Yesu yange due vea mbaapostoli, ve zende ve kar shin Pev u Kederon, ve yem sha Uwo u Olev. Hen shighe ne, ahwa pue kar uhar utu kar. Uwer ta wanger wang. Mba za nyôron hen sule u Gesemane yô, Yesu kaa a ve ér: ‘Lu nen heen, kuran nen.’ Yesu maa undu ve her, kar yem ken atô u sule la daalaa, za gure inya gba eren msen. Yange ishima za un iyol tsung. Kpa a er msen hen Yehova, a kaa ér: “i er ishima You!” Yehova maa tindi ortyom va taver Yesu ishima. Yesu hiden zan ape mbaapostoli lu la yô, a nenge ve lu yaven. Tsô a kaa a ve ér: ‘Nder nen! Shighe ne ka shighe u yaven ga! Kuma u a nam sha ikyev i mbaihyomov av hegen.’

Ica i gbe ga yô, Yuda Isekarioti va nyôr a ikpelaior i toron asema, ve lu a usanker man igbough. Yuda yange fa ijiir i Yesu vanden lun yô, sha ci u ve vanden van hen sule la vea Yesu. Yuda vande ôron ushoja kwagh u una za er ve, vea fa Yesu yô. Nahan Yuda za sha Yesu jighilii, za kende kaa ér: “M sugh U, Ortesen!” Maa a suse Yesu zwa. Yesu gema kaa a na ér: ‘Yuda, u susem zwa man u teem yee?’

Yesu maa due hen atô u mbaapostoli tile, kende pine ikpelaior i toron asema la ér: “Ka an ne kerene?” Ve kaa ér: ‘Ka Yesu, Ornasareti.’ Yesu maa kaa a ve ér: ‘Ka mo un je ne.’ Ôron nahan yô, ior mbara cia hide ken ijime, je ve gba inya. Yesu shi pine ve ér: ‘Mer ka an ne kerene?’ Tsô shi ve kaa a na ér: ‘Ka Yesu, Ornasareti.’ Yesu kaa a ve ér: ‘M vande kaan a ven je mer ka mo un je ne. Kpa ior av mban yô, de nen ve, ve yem.’

Peteru fe ér mba kôron Yesu yô, a tsuwa sanker na ken var, a gber orgen sha togh je ku bugh. Iti i or shon ér Malku, lu wanye u pristi u tamen. Kpa Yesu za uwegh bende or la sha togh ku shon, hide var un togh nagh her. A gema a kaa a Peteru ér: ‘Hide a sanker wou wa ken var. Aluer u ngu nôngon num sha sanker yô, shi ka sha sanker a wua u ye.’  Tsô ushoja mbara kôr Yesu, ve kange un ave, mbaapostoli maa yevese. Ikpelaior la za a Yesu hen orgen u yange vande lun pristi u tamen yô, iti na ér Ana. Ana za tôv Yesu, maa kaa ér i yem a na hen ya u Kayafa, u lu Pristi u Tamen hen shighe la yô. Nahan mbaapostoli yô, lu nyi i er ve?