Mary vea nom na John, a mba ken tar u ior kpishi ken tar u Philippines, ka ve mough ve va lu her ve eren tom yô, nahan ka i saan ve iyol u pasen ior mbara kwagh. Hen shighe u angev mbu Korona la, Mary hii u henen Bibilo a ior mba ken tar na, kua ken ityar igen kpaa. Yange er kwagh ne nena?

Mary yange a pine mba a henen Bibilo a ve la ér: “U fa ior mbagen mba ve soo u henen Bibilo yôô?” Vea lumun yô, maa a pine ve aluer ka u vea fatyô u tesen un ve yô. Ka sea pine mpin ne yô, ashighe kpishi kwagh u injaa a due ker. Sha ci u nyi? Sha ci u ior kpishi mba Mkaanem ma Aôndo ma doo ve yô, ka ve soo u ôron mba hen tsombor ve man azende a ve kwagh u ve lu henen la. Mary yange una pine mba a henen Bibilo a ve la mpin ne nahan ve er nena?

Kwase ugen u Mary henen Bibilo a na yô iti na ér Jasmin. Yange tese Mary iorov unyiin mba ve kpa ve soo u henen Bibilo yô. Kwase ugen ken mba i tese Mary ér a hen Bibilo a ve la, iti na ér Kristine. Yange kwagh u lu henen la doo un kpishi je yô, a kaa a Mary ér a henen kwagh a na kwa har ken kasua. Mary yange pinen un aluer una fa orgen u nan soo u henen Bibilo yô, Kristine kaa ér: “Me tese u azende a am agen.” Ken atô u ukasua kpuaa tseegh Kristine tese Mary azende a na anyiin a yange soo u henen Bibilo yô. Shighe kar yô, Kristine shi tese Mary azende a na agen, azende ne di gema tese Mary azende a ve agen a a soo u henen Bibilo yô.

Kristine yange soo ér tsombor na u u lu ken tar u Philippines la kpa u hen Bibilo. Nahan lam a wan na u kwase Andrea sha kwagh ne. Sha hiihii la, Andrea yange hen ér: ‘Mbashiada ka ior mba ve eren kwagh u mbaimev yô, ve na Yesu jighjigh ga, shi ka Ikyuryan i Tse tseegh ve eren tom a mi ye.’ Kpa yange henen kwagh kwa môm tseegh je maa mase kaven ér mnenge u un lu a mi sha kwagh u Mbashiada la lu shami ga. Yange una hen ma kwagh u he ken Bibilo yô, a kaa ér: “Er i lu Bibilo i ôr je, ka mimi!”

Shighe kar yô, Andrea tese Mary azende a na agen ahar shi tese un kwase ugen u ve eren tom imôngo yô, nahan ve kpa ve hii u henen Bibilo. Anmgbian u baba u Andrea u kwase ugen iti na ér Angela yange pir ashe, kpa hanma shighe u Mary una va henen Bibilo vea Andrea yô un kpa a tema a ungwan, kpa Mary fa ga. Nahan iyange igen yô, Angela kaa a Andrea ér a ôr Mary un kpa a va hii u henen Bibilo a na. Kwagh u Angela lu henen la doo un kpishi, nahan ken atô u uwer môm tseegh Angela kôr avur a Bibilo kpishi ken ityou, shi soo ér i henen kwagh a na kwa inyiin ken kasua! Maa Angela hii u nyôron mbamkombo hanma shighe sha zoom er Andrea lu wasen un yô.

 Mary va fe ér nom u Kristine ka a tile mape a ungwan er ve lu henen kwagh yô, a pine un aluer un kpa una soo u henen Bibilo yô. Joshua maa kaa ér: “M soo u ungwan kwagh u ne lu henen la tseegh nahan de pinen mo mpin ga, u pinem mpin yô maa me yem kwagh wam.” Yange mba henen kwagh ka kom miniti utaan nahan tseegh je maa pine mbampin kpishi hemba Kristine, shi soo ér un kpa i hen Bibilo a na.

Mpin u taver ga u Mary yange a pine ne na yô, a zua a ior kpishi mba henen Bibilo a ve. Er Mary lu a ior mba henen kwagh a ve kpishi yô, a lam a anmgbianev mbagenev ér ve wase un u henen kwagh a ve. Kohol cii yô, Mary lu henen Bibilo a iorov 28 mba ken ityar kposo kposo inyiin.

Jasmin u yange hii henen Bibilo se ter kwagh na ken ngeren ne la, yange er batisema ken uwer u Aipor 2021. Kristine di yange er batisema ken uwer u Mei 2022, maa hide yem ken tar u Philippines za kohol tsombor na. Mba henen Bibilo mbagenev uhar mba Kristine tese Mary la kpa er batisema. Angela kpa yange henen kwagh iwer ngi kar kpuaa yô maa er batisema, nahan ngu eren pania u keke hegen. Joshua nom u Kristine man wan ve Andrea, kua mba henen Bibilo mbagenev mba henen kwagh kpoghuloo zan a mi ave.

Sha ayange a mbaapostoli la, ior lu ôron mba hen tsombor ve kua azende a ve akaa a ve hen sha kwagh u Yesu yô. (Yoh. 1:41, 42a; Aer. 10:24, 27, 48; 16:25-33) We kpa u fatyô u pinen mba u henen Bibilo a ve kua mba ve soo u fan mimi la wer: “U fa ma orgen u nan soo u henen Bibilo yôô?” Aluer u pine mpin u taver ga u hanma or nana fatyô u pinen ne yô, alaghga u zua a ior kpishi mba ve soo u henen Bibilo yô.