ITYOUGH 15
Gba u Ú Za Hemen u Henen Kwagh u Yehova sha ci u Nyi?
1. Aluer u za hemen u henen Bibilo yô, u zua a iwasen nena?
Se na jighjigh ser, atesen a vesen a Bibilo a ú hen ne na yô, Yehova hemba doon we ishima cii. Gba u se za hemen u eren kwagh u una na ve Yehova una hemba doon se ishima yô. (1 Peteru 2:2) Cii man u zua a uma u tsôron yô, gba kpee u ú za hemen u kporom ikyua a Aôndo sha u henen Mkaanem nam.—Ôr Yohane 17:3; Yuda 21.
Er ú lu fan Aôndo seer a seer la, jighjigh wou u nan la kpa una hemba taver a taver cii. Jighjigh u nan una wase u u̱ eren ishima i Aôndo. (Mbaheberu 11:1, 6) Jighjigh u nan una mgbegha u ú gema ishima, u hii u eren akaa a dedoo ken uma wou.—Ôr Aerenakaa 3:19.
2. Aluer u fa Aôndo yô, mfe wou la una lu mbagenev a iwasen nena?
U fatyô u eren msen hen Yehova, sônon un wer a wase u u hemba lun vea na kôôsôô cii
Sha marami wase je, ka sea fa kwagh yô, se soo u ôron mbagenev kpaa. Se cii ka i maa se iyol u ôron mbagenev loho u dedoo. Aluer u za hemen u henen Bibilo yô, u fa u pasen ior Bibilo, ôron ve loho u dedoo shi ôron ve kwagh u jighjigh u ú ne Yehova la kpaa.—Ôr Mbaromanu 10:13-15.
Ior kpishi ka ve hii u pasen loho u dedoo sha u ôron azende a ve shin anmgbianev vev loho ne. Eren kwagh ne sha kwaghfan. De kaan a ve wer, kwaghaôndo ve la ka u mimi ga ze, kpa gema ôr ve kwagh u uityendezwa mba Aôndo. Shi umbur wer, ashighe kpishi akaa a dedoo a or nan eren la nga a hemba doon ior a kwaghôron u nan kpôô kpôô.—Ôr 2 Timoteu 2:24, 25.
3. U er nan ve u lu vea Aôndo kôôsôô?
Aluer u ngu henen Mkaanem ma Aôndo yô, kwagh ne una wase u u seer lun vea Aôndo kôôsôô. Shighe a karen yô, u hemba lun vea Yehova kôôsôô cii. U hingir wan u Yehova; u lu ken tsombor na.—Ôr 2 Mbakorinte 6:18.
4. U er nan ve u za hemen u lun vea Aôndo kôôsôô?
Aluer u za hemen u henen Mkaanem ma Aôndo yô, u hemba fan u dondon atindiakaa a Bibilo. (Mbaheberu 5:13, 14) Lam a Orshiada u Yehova nana hii u henen Bibilo a we ken takerada u Bibilo Tese Ér Nyi Jimi? la. Er u lu henen Mkaanem ma Aôndo seer a seer la, kape uma wou kpa una lu doon seer a seer je la.—Ôr Pasalmi 1:1-3; 73:27, 28.
Loho u dedoo due hen Yehova, Aôndo u sar sar. U fatyô u kporom ikyua a na sha u lun ikyua a ior nav. (Mbaheberu 10:24, 25) Aluer u za hemen u nôngon wer u er ishima i Yehova yô, u ngu eren kwagh u ú va zua a uma u a lu uma jim la, ka uma u tsôron je la. Sha kpôô yô, u̱ kporom ikyua a Aôndo la ka kwagh u hemban doon u ú er yô.—Ôr 1 Timoteu 1:11; 6:19.
Kwagh Ugen u Alaghga Shi Una Doo U Yô
KWAGH WASE
Doo u Ú Hen Bibilo sha ci u Nyi?
Bibilo ngi tan ior umiliôn umiliôn sha tar cii iwanger sha akaa a hange hange a a tsum ve la. We kpa u soo u zuan a iwanger shonoo?
