KWAGHHENEN U SHA 14
Atôakaa a Vesen la A Due Tseer Tseer
Mbaheberu 8:1
NGEREN U SAVEN: Shighe u u lu nan kwaghôron yô, wase mba u lu lamen a ve la u keghen ato a we, shi pase wang er hanma ityôkwagh i vesen i u lu lamen sha mi la, i zough sha awashima u kwaghôron wou man itinekwagh you la yô.
ER U ER KWAGH NE YÔ:
-
Lu a awashima. Tôv fa aluer awashima u kwaghôron wou la, ka u ôron ior ma kwagh shin wasen ve u lumun a kwagh, gayô mgbeghan ve u eren ma kwagh yô, maa na un sha gbenda u ú kure awashima la yô. Nôngo sha er atôakaa a vesen a ken kwaghôron wou la cii aa wase u u kuren awashima u kwaghôron shon yô.
-
Ôron kwagh teren itinekwagh i kwaghôron wou la. Ôron kwagh teren itinekwagh you ken mhii u kwaghôron wou zan zan mkur. Er kwagh ne sha u kimbir asember a hange hange a ken itinekwagh you, shin ter a sha asember agen.
-
Due a atôakaa a vesen la wang, man sha gbenda u ua taver u kaven ga yô. Tsua atôakaa a vesen a a zough sha itinekwagh you la, shi i lu aa u fatyô u lamen sha mi ken shighe u i ne u la a kôr inya yô. Pande iyenge i atôakaa a vesen a u soo wer u lam sha mi la, shi ter hanma ityôkwagh i vesen i u soo u duen a mi la wang. Wea ter ma ityôkwagh yô, mem cii ve shi u ter igen ye, shi atôakaa a u lu duen a mi la a zua lianaa vea agen.
