NGEREN U TIMEN SHA MI 18
‘Gba Ayem Kure’
“M gba ayem m kure.”—2 TIM. 4:7.
ICAM 129 Se Wa Nen Ishima Her
KWAGH U I TIM SHA MI KEN NGEREN NE YÔ *
1. Ka nyi i gbe u se cii se ere?
ALUER vihi u iyol shin u vôr nahan, u soo u za gban ayem a u fe tsembelee wer nga ican kpishi yôô? Mayange ga cii. Nahan kpa, apostoli Paulu yange kaa ér, Mbakristu cii mba gban ayem. (Heb. 12:1) Shi aluer se mba agumaior shin se beeyol gayô se mba a agee iyol shin kera taver se iyol ga kpa, aluer se soo u va zuan a iyua i Yehova a ver sha ci wase la yô, gba u se cii se wa ishima zan zan mkur.—Mat. 24:13.
2. Er 2 Timoteu 4:7, 8 a tese nahan, Paulu yange lu sha ian i ôron kwagh gbar gbar sha ci u nyi?
2 Paulu lu sha ian i ôron kwagh gbar gbar sha ci u yange ‘gba ayem kure’ doo doo. (Ôr 2 Timoteu 4:7, 8.) Kpa jighilii yô, lu ayem a nyi Paulu lu ôrono?
KA AYEM A NYI SE LU GBANA?
3. Lu ayem a nyi Paulu lu ôron kwagh u a?
3 Ashighe agen Paulu yange a nger kwagh u akaa a i eren ken gesa u anumbegh ken Grika la sha u tesen mbagenev akaa a injaa. (1 Kor. 9:25-27; 2 Tim. 2:5) Shighe ugen la a tôô kwagh u uma u Orkristu a kar sha ayem a gban. (1 Kor. 9:24) Or ka nan hii u gban ayem ne zum u nan tsegh iyol i nan sha ci u Yehova shi nan er Batisema yô. (1 Pet. 3:21) Ka nan kure ayem ne zum u Yehova a ne nan iyua i uma u tsôron la.—Mat. 25:31-34, 46; 2 Tim. 4:8.
4. Ka nyi se lu timen sha mi ken ngeren nee?
4 Uma u Orkristu zua vea ayem a gôgônan sha nyi igbenda nahana? A zua sha igbenda kpishi. De se time sha igbenda itiar i ayem la a zough vea uma u Orkristu yô. Kwagh u hiihii yô, gba u se yevese sha gbenda jighilii, kwagh u sha uhar yô, ka u veren ishima sha ikighir i i ver la, man sha utar yô, ka u wan ishima hemban mbamtaver sha gbenda.
YEVESE SHA GBENDA JIGHILII
Gba u hanma wase nana dondo gbenda u Orkristu la (Nenge ikyumhiange i sha 5-7) *
5. Ka gbenda u nyi i gbe u se dondo, man ka sha ci u nyi?
5 Cii ve or a zua a iyua i ayemegh yô, ka i gba u nana yevese shin nana zaan sha gbenda u ior mba ve tim iyua shon ve tese la. Se kpa aluer se soo u va zuan a injar i uma u tsôron la yô, gba u se dondo gbenda u i gbe u Orkristu nana eren kwagh ken uma u nan la. (Aer. 20:24; 1 Pet. 2:21) Nahan kpa, Satan man mba ve dondon un la, soo ér se dondo ikyav ve i bo la, i de lu inja i Orkristu ga; ve soo ér se za hemen u yevese vea ve sha gbenda u tse la. (1 Pet. 4:4) Ka ve naha se tar sha inja uma u se tsough la shi ve kaa ér gbenda u ve lu zan sha mi la hemba doon, sha ci u ve mba a ian i eren kwagh sha ishima ve. Nahan kpa ishenge ve la ka i mimi ga.—2 Pet. 2:19.
