Sha ayange a Tartor u Roma lu hemen tar cii la, tor u tartor shon, Shisar Agusetu, wa tindi ér hanma Oryuda cii nana hide a za hen geri u i mar nan her la, i za nger nan ingyegh ken ior mba hen ijiir la. Nahan Yosev man Maria hide za ken Betelehem, ape tsombor u Yosev due la. Hen shighe ne, zurum u Maria una mar.

Mba za nyôron ken Betelehem yô, ior iv sha ajiir a tsan cii, ve kera zua a iyou i vea tsa ker ga. Tsô ve kar ve yem hen ityôugh i uile igen. Maa Maria za mar wan na Yesu her. A wa wan la ken ikyondo i lugh lugh, a gema un teghelee, a gbir un shin anar u haan ilev kwaghyan.

Hen shighe ne, mbakuranilev mbagenev lu ken won tugh, ve lu nengen sha ilev vev, ikyua ikyua a Betelehem. Ica i gbe ga yô, ortyom va tile sha ishigh vev, nahan iwanger i iengem i Yehova mondo hen ape ve lu la cii. Cier mbakuranilev mbara iyol, kpa ortyom la kaa a ve ér:  ‘De cian nen ga. M va ne a loho u dedoo. I mar Mesiya nyian, ken Betelehem.’ Her ave ave je maa, mbatyomov mbagenev kpishi due sha kwavaôndo, gba kaan ér: ‘I wuese Aôndo Sha, shi bem a lu shin tar.’ Maa mbatyomov mbara mire. Nahan mbakuranilev mbara er nena?

Tsô mbakuranilev mbara gba ôron ayol a ve ér: ‘Se za nen ken Betelehem hegen je.’ Fese je maa ve za, ve za zua a Yosev man Maria hen ityôugh i uile, ve lu a wanikyundan ve.

Hanma or u yange nan ungwa kwagh u ortyom la ôr a mbakuranilev la cii yô, kpiligh nan iyol. Maria yange hen sha mkaanem ma ortyom la je ma hungur un ga. Tsô mbakuranilev mbara hide yem hen ilev vev, ve lu wuese Yehova sha akaa a ve nenge shi ve ungwa la cii.