Ôron kwagh kenden shin gbaan ikyenge shimi. Kende a ikyenge you sha shighe u u soo u ôron atôakaa a vesen la, sha er u mgbegha mba u lu lamen a ve la u eren kwagh u u ôr la yô. Er nahan shighe u ú lu ôron avur a Bibilo a a er kwagh u ajiraôron la kpaa. Gba ikyenge shimi sha er u na ior vea ver ishima u ungwan kwagh u u soo u ôron la, shin sha u ôron kwagh u cieryol gayô u a tese ishimanyian yô.

Ôron kwagh sha ikyenge i kaan man i venden. Ôr kwagh sha ikyenge i kaan shin ikyenge i venden sha u tesen msaanyol shin indikwagh gayô mgbeca u kwagh, aluer ka shami u eren nahan ken zwa wou yô. Vende ikyenge sha u tesen ijungwen shin ishimanyian.

Ôron kwagh fele fele gayô kure kure. Shighe u u lu ôron kwagh u saan iyol yô, lam fele fele. Lam kure kure shighe u u lu ôron atôakaa a vesen yô.