6. Ka nyi u hen ken ikyav i Brian laa?
6 Anti or u nan lu yevese a ior mba tar u Satan ne u lu hemen ve la cii yô, ica a gba tsô nana kav er gbenda u nan tsough la u ne nan hembe lun ken uikyangen yô; jighilii je yô, nan ngu ken kpan. (Rom. 6:16) Nenge ase ikyav sha kwagh u orgen u i yer un ér Brian yô. Mbamaren nav yange ve taver un ishima ér a dondo gbenda u Mbakristu. Kpa shighe u lu anyom puekar la, a nenge ér una dondo gbenda u Mbakristu la yô a saan un iyol ga. Brian maa tsua ér una yevese a ior mba ve lu dondon Satan la imôngo. A kaa ér: “Cuku kpa yange m fa mer tseeneke u sarem yum ne una na me hingir kpan u asaren a iyolough ga. Yange shighe kar yô, m gba man mcimbim ma bom shi m ma msôrom m hunde, shi m lu eren ijimba kpoghuloo. Ken anyom a a dondo la, m hii u man mcimbim ma hemban taver cii, nahan mcimbim man magen kôrom kpan. . . . M hii u teen mcimbim ma bom sha er me zuan a inyaregh ki eren uma yô.” Ken masejime yô, Brian tsua u dondon atindi a Yehova. Yange hide sôr ieren na, nahan ken inyom i 2001 la, i er un batisema. Hegen u a lu dondon gbenda u Orkristu la, saan un iyol kpishi je. *
7. Er i pase ken Mateu 7:13, 14 nahan, ka igbenda ihiar i nyi i lu se sha ishi?
7 Ka sea dondon gbenda u vough la yô, ka i lu kwagh u doon kpen kpen! Satan soo ér se cii se de u yevese sha gbenda u hoghuloo u “zan ken uma la,” se per se yem sha gbenda u u lu bele bele u ior kpishi ken tar ne ve lu zan sha mi la. Ior ngee sha gbenda la shi ngu ican u zan sha u ga. Nahan kpa, ka u “zan ken mtim.” (Ôr Mateu 7:13, 14.) Gba u se suur sha Yehova shi se ungwan imo na ve se za hemen u lun sha gbenda u vough la shi kwagh môm una dan se ga ye.
VER ISHIGH JIGHILII SHI PALEGH U NAN IYOL YOU KUA MBAGEN GBEEV MBU NÔNGON
Gba u se ver ishigh jighilii shi se palegh u nan mbagen gbeev mbu nôngon (Nenge ikyumhiange i sha 8-12) *
8. Orgban ayem ka nana nôngo gbeev yô, nan er nena?
8 Ior mba ve lu gban ayem a gôgônan ka ve ver ashe ve sha gbenda u u lu ve sha ishi la sha er vea palegh gbeev mbu nôngon yô. Nahan cii kpa, alaghga orgban ayem ugen nana wa ve agbe shin vea za hungwa nguhar shin igber. Ka vea gba kpa, ve kighir ve mough shi ve za hemen a ayem. Mba hembe veren ishima sha kwagh u a ne ve gbeev mbu nôngon la ga, kpa ka ve ver ishima sha ikighir i ayemegh kua iyua i vea zua a mi la.
9. Aluer se gba yô, ka nyi i doo u se ere?
9 Ken ayem a se lu gban ne, alaghga se nôngo gbeev acin imôngo sha kwaghôron wase shin sha ieren yase. Shi alaghga ior mba se lu gban ayem vea ve la vea er kwagh u vihin se. Kwagh a er nahan kpa i de kpiligh se iyol ga. Se cii se mba mbaasorabo, shi se cii se mba nyôngoso sha gbenda u imbishi u zan ken uma ne. Nahan ka keng ashighe agen se “kuma” ken orgen. Paulu kpa yange kaa je ér ashighe agen ‘or a er kwagh a orgen a doo nan ga.’ (Kol. 3:13) Kpa doo u se ver ishima sha kwagh u a ne se gbeev mbu nôngon la ga, se ver ishima sha iyua yase. Aluer se nôngo gbeev se gba kpa, se mough sha, se za hemen u yevese. Aluer se vihi ishima se venda u moughon yô, mayange se nyôr hen ikighir i ayemegh la ga, shi se zua a iyua la ga. Bee kera yô, alaghga se hingir kwagh u nan mbagen mba ve lu yevese sha gbenda u imbishi u zan ken uma ne gbeev mbu nôngon.
