“SUNDA yô, ngee, kpa mbatomov yô, gema mba ciôn tsô; nahan yô, sôn nen Ter u sunda A̱ tindi mbatomov ken sunda Na.” (Luka 10:2) Mkaanem ma Yesu yange ôr anyom a kar hegen i kom 2,000 ne zua sha kwagh u ken tar u Myanmar nyian vough. Sha ci u nyi? Mbapasenkwagh mba ken tar u Myanmar 4,200 tseegh, man mba pasen loho u dedoo hen atô u iorov mba kuman er miliôn 55 nahan ken tar la.

Nahan kpa, Yehova u a lu “Ter u sunda” la mgbegha asema a anmgbianev mba nomso man mba kasev uderi imôngo ken ityar kposo kposo, ve mough ve yem ken tar u u lu ken Veghertar u Ashia ne, sha er vea za wase tom sunda u ken jijingi ne yô. Hii nan ve undu ityar ve, ve yem ken tar laa? Yange i wase ve u moughon yemen ken tar shon nena? Man ka averen a nyi ve lu zuan a mi? De se nenge.

Anyom a karen ken ijime la, pania ugen ken tar u Japan u i yer iti na ér Kazuhiro yô, gba ikyungu maa hume, nahan i yem a na ken iyouci. Ortwer za kaa a na ér a de kera nahan mato ga anyom ahar. Kwagh ne kunda Kazuhiro iyol kpen kpen. A kaa ken ishima ér, ‘Ngun nahan me er nena ve shi me er tom pania, u u doom ishima yum nee?’ A er msen sha kwagh ne kpoghuloo, ér Yehova a wase un sha er una za hemen u eren pania yô.

Kazuhiro kaa ér: “Uwer môm ngu kar yô, huror wam ugen u lu eren tom u pasen kwagh ken tar u Myanmar yô, ungwa zayol wam ne. Nahan a yilam a kaa a mo ér: ‘Ken tar u Myanmar ape m lu ne yô, ka bôôsu i hembe nyôron ye. Aluer u va heen yô, u fatyô u zan hemen a kwaghpasen, saa u lu a mato wou keng ga!’ Nahan m pine ortwer wam, aluer ka u me fatyô u moughon yemen ken Myanmar kpa kwagh a za iyol ga yô. Kwagh gema er kpiligh iyol yô, ortwer maa ka a mo ér: ‘Ortwer ugen ken tar u Myanmar, u a ser ikungugh yô ngu van nyian. Me ôr un kwagh wou. Nahan aluer u yem keela, man angev mbun shi mbu za kende u yô, una nenge sha a we tsembelee.’ Kwagh u ortwer wam ôrom ne lum vough er ka Yehova je a ongo msen wam nahan.”

Kazuhiro maa kera timbir ga je tindi afishi a branci a ken tar u Myanmar a loho. A pase er i sar un vea kwase na tsung u za eren pania ken tar la yô. Ayange kar ataan tseegh maa afishi a branci hide nger un. A kaa a na ér: “Va, kwagh gba se a upania!” Maa Kazuhiro vea kwase na Mari tee umato vev; ve za er ityakerada i zan ken tar la shi ve yam utikeeti mba nyôron igirgi. Nyian ne, mba pasen kwagh saan saan vea annongo u eren mkombo  ken iliam i sha ave, hen geri u Mandalay. Kazuhiro kaa ér: “Kwagh ne na yô, se nenge ser jighjigh u se ne ityendezwa i Aôndo a er a vese ken Pasalmi 37:5 la seer taver. Ijiir la kaa ér: ‘Wa TER gbenda wou sha ikev, suur sha a Na, Una er sha mi vough.’ ”

Ken inyom i 2014 la, Mbashiada mba Yehova mba ken tar u Myanmar zua a ian i civirigh i eren mkohol u vesen ugen ken tar ve. Anmgbianev mba ken ityar igen kpa za mkohol ne. Môm ken ve yô lu anmgbian u kwase ugen ken tar u Amerika, iti na ér Monique, u lu anyom 34 yô. A kaa ér: “Yange m hidi mkohol la yô, m er msen m sôn Yehova mer a wasem me fa kwagh ugen u me er ken uma wam yô. Shi m lam a mbamaren av sha akaa a m soo u eren ken mcivir u Yehova yô. Nahan ve kure ikyaa ér m hide m yem ken tar u Myanmar. Kpa shighe kar shi m er msen kpoghuloo cii ve ian va mase bughun i me er kwagh ne ye.” Monique pase er hii ve lu nahan yô.

