tom a atindi a genegh ken a tse la. Kape i lu kpaa je la, Tindi u ikyuryan i tse la kule, kpa atindi a sha aerenakaa a genegh kpishi shi i nyôr a a sha ciu Mbakristu.
11. Ka atindi shin atesen a nyi i ne Mbakristu kpa á lu kwagh môm aa Atindiakaa a Pue laa?
11 Yô ver ikyav tsô u nenge er i lu yô zum u u lu ôron Atindiakaa a Pue la sha peeji 203, yô tôô kar sha atesen man sha atindi a Mbakristu angan ne: “Civir Ter, Aôndo wou, ka Un tseegh er Un tom ye.” (Mateu 4:10; 1 Mbakorinte 10:20-22) “Kemen nen ayol sha akombo.” (1 Yohane 5:21; 1 Mbakorinte 10:14) “Ter wase u Sha, i tsegha iti You [i de teren i sha gbenda u daeng ga].” (Mateu 6:9) “Ne ônov, ungwan nen imo i mbamaren enev.” (Mbaefese 6:1, 2) Shi Bibilo i pase waeng er iwoo-or, idya i eren, iv mbu iin, aie u eren man u tômon akaa la cii ka atindi hen Mbakristu.—Mpase 21:8; 1 Yohane 3:15; Mbaheberu 13:4; 1 Mbatesalonika 4:3-7; Mbaefese 4:25, 28; 1 Mbakorinte 6:9-11; Luka 12:15; Mbakolose 3:5.
12. I nyôr a tindi u iyange i Memen la ken ierenkwagh i Mbakristu nena?
12 Shin er i kera ne Mbakristu tindi u kuran iyange i Memen ken hanma lahadi ga nahan kpaa, kwagh ngu u se hen keregh yô. Yange Mbaiserael ve mem sha mlu u iyolough jim jim, kpa Mbakristu yô ka mmem u ken jijingi. Nena? Sha ci u jighjigh u nan man ikyo i wan yô Mbakristu mba mimi ve haa ityom i wan iyol ikyo tseegh la kera. Ityom shon yô i wa u keren u nyôôso perapera ve la ker. (Mbaheberu 4:10) Mmem u ken jijingi ne mba kor un iyange i môm tseegh ken atô u lahadi ga kpa ka ken ayange a ataankarahar la cii. Ken mkura u tindi u iyange i Memen sha ci u kwaghyan u ken jijingi la yange gema kura Mbaiserael sha u vihin shighe ve cii sha kwagh u ugbaiyol vev la. U yaren tom sha imba ieren ne ken jijingi hanma iyange la ka gbenda u hembandoon u kemen iyol sha uyôghyôgh mbaakaav.
13. (a) Ka tindi u nyi i we Mbakristu kwagh er ve̱ wa ikyo, man mba we i ikyo nena? (b) Ka hanma tindi yange Yesu ôr kwagh shami taveraa? (c) Tindi u Mose cii yange har sha tindi u nyi?
13 Nahan yô i wa Mbakristu kwagh er ve̱ eren kwagh “sha tindi u Kristu vough,” i de kera luun sha u kuran Atindiakaa aa Pue la ga. (Mbagalatia 6:2) Yange Yesu na atindi kpishi kua akaawan, man aluer se mba wan a ikyo yô se mba kuran shin se mba ivin tindi na vough. Kpa jim je yô, Yesu yange hemba ôron kwagh taveraa sha kwagh u dooshima. (Mateu 22:36-40; Yohane 13:34, 35) Een, u soon mbagenev la ka tindi hen Mbakristu. Tindi u Mose cii har shami, er Bibilo i kaa nahan: “Gadia atindi cii kure sha kwaghôron môm er: or u nan we ndor a we yô, nana̱ doo u ishima er we iyol you nahan.”—Mbagalatia 5:13, 14; Mbaromanu 13:8-10.
14. (a) Aluer se mba henen shi eren kwagh sha atesen aa tindi u Mose la yô ka kwagh u doon u nyi una due shamini? (b) Dooshima una mgbegha se u eren nyi kwagha?
14 Tindi u yange i na sha ikyev i Mose, lu a Atindiakaa a Pue la, yange lu atindi a perapera a yange due hen Aôndo yô. Man er sé kera lu sha ikyev i tindi la nyian ga nahan kpaa, akaa a injaa a a lu ker la nga a inja hen a vese heregh. U timem shami shi yaren tom shami la se lu vesen ken mkav wase sha kwagh u Orwantindi u vesen Yehova Aôndo. Kpa u hembandoon je yô se timen shi se yaren tom aa atindi man atesen a Mbakristu la ken uuma asev. Dooshima u se lu a mi sha Yehova la una mgbegha se u wan ikyo sha akaa aa a soo er se̱ eren la cii.—1 Yohanu 5:3.
[Mbampin Mba Ngeren u Henen]
[Box on page 203]
ATINDIAKAA A PUE
1. “Ka Mo TER, M lu Aôndo wou . . . De lu a mbaaôndo mbagenev ga, saa Mo.
2. “De gbe eev ga, shin kwagh u a bee ma kwagh u a lu sha kwavaôndo shin u a lu shin inya, shin u a lu shin mngerem ma shin mkur u inyaagh kpaa ga. De gur ve inya ga, shi de civir ve kpaa ga . . .
3. “De teren iti i TER Aôndo wou dang ga . . .
4. “Umbur iyange i memen sha er u̱ tsegha i yô. Ayange ataratar er tom man shi akaa a ou cii; kpa iyange i ataankarahar la, ka iyange i memen i TER, Aôndo wou, je la; sha iyange ngira de ker ma tom ave ga, we, man shi wan wou u nomso, man shi wan wou u kwase . . .
5. “Civir teru man ngôu, er á seer we ayange ken tar u TER, Aôndo wou, A lu nan we yô.
6. “De woo or ga.
7. “De eren idya ga.
8. “De iin ga.
9. “De we or u wan ndor a we aie iyol ga.
10. “De tem ya u or u wan ndor a we ga, shi de tem kwase u or u wan ndor a we ga, shin or u shiren nan tom, shin kwase u eren nan tom, shin bua u nan, shin jaki i nan kpaa, kwagh môm môm u a lu u or u wan ndor a we yô, de tem ga.”—Ekesodu 20:2-17.
[Ufoto mba sha peeji 204, 205 la]
Tindi la lu kpekpe hen atô u Mbaiserael aa ior mbagenev