10. Se palegh u hingir “kwagh u una tagher” mbagen nena?
10 Gbenda ugen u se fatyô u palegh u hingir “kwagh u una tagher” ior mba se lu gban ayem imôngo la yô, ka u den ser anmgbianev asev ve er kwagh u a doo ve la, shighe u i gbe sha mi yô; se sendegh ser saa i er kwagh u se soo ga. (Rom. 14:13, 19-21; 1 Kor. 8:9, 13) Kwagh ne ka gbenda u vesen u se kaha a ior mba gban gesa u ayemegh kpôô kpôô yô. Ve ka ve nôngon ér vea hemba ior mbagen mbara, shi hanma or ka nan nôngon ér nana zua a iyua la sha ci u nan tseegh. Ka ve henen sha kwagh u una wase ve u hemban ayem la tseegh. Nahan alaghga vea daa mbagen sha gbenda sha, sha er vea kar vea hemen yô. Kpa se yô, se mba gban gesa ker ayol a ase ga. (Gal. 5:26; 6:4) Awashima wase yô, ka u se wase ior mba se fetyô cii sha er vea gba ayem la a za nyôr vea vese hen ikighir i i ver la shi se cii se zua a iyua i uma yô. Nahan ka se nôngo kpoghuloo ser se dondo kwaghwan u Paulu yange wa ne; a kaa ér se ‘de keren mtsera wase tseegh ga, kpa se keren mtsera u mbagenev kpaa.’—Fil. 2:4.
11. Ka nyi or u gban ayem ka nan ver ishima sha mi, man ka sha ci u nyi?
11 Ior mba gban ayem a gôgônan ka ve ver ishima sha gbenda u ve lu yevese sha mi la tseegh ga, ka ve ver ishima ve sha ikighir i ayemegh la kpaa. Ka a lu a kuma u vea nenge a ikighir i i ver la ga kpa, ve nengen a mi ken ishima er ve lu peren hwange u been la, ngohol iyua ve yô. Ka vea umbur kwagh u iyua shin injar i i ver la ken ishima yô, kwagh la a mgbegha ve u gban ayem shon sha gbashima.
12. Ka nyi Yehova a er a vese i doono?
12 Ken ayem a se lu gban ne yô, Yehova er kwagh a vese doo je gande; a tôndo zwa u nan hanmaor u nan lu gban ayem ne cii injar. Mbagen vea zua a injar i uma u tsôron sha, mbagen di vea zua injar i lun uma gbem sha won shin tar. Bibilo i tsever i pase se kwagh u iyua ne sha er se fatyô u gbidyen kwar henen er uma wase una doo hen shighe la yô. Aluer se mba umbur kwagh u ishimaverenkeghen la hanma shighe yô, mayange se nôngo gbeev se gba, maa se saa her ga.
WEA TAGHER A MBAMTAVER KPA, WA ISHIMA ZA HEMEN U YEVESE
Aluer se tagher a mbamtaver nan nan kpa, se za hemen u yevese ayem a uma ne (Nenge ikyumhiange i sha 13-20) *
13. Mlu wase hemba doon a u mbagban ayem a kpôô kpôô la nena?
13 Yange i gba u mbagban gesa u ayemegh ken Grika vea wa ishima a mbamtaver er iyolnyoon nahan, shi ashighe agen ve vôr. Yange i lu di iyolkaren kua gbong gbong ve u iyolough la tseegh a wase ve ye. Se kpa se mba er mbagban ayem mbara nahan sha ci u ka i shi tsaase se sha er se yevese ayem a se lu gban ne yô. Nahan kpa mlu wase di hemba doon a u mbagban ayem a kpôô kpôô la, sha ci u Yehova ngu suen se sha tahav nav mbu mbu lu a ikighir ga la. Aluer se suur sha Yehova yô, a tôndozwa ér una tsaase se shi una taver se kpaa!—1 Pet. 5:10.
14. Kwagh u 2 Mbakorinte 12:9, 10 a er la una wase se u wan ishima a mbamtaver nena?
14 Yange gba u Paulu una wa ishima a mbamtaver kpishi. Yange ior laha un shi tôv un a ican shi ashighe agen a vôr shi gba u una wa ishima a “asaa ken iyol” na. (2 Kor. 12:7) Nahan kpa mayange de ér akaa la a yange un u civir Yehova ga, kpa gema nenge ér ka ian i una hemba suur sha Yehova cii yô. (Ôr 2 Mbakorinte 12:9, 10.) Er Paulu nenge mbamtaver mba tagher a mi la nahan yô, Yehova wase un sha atsan a na la cii.
15. Aluer se mba dondon ikyav i Paulu la yô, ka nyi se zua a mi?
15 Se kpa alaghga a laha se shin a tôv se a ican sha ci u jighjigh wase la. Gayô adooga se mba yan ican a angev shin se ure. Nahan kpa aluer se mba dondon ikyav i Paulu la yô, hanma mtaver u se tagher a mi cii, una lu se ian i se seer suur sha Yehova, nahan zuan a iwasen na.
