1. Er Yehova a hembe sha won cii nahan kpa, ka nyi a lehe mbagenev ér ve va ere?

YEHOVA hemba sha won cii. A gba hanma kwagh cii, shi ngu a kwaghfan man tahav gande u ôron. Yange wase Yobu kaven kwagh ne cii yô, Yobu kaa a na ér: “M fa We U fatyô u eren akaa cii, ma awashima Wou u bunden ngu ga.” (Yobu 42:2) Yehova una fatyô u eren hanma kwagh u a tsough u eren cii, a u or wasen un shio. Kpa er a lu Aôndo u dooshima yô, a lôhô mbagenev ér ve va er tom vea na imôngo sha er una kure awashima na yô.

2. Lu tom u injaa u nyi Yehova lôhô Yesu ér a ere?

² Aôndo yange gba Wan na Yesu cii ve mase gban hanma or shin hanma kwagh ugen cii ye. Been yô, a na Wan na ian ér a wase un u gban akaa agen cii. (Yohane 1:​1-3, 18) Apostoli Paulu nger kwagh sha kwagh u Yesu kaa ér: “Ka ken a Na man  i gbe akaa cii ye, a a lu Sha, man a a lu shin tar kpaa, a i nengen a mi la kua a i nengen a mi ga la kpaa, shin a lu mkônom ma torom, shin a lu tor u yan shin a lu mbatarev, shin a lu tahav. Akaa ne cii ka sha a Na i gbe a ye shi ka sha ci Na kpaa.” (Mbakolose 1:​15-17) Nahan Yehova yange na Wan na tom u injaa shi pase mbagenev kwagh sha mi. Nenge imba icivir la sha wono!

3. Yehova yange lôhô Adam ér a va er nyi, man lu sha ci u nyi?

³ Shi Yehova yange lôhô uumace ér ve va er tom vea na imôngo. Ikyav i tesen yô, yange na Adam ian i iin annyamev ati. (Genese 2:​19, 20) Mimi yô, yange a doo Adam u eren tom ne kpen kpen! Yange kenger mluashe u annyamev man ieren ve zulee, maa ii ve ati seer seer. Lu Yehova gba annyamev cii ye, nahan yange una soo yô, ma ii ve ati iyol na. Nahan kpa, a tese Adam er un soo un tsung yô, sha u nan un ian i iin annyamev ati. Shi Aôndo na Adam tom u geman tar cii hingir Paradiso. (Genese 1:​27, 28) Kpa shighe kar yô, Adam tsua ér una kera er tom vea Aôndo imôngo ga, nahan kwagh ne va un a ican i yan tsung kua ônov nav cii.​—Genese 3:​17-19, 23.

4. Mbagenev yange ve er tom vea Aôndo sha u kuren awashima na nena?

⁴ Shighe kar yô, Aôndo shi lôhô mbagenev ér ve va er tom vea na imôngo. Noa gba tso u yima un kua tsombor na shighe u mngerem ma deemee va la. Mose di yange due a ikyurior i Iserael ken tar u Igipiti kera. Yosua va hemen Mbaiserael nyôr a ve ken Tar u Ityendezwa la. Solomon maa tempel ken Yerusalem. Maria va mar Yesu. Mbananjighjigh mban cii, man mbagenev kpishi er tom vea Yehova sha u kuren awashima na.

5. Ka tom u nyi se fatyô u erene, man yange gba u Yehova una lôhô se ér se va er tom ne vea na keng-nee? (Nenge foto u a lu sha mhii u ngeren ne la.)

⁵ Nyian ne kpa, Yehova lôhô se ér se er kwagh u se fetyô la cii u suen Tartor na. Igbenda ngi kpishi i se fatyô u civir Aôndo yô. Er i lu u se cii se fatyô u civir Aôndo gbenda môm ga nahan kpa, se cii se fatyô pasen loho u dedoo u Tartor la. Yehova una soo yô, ma a er tom ne iyol na. Ma a fetyô u tilen shaala, kaan a ior shin tar jighilii ér ve civir un. Yesu yange kaa ér Yehova una fatyô u kaan a awen ér a pase mbagenev kwagh u Tor u Tartor Na. (Luka 19:​37-40) Kpa Yehova de se ér se lu “mbashirentom a na imôngo.” (1 Mbakorinte 3:9) Apostoli Paulu nger ér: ‘Er se lu mbaerentom a Na imôngo yô, se mba wan ne kwagh ser, mngohol u ne ngohol mlumun u sha mhôôn u Aôndo [la], i̱ de lu gbilinkwagh ga.’ (2 Mbakorinte 6:1) Ka kwagh u civirigh kpishi er Aôndo a lehe se ér se va er tom vea na imôngo yô. De se nenge atôakyaa agen a a ne ve, kwagh ne ka a na se msaanyol kpishi yô.

