SHA CI U MBAMAREN
8: Ka Ve Ver Mbayev Ikyav i Dedoo
INJA I KWAGH LA ÉR NYI?
Mbamaren mba ve veren mbayev vev ikyav i dedoo yô, ka ve eren kwagh u ve tesen mbayev la. Ikyav i tesen yô, aluer u ngu ken iyou man or ngu va pinen we hen shighe u u soo u memen, maa u kaa a wan wou wer nana ôr or shon ér we u ngu her ga yô, u hen wer wan wou la yô nana ôron kwagh sha mimii? A taver.
“Ior kpishi ka ve kaa ér, ‘Eren kwagh u m kaa u yô, i de lu kwagh u m eren ga.’ Kpa u ôr a mbayev nahan a gba sha mi ga. Sha ci mbayev mba er ka katifa nahan. Hanma kwagh u u ôr ve ungwa shi ve nenge u er cii, ka ve kôr, er katifa ka a kura hanma zar kwagh u i we un shimi nahan. Nahan ka sea eren kwagh ugen kposo a ma kwagh u se lu tesen ve yô, ve ôr se.”—Mkaanem ma orgen, iti na ér David.
KWAGHWAN U BIBILO: “We u u pasen kwagh u kaan wer, “De iin ga” la, u gema u iinii?”—Mbaroma 2:21.
ER I HII VE KWAGH NE A LU HANGE HANGE YÔ
Mbayev, kua mba ve lu agumaior je kpaa, mba hembe dondon ieren i mbamaren vev a ieren i hanma orgen cii kua mbakwav ve. Kwagh ne tese ér ne hemba mban sha ian i dedoo i tesen mbayev enev kwagh u vough, aluer ne mba eren kwagh u ne tesen ve la sha mimi yô.
“Ashighe agen ka se ôr kwagh i kuma kwa deri, se henen ser shin wan wase ngu ungwan je-o? Kpa shighe u a va nenge se er kwagh ugen kposo je maa, ka a gba ôron. Mbayev ka ve nengen hanma kwagh u se eren yô, shighe u se hen ser mba nengen ga je kpaa.”—Mkaanem ma kwase ugen, iti na ér Nicole.
KWAGHWAN U BIBILO: “Kwaghfan u a dugh sha la . . . eren atseregh ga.”—Yakobu 3:17.
KWAGH U NE ER YÔ
Hen nen sha gbenda u ne eren kwagh la. Ka akaa a nan msaanyol a nyi nahan ka ne nengene? U eren kwagh a nomou shin kwase wou man mbayev nena? Ka aeren a nyi nahan azende a ou a lu a mini? U we ior ikyo kpa? Jighilii yô, u ngu injaor i u soo wer mbayev ou ve lu la kpa?
“Mo vea nomom se mba kaan a mbayev asev ser ve er kwagh u se ayol a ase se eren ga la ga.”—Mkaanem ma Christine.
Zamber nen shighe u ne er kwagh u shami ga yô. Mbayev enev fa er ne kpa ne yen yô. Nahan aluer u er kwagh u shami ga yô, u fatyô u kaan a nomou shin kwase wou man mbayev enev wer, “Yam nen anyi.” Aluer u er nahan yô, u ver ve ikyav i dedoo i eren kwagh sha mimi shi hiden a iyol ijime.
“Ka sea er kwagh u shami ga yô, i gba u se lumun ibo shi se zamber mbayev asev kpa vea ungwa. Aluer se mba eren nahan ga yô, se lu tesen ve ser ve kpa vea er kwagh u sha mi ga yô, ve venda u lumun ibo shin zamber.”—Mkaanem ma kwase ugen, iti na ér Robin.
“Er se lu mbamaren yô, ka ieren yase mbayev asev ve hemban dondon ye, nahan se mba hembe tesen ve sha u veren ve ikyav, sha ci u ka ve nengen kwagh u se eren la hanma shighe cii. Ikyav yase ngi er ka takeda u i cirin ga, u i tesen ve kwagh ker hanma shighe nahan.”—Mkaanem ma orgen, iti na ér Wendell.
