KWASE u á dooashe yum ne ka Maria. Un ka wankwase u ken Iserael, ngu ken gar u Nasareti. Aôndo fa je er un ka kwase u lun a inja. Ka sha nahan ve a tindi ortyom na Gaberiel er a̱ va ôr kwagh a na ye. Ú fa kwagh u Gaberiel a ve sha u una va ôr Maria kpa? De se nenge.

‘Mngu sughun we, we u i rumun a we sha mhôônom ma zungwen tsung ne,’ Gaberiel ôr a na nahan. ‘Yehova ngu a we.’ Maria ngu a̱ vande nengen a or ne ga. Ishima za un iyol, sha ci u a fa ikav i kwaghôron na la ga. Kpa her la je Gaberiel sur un ishima.

‘De cie ga, Maria,’ a kaa a na nahan. ‘Gadia doo Yehova a we kpishi je. Ka sha ci u nahan ve i lu u una er kwagh u kpilighyol sha a ci wou ye. Shi kpeghee tsô ú mar wan. Man ka u ú yila iti na wer Yesu.’

Gaberiel za hemen u pasen er: ‘Wan ne una lu zegeor, man a yilan un er Wan u Aôndo Uhembansha. Yehova una na un tor, er Davidi yange lu nahan. Kpa Yesu una lu tor gbem sha won, man tartor na ua kure mayange ga!’

‘Á er nan man kwagh ne una ere?’ Maria pine nahan. ‘M ngu a̱ vôso nom tsô kpaa ga. M ngu a̱ vande fan nomsoor ga, nahan a er nan ve me mar wana?’

Gaberiel na mlumun er: ‘Tahav mbu Aôndo mbu á va sha a we. Nahan a yila wan la er Wan u Aôndo.’ Tsô shi a kaa a Maria er: ‘Umbur anmgbian wou u kwase Elisabetu. Ior yange ve kaa er a bee iyol kar u una mar ônov. Kpa shi ca ga tsô una mar wan. Nahan nenge, ma kwagh u a hembe Aôndo u eren yô ngu ga.’

Her la je Maria kaa er: ‘Mo m ngu kpankwase u Yehova! I̱ erem sha mkaanem ou nahan vough.’ Ortyom la maa yem hen shighe la.

Maria mough fefa sha u una za nenge a Elisabetu yô. Shighe u Elisabetu ungwa ikyenge i Maria yô, wan u ken iyav mbu Elisabetu la tsuwe sha iember. Elisabetu iv a jijingi u Aôndo, nahan a kaa a Maria er: ‘U ngu kwase u lun a iveren kpishi ken ukase.’ Maria tsa vea Elisabetu kuma iwer itiar, tsô man a hide a yem ken Nasareti.

Maria lu nôngon sha u una er ivese vea or u i yilan er Yosev la. Kpa shighe u Yosev va fe er Maria ngu iyav yô, a hen er kera doo u una vôso un ga. Tsô ortyom u Aôndo kaa a na er: ‘De cie u tôôn Maria sha u á hingir kwase wou ga. Gadia ka Aôndo a ne un wan ye.’ Nahan Maria vea Yosev ve e̱r ivese, man ve kegh shighe u a mar Yesu yô.