NENGE ase zege tsombor ne yôô. Mban ka ônov mbanomso mba Yakob mba 12 je ne. Man yange lu a mbakasev kpaa. Ú fa ati a mô ken ônov mban kpa? De se hen ati á mbagenev ken a ve.

Lea yange mar Ruben, Shimion, Levi man Yuda. Er Rahel nenge er un ngu maren ônov ga yô, ishima vihi un kpishi. Nahan a na Yakob kpankwase na Bila, man Bila mar ônov mbanomso uhar ati a ve er Dan man Nafetali. Tsô Lea kpa na Yakob kpankwase na Selpa, man Selpa mar Gadi man Asher. Lea shi mase maren ônov mbanomso uhar, Isakar man Sebulon.

Ken masejime yô Rahel mase maren wan. A ii un iti er Yosev. Ken hemen yô se va hen akaa kpishi se seer sha kwagh u Yosev, sha ci u yange hingir zegeor je. Mban ka ônov mba nomso mba 11 mba yange i mar a Yakob shighe u lu vea ter u Rahel Laban je ne.

Yakob yange lu aa ônov mbakasev kpaa, kpa Bibilo i̱ na se iti i môm ken ave tseegh. Iti na lu Dina.

Shighe va kuma u Yakob soo u una undu Laban una hide una yem ken Kanaan yô. Tsô a kohol zege tsombor na cii ijiir i môm kua ikpela i ikum i iyôngo man ibua na, man a gba gbenda inya yemen gôgô zende la.

Er Yakob kua tsombor na ve hide ken Kanaan kera anshighe kar yô, Rahel shi mar wannomso u genegh. Kwagh la er shighe u yange ve lu ken zende yô. Yange ican er Rahel sha mar la kpishi, man ken masejime yô a kpe shighe u á lu maren la. Kpa wanikundan u nomso la yô lu gbang gbang. Yakob ii un iti er Benyamin.

Se soo ser se fa ati a ônov mba nomso mba Yakob mba 12 mbara sha ci u nongoior u Iserael cii yange u due ken ave. Jim je yô, ikwe i Iserael i 12 la i ii i ati sha ati a ônov mbanomso mba Yakob 10 kua mba Yosev uhar. Isaka yange tsa sha won anyom kpishi je shighe u a mar ônov mbanomso mban kera yô, man yange á saan un iyol u lun a ônov mba ônov nav tsô. Kpa de se nenge kwagh u yange er Dina wan u wan na la.