MOSE yange va zan zan je va a̱r hen uwo u Horebi sha u keren toho sha ci u iyôngo na. Heen ne a nenge a ageva lu yeghen usu, kpa lu hian ga!

‘Kwagh ne kpilighyol tsôô,’ Mose hen ken ishima na nahan. ‘De m za ikua m za nenge dedoo yôô.’ Ze yô, imo due ken atô u ageva la, kaa er: ‘De kporom heen ga. Tsua akôv shin angahar a ou kera, gadia ijiir i u til her ne ka icighanjiir je.’ Lu Aôndo je lu lamen sha zwa u ortyom ye, nahan Mose cir ishigh inya.

Tsô Aôndo kaa er: ‘M nenge a ican i ior av ve lu yan ken Igipiti la. Nahan m sen sha u me va yima ve, man ka we me tindi sha er ú za hemen ve ú due a ior av ken Igipiti kera ye.’ Lu u Yehova una va a ior nav ken tar u doonashe u Kanaan la.

Kpa Mose kaa er: ‘Mo m ngu ma or ga. A er nan ve me fatyô u eren imba kwagh ne nahana? Kpa aluer m za ye. Mbaiserael vea pinem er: “Ka an nan tindi we?” Tsô me kaa a ve mer nyi?’

Aôndo kaa a na er: ‘Ka kwagh u ú ôr ve ne, “YEHOVA Aôndo u Aberaham, Aôndo u Isaka man Aôndo u Yakob tindim hen a ven.” ’ Shi Yehova seer er: ‘Ngun ka iti yam gbem sha won.’

Mose kaa er: ‘Kpa aluer vea nam jighjigh shighe u me kaa ve mer u tindim la ga ye.’

Aôndo pine un er: ‘Ka nyi ú lu a mi sha uwe laa?’

Mose kaa er: ‘Ka gbough.’

Aôndo kaa er: ‘Kende ku hen inya.’ Tsô Mose eren nahan yô, gbough kura ku hingir iyô. Tsô Yehova shi tese Mose ivande igenegh. A kaa er: ‘Wa uwegh ou ken ikondo you.’ Mose er nahan, man dughun uwegh nagh kera yô, ku kungu segh segh er awombo nahan! Uwegh kura ku lu inja er ku a angev mbu bov mbu i yer er imande la nahan. U seer yô Yehova na Mose tahav sha u a̱ er ivande i sha utar yô. Ken masejime yô a kaa er: ‘U eren uivande mban yô Mbaiserael vea na jighjigh er M tindiu.’

Kwagh ne been kera yô Mose mough yem ken ya za kaa a Yetero er: ‘Wea lumun yô de m̱ hide m̱ yem ken ape anmgbianev av ve lu ken Igipiti la sha er me za nenge er ve lu yô.’ Nahan Yetero kaa a Mose er a̱ za dedoo, man Mose mough kôr gbenda la u hiden ken Igipiti.