6. Waniunda u Aôndo yange pase er lu un ken ishima shighe u lu eren tom vea Ter na imôngo la nena?

⁶ Hanma shighe u mbacivir Yehova ka vea er tom vea na imôngo yô, i saan ve iyol. Cii man Waniunda u Aôndo va shin tar ne yô, a kaa ér: ‘TER lu a mo sha mhii u gbenda Na je . . . Shighe la, m lu vea Na, er or u fan tom nahan, hanma iyange m lu saan saan gbem, m lu ember sha ishigh Nagh gbem.’ (Anzaakaa 8:​22, 30) Shighe u Yesu lu eren tom vea Ter na la, saan un iyol sha ci u yange er akaa kpishi shi fa ér un doo Yehova ishima. Se di ye?

7. Tom u pasen kwagh la ka u na se msaanyol sha ci u nyi?

 ⁷ Yesu yange kaa ér shighe u se ne or kwagh shin or ne se kwagh yô, ka i saan se iyol. (Aerenakaa 20:35) Shighe u se ngohol mimi la, saan se iyol. Kpa ka se zua a msaanyol sha u pasen mbagenev mimi shon sha ci u nyi? Sha ci u ka vea kav kwagh u Bibilo i tese la, shi vea hii u lun kangenaa a Aôndo yô, ve zua a msaanyol u mimi. Ka i doo se u nengen er ve gem uma ve kua gbenda ve u henen kwagh yô. Tom u pasen kwagh la hemba kan tom u injaa man u nan or mkom ken uma cii, u se fatyô u eren yô. Tom ne ua na yô, mba ve hingir azende a Aôndo la vea zua a uma u tsôron.​—2 Mbakorinte 5:20.

8. Ka nyi mbagenev ve er sha kwagh u msaanyol u ve zough a mi sha u eren tom vea Yehova imôngo laa?

⁸ Ka sea wase mbagenev vea hen kwagh u Aôndo yô, se fa je ser se mba eren ishima i Yehova shi iniôngon i se lu nôngon ser se civir un la, gba un kwagh. Shi kwagh ne ka a na se msaanyol. (Ôr 1 Mbakorinte 15:58.) Anmgbian Marco, u a lu ken tar Italia la, kaa ér: “Saan mo iyol kpishi er m fe mer m ngu nan Yehova kwagh u hemban doon cii, u mayange una hungur a mi ga yô. Kpa a lu or yô, ma i ngôôr hungur nan ga.” Anmgbian Franco, u un kpa a eren tom ken tar u Italia la kaa ér: “Yehova ka a umbur se hanma iyange ken Mkaanem nam man sha akaa a ken jijingi a a ne se la ér, se doo un ishima shi hanma kwagh u se eren sha ci na cii gba un kwagh, shin er alaghga se hen ser iniôngon yase la gba kwagh ga nahan kpaa. Ka nahan ve u eren tom vea Aôndo la a nem msaanyol shi uma wam a hembe doon ye.”

9. Ka ikyar i nyi Yehova man Yesu yange ve ya, man lu sha ci u nyi?

⁹ Ka sea eren tom vea mba ve doo se ishima la imôngo yô, se hingir kangenaa a ve. Ka se seer fan anza man aeren  a ve. Shi ka se fa akaa a ve we ishima u eren la, man er ve lu nôngon ér vea er a la kpaa. Alaghga tsô Yesu yange er tom vea Yehova anyom ubiliôn imôngo. Yange ve doo ayol a ve tsung je yô, lu u kwagh môm una fatyô u paven ve ga. Yesu yange pase er ve lu kangenaa yô, a kaa ér: “Mo a Ter ka kwagh môm.” (Yohane 10:30) Yange ve lu ken mzough sha mimi, shi ve eren hanma kwagh cii ken ijoughave.

