EEN, Ashighe agen yange a wase ve. Nenge ase ikyav i môm. Duteronomi 24:14, 15 kaa ér: “Ortom u sha tôndo u a lu icanor, or u i ban ave yô, de eren nan ican ga, shin nana lu or u ken anmgbianev ou, shin nana lu or u ken ushirmbaiorov mba ken tar wou mba ve nyer u a nyôr la kpaa. . . . Sha er nana̱ de vaan ieren you a TER, i̱ hingir isholibo hen we ga.”

I zua a ngeren u orgen nger sha u zamber sha ikyaa ne yô, ken derianyom u sha utaankaruhar C. S. Y (cii man shighe u Yesu) la, kyua a geri u Ashdod. Alaghga tsô lu sha ci u orsule ugen u i kaa ér a kimbi samuyia u i gba zwa môm sha mi ga la, i nger mkaanem man ye. Ngeren u i nger sha vegher ityegh ne, kaa ér: “Yange kpan wou [oryilan ijir la] kohol yiav been kera, ayange nga kar kpuaa yô, Hoshayahu wan u Shobay va tôô kpan wou ikyondo.  . . . Mba yange se lu kohol iyiav imôngo ken oo ibugh ibugh la, vea erem shiada ér . . . kwagh u m er la ka u mimi. M er kwaghbo môm tsô kpaa ga. . . . Aluer gomna nenge ér ka tom na u ngohol ikyondo i kpan na, nan un ga kpa, kunya u kôr un a gba eren nahan tsô! De gbe ungwan ato ving shighe u kpan wou a lu a ikyondo na ga la ze.”

Ormen sha akaa a mbayiase u i yer un ér, Simon Schama la, ôr kwagh u zamber ne kaa ér: “Kwagh ne ôr se kwagh hemba di kwagh u ortom u sha tôndo la, zamber ér i hide un a [ikyondo na] la ken inya, kwagh ne shi tese wang ér ortom la fa kwagh u tindi u Bibilo, u a kaa ér i de nzughul a mbaatsanev ga la, hemban je yô, u i nger ken Levitiku man Duteronomi la.”