16. Aluer u ngu kor kor kpa ka nyi u fatyô u erene?
16 Kwaghnyoon kôr u u moughon hen gambe ga shin u ngu shin ikyekye i mbaawaneva? Anu nga nyoon we shin ashe nga ze u iyolo? Aluer kwagh ngu nahan yô, u fatyô u civir Yehova vea mba ve lu agumaior shi ve lu gbang gbang la je he? U fatyô! Mbabeenyol kua mba lun kor kor kpishi mba yevese sha gbenda u uma ne. Vea fatyô u eren tom ne sha tahav vev ga. Nahan kpa ka ve zua a agee hen Yehova sha u ungwan akaa a ken mbamkombo mba tiônnongo a i kor ken hanseeti i va ne ve ér ve ungwa yô, shin anmgbian nan va tema a ve nan sav ôron ve akaa a i hen ken mbamkombo la. Shi ka ve eren tom u geman ior hingir mbahenen la sha u pasen mbatwerev kua mba hen tsombor ve loho u dedoo.
17. Yehova nengen mba ve lu kor kor shin ve lu dedoo ga la nena?
17 Aluer u kera ngu fantyô u eren Yehova tom er u soo la ga kpa, mayange iyol i de kpen we henen wer u kera fatyô u yevese sha gbenda u uma ne ga ze. Jighjigh u u ne Yehova man tom u u er ken anyom a karen la na yô, u doo un ishima. Ka hegen je i gbe u u hemba suur sha a na ye, shi mayange una kende u ga. (Ps. 9:10) Una hemba kporom ikyua a we cii. Nenge ase kwagh u anmgbian u kwase ugen u a lu nôngon a kwaghnyoon yô, a er ne. A kaa ér: “Er zayol wam ne a lu seer a seer yô, m kera fetyô u duen za pasen kwagh hanma shighe ga. Nahan kpa m fa je mer er iniôngon yam i kera vese ga nahan kpa, ia na a saan Yehova iyol; nahan mo kpa saan mo iyol.” Zum u iyol i kpe u yô, fa wer u ngu tswen ga, Yehova ngu a we. Gbidye kwar sha ikyav i Paulu la, shi umbur mkaanem ma taver ishima ma yange ôr man, wener: “Ka i saan mo iyol shighe u m lu a agee ga . . . yô. Gadia ka shighe u m lu a agee ga la ka m gema m lu a tahav ye.”—2 Kor. 12:10.
18. Ka mtaver u nyi mbagen ve lu tagher a mi u vihin kpishi?
18 Mbagen mba ve lu yevese sha gbenda u uma ne mba tagher a mtaver ugen. Mba nôngon a akaa a zan ve iyol a ior mbagen vea fatyô u nengen shin kaven ga yô. Ikyav i tesen yô, ka ve ure tsung shin ishima i nyian ve i kar ikyaa inya. Er nan kwagh u mbacivir Yehova mba doon ishima mban ve lu tagher a mi ne i lu kwagh u ican yumu? Ka sha ci u or ka nana sombo uwegh shin nana lu shin ikyekye i mbaawanev yô, ka i lu zayol u hanma or nana fatyô u nengen nahan mhôônom ma a fatyô u kôron nan, nana wase yô. Kpa ior mba ve ure sha ci u mbamzeyol mba ken ishima shin kwagh a lu zan ve iyol ken ityo yô, alaghga ior mbagen vea fa cuku ga shi ikyav ia tese sha iyol ve ér mba yan ican kpaa ga. Kpa ican i ka ve yaan la ka i lu vough er or u nan sombo uwegh shin nguhar nahan, kpa er ior mbagen ka ve kav kwagh u a lu zan ve iyol la ga yô, ve kera er a ve sha dooshima man sha ikyo i wan ga.
19. Ka nyi se hen ken ikyav i Mefibosheti laa?
19 Aluer u ngu tagher a mbamtaver nahan kwagh la ngu yangen we u eren Yehova tom kpoghuloo er u soo la man u nenge wer mbagenev kav mlu wou la tsembelee ga yô, kwagh u Mefibosheti una fatyô u taver we ishima. (2 Sam. 4:4) Mefibosheti yange gba iwan shi Tor Davidi ungwa kwagh sha iyol na, maa er kwagh a na doo ga. Akaa ne cii er Mefibosheti kpa lu ibo na ga. Nahan kpa, ishima yange i vihi un ga; orti lu a iwuese sha akaa a dedoo a zua mi ken uma na la. Yange wuese erdoo u Davidi vande eren a na ken ayange a karen la. (2 Sam. 9:6-10) Sha nahan yô, zum u Davidi er kwagh a na dang la kpa, Mefibosheti nenge a kwagh shon vegher môm tseegh ga. Yange de ér kwagh u Davidi er a na shami ga ne a na ishima i vihi un tsung ga. Shi na Yehova ibo sha kwagh u Davidi er a na la ga. Mefibosheti yange ver ishima sha kwagh u una fatyô u eren sha u suen tor u Yehova tsua la. (2 Sam. 16:1-4; 19:24-30) Yehova na i nger ikyav i dedoo i Mefibosheti la ken Bibilo sha ci u ityesen yase.—Rom. 15:4.