10. Tom u pasen kwagh la ka u na se seer kporom ikyua a Aôndo man mbagenev sha ci u nyi?

¹⁰ Yesu yange sôn Yehova ér a kura mbahenen nav. Sha ci u nyi? A er msen ér: “Sha u ve̱ lu kwagh môm er se nahan.” (Yohane 17:11) Ka sea kuran atindi a Aôndo shi sea eren tom u pasen kwagh la yô, se hemba fan aeren a Aôndo a doon tsung la. Ka se hen er i hii ve i doo u se suur sha a na shi se dondo kwagh u a tese se la yô. Shi ka sea kporom ikyua a Aôndo yô, un kpa a kporom ikyua a vese. (Ôr Yakobu 4:8.) Heela tseegh ga, er se lu tagher a mbamzeyol imôngo shi se lu zuan a msaanyol imôngo shi akaa a se we ishima u eren la kpa, a lu kwagh môm yô, kwagh ne na se kporom ikyua a anmgbianev asev mba nomso man mba kasev. Ka se er tom imôngo shi se ember imôngo shi se ya ican imôngo. Anmgbian u kwase Octavia, u a lu ken tar u Britain la kaa ér: “Er m lu eren tom vea Yehova imôngo yô, kwagh ne na m hemba kporom ikyua a mbagenev.” A pase ér kwagh ngu nahan sha ci u un kôr azende a ior mba ve lu a “awashima môm shi ve dondon ityesen i môm yô.” Se kpa ka mnenge u se lu a mi vough je la. Ka sea nenge er anmgbianev asev ve lu nôngon ér vea er ishima i Yehova yô, kwagh ne a na se seer kporom ikyua a ve.

11. Se va hemba kporom ikyua a Yehova man anmgbianev asev ken tar u he la sha ci u nyi?

¹¹ Aôndo man anmgbianev asev doo se ishima hegen tsung, kpa ken tar u he la, vea hemba doon se ishima cii. Gbidye ase kwar sha tom u doon tsung, u se va er ken hemen la! Se lu va keghen mba a nder ve shin ku la gbenda, shi se tese ve kwagh u Yehova kpaa. Shi se er tom u geman tar cii hingir paradiso la. A saan se iyol tsung u eren tom imôngo, nahan kure kure tsô se hingir vough sha hemen u Kristu la. Uumace cii vea seer lun kangenaa shi vea hemba kporom ikyua a Yehova, u una na “hanma kwagh u uma sha isharen na, [a kuma] un” la.​—Pasalmi 145:16.

12. Tom u pasen kwagh ngu kor se nena?

¹² Gba u se kura ikyar i se ye a Yehova la. Er se lu ken tar u Satan shi se yen yô, ka lun ican u hiin henen kwagh shi eren kwagh er mba ken tar nahan ga. Kwagh ne ngu inja er u ngu ôôn uwe shin ifi, maa yuhwa  tôô u ngi kuan a we yemen a mi ape u soo ga nahan. A gba u u ôô uwe sha afatyô wou cii, sha er u yem vegher u u soo la yô. Se kpa kape i gbe u se nôngo kwagh kpoghuloo sha u se palegh ieren i tar u Satan ne je la. Nahan kwaghpasen kor se nena? Ka sea ôron kwagh u Yehova man Bibilo yô, se hemba veren ishima yase sha akaa a a lu a injaa man a doon la, i lu sha akaa a a na jighjigh wase una vôr la ga. (Mbafilipi 4:8) Kwaghpasen ngu a taver jighjigh wase sha ci u ngu a umbur se kwagh u uityendezwa mba Aôndo man atindi a a we se u tesen ér se doo un ishima la. Shi ngu u wase se se za hemen u lun a aeren a i gbe u se lu a mi ve se kura ayol ase sha ikyev i Satan man tar na la.​—Ôr Mbaefese 6:​14-17.

13. Orshiada ugen ken tar u Australia nenge tom u pasen kwagh la nena?

¹³ Ka sea uve ityough ken tom u pasen kwagh shi sea henen kwagh shi sea eren akaa sha ci u mbagenev ken tiônnongo yô, kwagh la a kura se sha ci u se kera lu a shighe u henen sha mbamzeyol asev kpishi ga. Orgen u a lu ken tar u Australia, i yer iti na ér Joel yô, kaa ér: “Tom u pasen kwagh la ka u wasem m hungur a kwagh u a lu zan hemen la ga. Ka u umbur mo mbamtaver mba ior ve lu tagher a mi la, kua mbamtsera mba m zough a mi sha u dondon akaawan a Bibilo ken uma wam la. Tom u pasen kwagh ne ka u wasem u hiden a iyol ijime, shi u wasem u suur sha Yehova kua anmgbianev av mba nomso man mba kasev.”

