SHA CI U NOOV MAN KASEV
2: Ka Ve Eren Kwagh ken Mzough
INJA I KWAGH LA ÉR NYI?
Nom man kwase ka vea eren kwagh ken mzough yô, i lu vough er ornahan igirgi vea or u wasen nan ka ve eren mhen u nahan igirgi la kwaghmôm nahan. Shighe u ve nyer ken mbamzeyol je kpa, mô ve nan ôron kwagh inja er nan ngu tswen nahan ga, kpa ka nan ôron ér “se,” nan kaan ér “mo” ga.
KWAGHWAN U BIBILO: “Kera mba uhar ga, kpa ve hingir iyol i môm.”—Mateu 19:6.
“Gba u nom vea kwase vea eren kwagh inja er mba gban gesa ga, kpa vea eren kwagh ken mzough sha er ivese ve ia doo yô.”—Mkaanem ma orgen, iti na ér Christopher.
ER I HII VE KWAGH NE A LU HANGE HANGE YÔ
Noov man kasev mba ve eren kwagh ken mzough ga ka vea gba ayôôso yô, hanma ve nan gema nan naan orgen ibo, ve de u keren gbenda u sôron zayol ve la. Shighe u kwagh a lu nahan yô, mbamzeyol mba kiriki vea hingir a atôakyaa a vesen a nan gbeev mbu nôngon.
“Saa nom vea kwase vea eren kwagh ken mzough ve, ivese ia doo ye. Luun er mo vea nomom se mba eren kwagh ken mzough ga yô, ma se lu er ka iorov uhar mba ve lu tsan ken iyou i môm di tsô nahan, ma se lu er nom a kwase ga. Inja na yô, ma se lu er iorov uhar mba ka ve lu imôngo, kpa a gbaan u vea er kwagh u hange hange yô, ve gba zwa môm ga nahan.”—Mkaanem ma kwase ugen, iti na ér Alexandra.
KWAGH U U ER YÔ
HEN SHA MBAMPIN MBAN
M nengen inyaregh ki m zough a mi la cii mer ka “ki yagha”?
Ka mea soo u memen tsembelee yô, i gba u me undu nomom shin kwase wamaa?
Ka m lu paleghaa a ior mba nomom shin ior mba kwase wam, shin er a lu a ve kangenaa nahan kpaa?
LAM VEA NOMOU SHIN KWASE WOU SHA MBAMPIN MBAN
Ka nyi, shin ka akaa a nyi nahan se hemban eren imôngo ken ivese yase?
Ka nyi, shin ka akaa a nyi nahan i gbe u se sôr gbenda u se eren a laa?
Ka nyi akaa nahan se er ve a hemba maghen se iyol u eren kwagh ken mzough?
AKAA A AA WASE NE YÔ
Tôô ase wer ne uhar cii ne mba gbidyen bol u i yer ér tennis la, nahan we u ngu vegher ne, kwase wou shin nomou di ngu vegher la. Kpa ka nyi a kaa nahan u fatyô u eren sha er we man kwase wou shin nomou ne gbidye bol la sha gbenda u tesen ér ne mba gban gesa ga?
De u henen ‘er u er ve u hemba’ la, kpa henen er “ne uhar cii ne er ve ne hemba” yô.
“Aluer kwase wou shin nomou ngu a ibo sha ma kwagh kpa, we de kperan ishô ga. Kwagh u vesen yô, bem a lu ken ivesen yen shi eren nen kwagh ken mzough.”—Mkaanem ma orgen, iti na ér Ethan.
KWAGHWAN U BIBILO: “De keren nen mtsera wen tseegh ga, kpa keren nen mtsera u mbagenev kpaa.”—Mbafilipi 2:3, 4.