20. Alaghga ishimanyian ia er a mbagen nena, nahan kpa vea fatyô u lun a vangertiôr ér nyi?
20 Anmgbianev mba nomso man mba kasev mbagen yô, ishima ka i nyian ve kpishi nahan ka i lu ve ican tsung u eren kwagh a ior imôngo. Mba fetyô u lun hen atô u ikpelaior ga, nahan kpa ka ve nôngo ve za mbamkombo mba tiônnongo kua mbamkohol mba kiriki man mba vesen. Ka i taver ve kpishi u lamen a ior mba ve vande fan ve ga yô, nahan kpa ka ve due kwaghpasen ve za lam a ior. Aluer we kpa kape i lu la yô, fa wer u ngu tswen ga cii. Mbagen kpa mba a zayol la. Umbur wer u doo Yehova ishima kpishi er u lu nôngon wer u civir un a ishima you cii nahan. Er u yen ishima ga yô, kwagh la tese ér Yehova ngu veren we doo doo shi nan we agee kpaa. * (Fil. 4:6, 7; 1 Pet. 5:7) Aluer u ngu tagher a mbamtaver kpa u za hemen u wan ishima civir Yehova her yô, u fatyô u lun a vangertiôr wer u ngu eren kwagh u doon un.
21. Ka nyi se cii se kôrcio u eren sha iwasen i Yehova?
21 Doo kpishi er ayem a Paulu yange ôr kwagh u a la a kaha a ayem a kpôô kpôô sha igbenda kpishi yô. Sha ayange a i ngeren Bibilo la yô, i lu or môm tseegh nan zua a iyua i ayem a i gbaan la ye. Nahan kpa, ayem a Mbakristu ve lu gban ne yô, hanmaor u nan we ishima nan lu zan sha gbenda u Orkristu cii nana zua a iyua i uma u tsôron. (Yoh. 3:16) Shi yange i gba u ior mba ve lu gban ayem la cii vea lu gbang gbang, ga yô vea kôrcio u hemban ayem la ga. Nahan kpa, se kpishi se mba kor kor, kpa se mba wan ishima her. (2 Kor. 4:16) Sha iwasen i Yehova yô, se cii se gba ayem ne zan zan se kar kuren!
ICAM 144 Ver Ashe sha Injar La!
^ par. 5 Nyian ne mbacivir Yehova kpishi mba tagher a mbamtaver mba iyolbeen, mbagen di mba nôngon a kwaghnyoon. Shi se cii ashighe agen ka se vôr. Sha nahan yô, ka a ter kwagh u gban ayem yô, i lu se er ka kwagh u se kôrcio ga nahan. Ngeren ne tese er se cii se fatyô u wan ishima gban ayem a uma a apostoli Paulu a er kwagh u a la shi kuren yô.
^ par. 6 Nenge ngeren u “Bibilo Gem Ior” la ken Iyoukura i Janawari 1, 2013.
^ par. 20 Wea soo u seer zuan a igbenda i nôngon a ishimanyian shi fan akaa a ior mbagen ve lu eren sha u nôngon a i yô, nenge porogeram u sha jw.org/tiv u Mei 2019 la. Za hen IJIIR I KOSON ITYAKERADA SHA INTANET > JW BROADCASTING®.
^ par. 63 NGEREN U PASEN FOTO: Anmgbian u beenyol ne duen kwaghpasen hanma shighe, nahan kwagh la wase un u lun sha gbenda u Orkristu.
^ par. 65 NGEREN U PASEN FOTO: Se fatyô u nan mbagenev gbeev mbu nôngon sha u kighir ve ér ve ma msôrom, gayô se iyol yase man ma karen ikyar inya.
^ par. 67 NGEREN U PASEN FOTO: Anmgbian ugen gba angev ngu sha iyouci, kpa a za hemen u dondon gbenda u Orkristu la sha u pasen mba ve nengen sha a na la kwagh.