14. Tom u kwaghpasen u se eren kpoghuloo la tese ér jijingi u Aôndo ngu a vese sha ci u nyi?

¹⁴ Shi kwaghpasen ka a na se hemba lun a vangertiôr ser jijingi u Aôndo ngu a vese. Ikyav i tesen yô: Tôô ase wer i na u tom u karen ior mba hen ijiir you bredi. Man mba kimbin we sha tom ne ga, shi gba u u vihin inyaregh you u eren u. Shi ior kpishi soo bredi ne ga, mbagenev je yô, kôr u ihyom sha bredi u u karen la. Nahan u fatyô u zan hemen a imba tom la kpa? Ica a gba je iyol a kpe u, shi alaghga tsô u de u. Nahan kpa, se kpishi se za hemen u pasen kwagh anyom anyom shin er tom ne ka u tôô se shighe shi se vihi inyaregh shi ior ve se se shin ve vihi ishima a vese nahan kpaa. Kwagh ne tese wang ér jijingi u Aôndo ngu wasen se.

15. Tom u pasen loho u dedoo la gba zua a kwagh u Aôndo a we ishima u eren sha ci u uumace la nena?

¹⁵ Tom u kwaghpasen la gba zua a kwagh u Yehova a we ishima u eren sha ci u uumace la nena? Yehova yange wa ishima ér uumace ve lu uma gbem sha won, nahan shighe u Adam er isholibo la je kpa, awashima na ne gema ga. (Yesaia 55:11) Aôndo er kwagh u yiman se sha ikyev i isholibo man ku. Nena yô? Yesu yange va shin tar ne va  na naagh sha uma na. Kpa cii man uumace ve zua a mtsera sha naagh ku shon yô, gba u vea ungwan imo i Aôndo. Nahan Yesu tese ior kwagh u Aôndo a soo ér ve er yô, shi wa mbahenen nav kwagh er ve kpa ve er nahan. Ka sea pase ior kwagh shi sea wase ve vea hingir azende a Aôndo yô, se mba eren tom vea Aôndo jighilii u kuren kwagh u a er, u yiman uumace sha ikyev i isholibo man ku, sha u tesen ve dooshima la.

16. Tom wase u pasen kwagh la gba zua a atindi a Aôndo a vesen la nena?

¹⁶ Ka sea wase mbagenev vea fa gbenda u uma u tsôron yô, se tese ve ser ve doo se ishima kua Yehova, u i “sar Un u ior cii ve̱ war ve̱ ar sha mfe u fan mimi la.” (1 Timoteu 2:4) Shighe u Orfarishi ugen pine Yesu tindi u a lu u tamen yô, Yesu kaa ér: “Ter Aôndo wou A̱ doo u ishima a ishima you cii man a uma wou cii man a mfe wou cii. Ngun ka tindi u tamen man ka u hiihii kpaa. Man u sha uhar u a lu er un yô, or u nan we ndor a we yô, nana̱ doo u ishima er we iyol you nahan.” (Mateu 22:​37-39) Aluer se mba pasen loho u dedoo yô, se mba dondon atindi ne.​—Ôr Aerenakaa 10:42.

17. U nenge ian i civirigh i pasen loho u dedoo la nena?

¹⁷ Sha mimi yô i ver se! Yehova na se tom u van se a msaanyol shi wasen se u kporom ikyua a na man anmgbianev asev shi kuran ikyar i se ye a na la. Shi u bugh se ian i tesen ser Aôndo man mbagenev doo se ishima. Yehova ngu a mbacivir un udubu imôngo sha tar cii, shi ve cii mba tagher a mbamlu kposo kposo. Sea lu agumaior shin sea bee iyol, shin sea lu a kwagh ave shin sea lu a mi ga, gayô sea lu gbang gbang shin sea lu ga kpa, ka se nôngo sha afatyô wase cii sha u pasen mbagenev akaa a se ne jighjigh a mi la. Ka i lu se ken ishima er Chantel u a lu ken tar u France la nahan, a kaa ér: “Or u hemban sha won cii, u a gbe akaa cii, shi a lu Aôndo u sar sar la, ngu kaan a mo ér: ‘Za! Za ôr kwagh sha ci wam, ôr kwagh a ishima i môm. M na u tahav shi m na u mkaanem av shi usha cii mba suen we kua azende a ou a shin tar cii, shi mba nan we ityesen seer a seer shi wan we kwagh sha shighe vough.’ Se mba a ian i civirigh kpishi i eren kwagh u Yehova a kaa ér se er la, shi eren tom vea Aôndo wase imôngo!”