Mbamaren ka vea lamen a mbayev vev sha gbenda u mimi yô, ve de mbayev vev kpa ve ôr akaa a a lu ve ishima la.

Mbayev ka vea hingir agumaior yô, i hemba lun ve ican u lamen a mbamaren vev cii. Shighe u mbayev enev lu cuku la, ve ôr ne hanma kwagh. Kpa er ve va hingir agumaior ne yô, mba kera lamen a ven kpishi ga, nahan ne fa mbamnenge vev ga, shi akaa a ve henen ken ishima la kpa ne fa ga. Ka inja er ne mba hen kpe ifi yande ne, ve di mba sha kpe yande la ica a ven nahan. Shighe u i lu inja er mbayev enev soo u lamen ga je kpa, fa nen ner, ka shighe la je i hembe gban u ne lam vea ve ye!

Keghen nen iyol u lamen vea wan wen shighe u a soo u ôron ne kwagh cii. Aluer ka ken atôutu je kpaa, lam nen vea na.

“Kpa alaghga shighe la nahan, a lu u pe kaan a nan wer, ‘Er nan u va ôron mo hegene? M lu vea we heen atetan gbem kpa u ôrom kwagh ga.” Kpa aluer mbayev asev soo u ôron se ma zayol ve yô, doo u se kaa ser mba zan se iyolo? Ka kwagh u i gbe u hanma ormaren cii nana ver ishima ér wan u nan a eren la ga zee?”—Mkaanem ma kwase ugen, iti na ér Lisa.

“Shin er ka m soo u yaven faa nahan kpa, ka mea lam vea mbayev av ken atôutu yô, iliam yase i hemba doon.”—Mkaanem ma orgen, iti na ér Herbert.

KWAGHWAN U BIBILO: “Hanma or nana̱ keren u eren kwagh u una lu mbagenev a iwasen yô, i̱ de lu sha ci u iwasen i nan iyol i nan ga.”—1 Mbakorinte 10:24.

Kwagh a de danen ne ga. Ter ugen kaa ér: “Shighe ugen ka m henen sha akaa kpishi, nahan mbayev av vea lamen a mo je kpa m ungwan kwagh u ve ôron la ga, je ve kpa ve fa!”

Aluer ma kwagh ugen er Televishen nahan ngu danen we yô, pir un, a lu hanseeti kpa pir gayô ver un inya. Nahan ver ishima ungwa kwagh u wan wou a lu ôron la, shi tese wer gba u u nenge sha mi tsembelee, a lu ankwagh u kiriki nan nan je kpaa.

“Gba u se pase mbayev asev wang vea fa er mbamnenge vev ve gbe se kwagh yô. Aluer se er nahan ga yô, alaghga vea kera pasen se mbamnenge vev ga, shin vea keren iwasen ape gen.”—Mkaanem ma kwase ugen, iti na ér Maranda.

“Aluer mnenge u wan wou la ngu bagenaa kpishi kpa, de vihin ishima a na ga.”—Mkaanem ma orgen, iti na ér Anthony.

KWAGHWAN U BIBILO: “Ver nen ishima sha kwagh u ne lu ungwan ne.”—Luka 8:18.

Lamen nen vea mbayev enev hanma shighe u ian i due yô. Ashighe agen mbayev ka ve hemba lamen a mbamaren vev gbar gbar shighe u ve tema vea ve ishigh a ishigh ga yô.

“Ka se lamen vea mbayev asev shighe u se lu nahan mato yô. Ka sea lu vea ve imôngo kpa sea tema sea kenger sha a ve ga shi ve kpa vea kenger sha a vese ga yô, ve hemba lamen vea vese gbar gbar.”—Mkaanem ma kwase ugen, iti na ér Nicole.

Shighe u ne lu yan kwagh vea mbayev enev kpa, ne fatyô u lamen vea ve.

“Shighe u se lu yan kwagh imôngo yô, hanma wase ka nan ôr kwagh u hemban vihin u a er nan ken iyange la yô, shi nan ôr kwagh u hemban doon u a er nan kpaa. Kwagh ne ngu a na se lu kangenaa shi hanma wase nan fa ér gba u nana nôngon a mbamzeyol mba nan tswen ga.”—Mkaanem ma orgen, iti na ér Robin.

KWAGHWAN U BIBILO: ‘Lu tsev tsev sha u keghen ato ungwan kwagh, kpa gema ngôôr a kwaghôron.’—Yakobu 1:19.