U Er Nan Ve U Kera Nenge Wer Kwagh Hemba U ken Uma Wou Ga?

NENGEN atsan a u lu yan ken uma wou la nena? Mbatôvon sha kwagh ne kpishi na jighjigh ér mlumun u sha mpin ne una wase u u fan, wea lu a vangertiôr sha akaa shin wea lu or u nengen wer kwagh hemba un ken uma wou yô. Se cii se mba ye ican sha igbenda kposo kposo ken uma, kpa mbagenev ka ve hemba yan ican a mbagen. Nahan kpa, er nan ve mbagenev ka vea yaan ican kera yô, i hide i saan ve iyol, shi ve gba nôngon ér vea er ma kwagh, kpa mbagenev vea ya ican cuku tseegh maa ve vôr a uma?

Ikyav i tesen yô, tôô ase wer u ngu keren tom. I yila u mtaviu, u za er, kpa i venda u tôôn we tom la. Nahan u nenge kwagh la nena? Alaghga u tôô wer ka we jighilii je i vende ye, nahan u hingir u nengen wer ka zayol u been ga, shi u lu ôron ken ishima you wer, ‘Or môm je kpa nana tôô imba or i m lu ne tom ga. M zuan a tom sha won ga.’ Shin, u hemban vihin cii je yô, alaghga kwagh môm u a er u ne tseegh una na u hingir u nengen wer kape hanma iniôngon you ia saa ishe je la, u lu kaan ken ishima you wer, ‘Me fatyô u eren kwagh môm u injaa ken uma wam ga. Or môm kpa m ngu nan a iwasen ga.’ Wea lu henen nahan yô, fa wer, u tôô wer kwagh hemba u.

Kwagh u U Er Ve U Kera Nenge Wer Kwagh Hemba U Ga Yô

U er nan ve u kera nenge wer kwagh hemba u ga? Kwagh u vesen u hii eren yô, fa shighe u i lu u ken ishima dang nahan yô. Kwagh u dondon yô, nôngo de u henen kwagh nahan. Nôngo fa er i hii ve i venda u tôôn we tom yô. Ikyav i tesen yô, i venda u tôôn we tom la ka sha ci u or môm kpa nana tôô imba or u u lu la tom ga er u hen nahan mimii? Shin, alaghga tsô, or u yange yila u mtaviu la ngu keren or u nan lu a mfe u we u lu a mi ga yôô?

Aluer u ver ishima sha atôakyaa a a ne ve i tee u tom ga la jighilii yô, u nenge er i doo u u tôô wer kwagh hemba u ga yô. Aluer i venda u tôôn we tom kwa môm di tsô maa tese ér ka u u fatyô u eren kwagh u injaa ken uma wou gaa? Shin u fatyô u henen sha akaa agen a u lu nôngon eren ken uma wou, er ityom i kwaghaôndo wou, man akaa a u eren vea tsombor wou shin azende a ou la gaa? Nôngo sha afatyô wou cii de u henen wer hanma kwagh u u kôr ave u eren cii una kure a doo ga la. Bee kera yô, aluer ka u mayange u zua a tom ken uma wou ga yô, u fatyô u tsengan fana? Kwagh ugen kpa ngu, u u er ve u de u nengen wer kwagh hemba u yô.

Henen Wer U Fatyô u Eren Akaa a Dedoo a U We Ishima u Eren Yô

Ken anyom a a sember karen ne, mbatwerev mba tôvon sha akaa pase kwagh u a lu ishimaverenkeghen la doo, kpa ka sha gbenda môm tseegh yum. Ve kaa ér ishimaverenkeghen ka u nan jighjigh wer u fatyô u eren akaa a u we ishima u eren yô. Er se va nenge ken ngeren u dondon ken ngun nahan, jighilii yô, ishimaverenkeghen saa sha u nan jighjigh nahan tseegh tsô ga. Kpa kwagh u ve ôr ne una wase u pasen kwagh u a lu ishimaverenkeghen la sha igbenda igen. Aluer se mba a ishimaverenkeghen sha akaa a se we ishima u eren yô, kwagh la una wase se se hemban henen ser se fatyô u eren akaa a dedoo a se we ishima u eren la.

Aluer se hen u tsuan akaa a se soo u eren la shi eren a yô, shighe u se we ishima u eren ma kwagh kpa, se na jighjigh ser se fatyô u eren kwagh shon. Aluer u nenge wer u ngu a gba eren nahan ga yô, doo u u hen sha akaa a u tsua u eren la tsembelee. Hiihii yô, u wa ishima u eren ma kwagha? Ka i lu se ican ga kpishi u tumen ityough ken akaa a se eren ken uma wase ayange ayange la, kpa u geman tôôn shighe henen sha kwagh u se soo u eren ken uma jighilii, shin kwagh u a hembe lun se a inja la yô, i taver se. Bibilo wa se kwagh sha kwagh ne wang ica gba je, ér: “Ma ne fe akaa a a hembe lun a inja la.”—Mbafilipi 1:10.

Ka sea fa akaa a a hembe lun se a inja la yô, i kera taver se u tsuan akaa a hange hange ken akaa a kposo kposo a se eren ken uma wase la ga, er ityom i kwaghaôndo nahan, man akaa a hen tsombor kua ityom yase. Nahan kpa, gba hange hange u se palegh u tsuan a akaa kpishi sha hiihii la, shi hanma kwagh u se lu tsuan yô, i lu kwagh u se fe dedoo ser una lu se ican u eren ga yô. Aluer se tsua kwagh u una lu se ican u eren yô, kwagh shon una na se ishimanyian, nahan alaghga se nenge ser se fatyô ga. Sha nahan yô, aluer se soo u tsuan akaa a vesen a i lu u se er gbem kpa, hemba doon u se hii sha akaa a kiriki, a aa wase se se va kôr cio u eren a vesen la kpaa yô.

Kwagh u ka i ôr ér “gba a mi hembe or ga” la, mimi ngu ker. Ka sea faan akaa a vesen a se tsua u eren la yô, i gba u se na ishima sha mi shi se kange ishima u eren a. Shi aluer se mba henen sha akaa a se tsua u eren la, nengen er i lu akaa a injaa, shi henen sha injar i se zua a mi sha u eren a la yô, kwagh la una seer taver se ishima u eren a. Ka mimi, mbamtaver vea ban ga, kpa gba u se nenge ve ser ka mbamzeyol mba se fatyô u nôngon a mi yô.

Nahan kpa, gba u se hen sha akaa agen kpaa, a se er ve, se fatyô u eren akaa a se tsua la yô. Orgen u a gberen ityakeda yô, iti na ér C. R. Snyder, a tôv tsembelee a fa er or ka nana lu a ishimaverenkeghen ve kwagh la a wase nan yô, nahan a kaa ér, doo u se henen sha igbenda kposo kposo i eren ma kwagh u se tsua u eren yô. Sha nahan yô, aluer se kar gbenda u hiihii gba sha mi ga kpa, u sha uhar shin u sha atar shin ma gbenda ugen ua wase se se er kwagh shon.

Snyder shi kaa ér shighe u se lu eren ma kwagh u se tsua yô, gba u se fa shighe u i hembe doon u se de kwagh shon, se tsua ugen yô. Aluer se nenge ser mimi je gbenda kera ngu u se er ma kwagh u se tsua ga, man ishima zer vihin se sha kwagh shon gbem yô, iyol ia kpe se. Kpa aluer se de kwagh shon, se hide se tsua kwagh ugen u se hen ser se hemba eren tsembelee yô, se lu a ishimaverenkeghen sha mi.

Bibilo ta iwanger sha kwagh ne sha gbenda u a wase se u kaven wang yô. Yange sar Tor Davidi kpishi u ma un maa tempel sha ci u Aôndo na, Yehova. Kpa Aôndo kaa a Davidi ér ka Davidi iyol na una er kwagh u icivirigh la ga, kpa a lu wan na Solomon. Shin er i yange Davidi u zuan a icivir la nahan kpa, Davidi ure shin sendegh her ér saa una maa tempel la ga, kpa hide tsua u eren akaa agen. Yange nôngo sha afatyô na cii, kohol inyaregh kua ikyav mbi a fatyô u maan tempel shon a mi kuren la cica cii, ver wan na.—1 Utor 8:17-19; 1 Kroniku 29:3-7.

Aluer se mba nôngon ser se de u nengen ser kwagh hemba se ken uma, shi se mba henen ser se fatyô u eren akaa a dedoo a se we ishima u eren la sha er se lu a ishimaverenkeghen je kpa, alaghga se lu a ishimaverenkeghen sha anshighe cuku tseegh tsô. Sha ci u nyi? Sha ci u akaa a a eren se ken tar ne ve se lun a ishimaverenkeghen ga la, ka akaa a se fatyô u yangen ga yô. Aluer se mba henen sha mbamzeyol mba ve gande uumace ave ne, er ibanave man ityav mbi nôngon man ieren i mimi ga, kua iangev mbi mbi been ga man ku u u tser se ne yô, a er nan ve se za hemen u lun u a ishimaverenkeghen sha wono?

[Foto]

Aluer i venda u tôôn we ma tom u u soo yô, tese ér mayange u kera zua a tom ugen gaa?

[Foto]

Tor Davidi yange tsua u eren kwagh kpa gba sha mi ga, nahan er kwagh ugen