A kaa ér: “Yesu yange taver mbadondon un ishima ér ve ‘vande ôron inyaregh.’ Nahan m ôr ken ishima mer: ‘Me zua a inyaregh ki moughon yemen ken tar la je kpa? Aluer m za ngu keela man ka u me kera vihi shighe kpishi u eren tom uke ga nahan, me fatyô u koson iyol yam je he?’ ” Shi a kaa ér: “Yange ngôôr ga je maa m kav er inyaregh yagh ki kuma u yemen ken tar la ga yô.” Nahan yange er nena ve fatyô u yemen?—Luka 14:28.

Monique ôr nahan ér: “Iyange igen la, kwase u lu orvesen hen ijiirtom yam la yilam ér m va. Ishima maa gba tan mo kwe, m gba henen mer a dem tom. Kpa m ze yô, a gema a wuese mo kpishi er m lu eren tom sha inja yô. A kaa a mo ér un soo ér i nam iyua i inyar, man lu iyenge inyar i kwagh gbam a mi vough je la!”

Monique yange yem ken Myanmar ken uwer u Disemba inyom i 2014. A yem ngu za pasen kwagh ken tar la nahan, ka un nena? A kaa ér: “Saan mo iyol hen ijiir ne. M ngu henen Bibilo a iorov utar hegen. Kwase ugen u m henen Bibilo a na yô, ngu anyom 67. Ka mea za hen ya ne je a se teghelee shi a kuvem. Yange m tesen un mer iti i Aôndo ér Yehova yô, doo un je a vaa. A kaa ér: ‘Ka hiin yam u ungwan mer iti i Aôndo ka Yehova je ne. M ngu tamen a we ica je, kpa u tesem kwagh u injaa kpishi u a tse nan nan kpa ma m fetyô u fan ga yô.’ Mo kpa yange m haa mliam ashe. Ambaakaa ne nahan na yô, tom u eren hen ijiir i kwagh a hembe gban sha mbapasenkwagh ne ka kwagh u nan or msaanyol kpishi je.” Semberee ne, Monique zua a ian i zan Makeranta u Mbapasen Ivangeli i Tartor.

Kwagh ugen u yange mgbegha ior u yemen ken tar la yô, ka ibaver i tar la i yange i gber ken takerada u Yearbook u inyom i 2013 la. Anmgbian u kwase ugen yange lu ken Veghertar u Asia keela, iti na ér Li; un di hemba anyom 30 kpuaa. Yange eren tom pepe zan zan aikighe hen ijiirtom na; kpa va er ibaver i ken Yearbook la yô, gba henen sha kwagh u yemen za pasen kwagh ken tar u Myanmar. A kaa ér: “Shighe u m za mkohol u vesen ugen ken geri u Yangon ken inyom i 2014 la, m zua a orgen vea kwase na mba ve lu za eren tom ape kwagh a hembe gban sha mbapasenkwagh ken tar u Myanmar ken annongo u eren mkombo ken zwa Chinese yô. Er m fa zwa Chinese yô, m tsua mer me yem ken Myanmar me za sue annongo u ken zwa Chinese la. M mough vea Monique maa se yem ken geri u Mandalay. Yehova yange ver se kpen kpen; se zua a tom u se eren ahwa kpuaa yô. Se cii i tôô se tica hen makeranta môm, shi se zua a ijiir i tsan ikyua ikyua her. Er ka i tsee iyol shi mbamtaver mbagenev ve lu nahan kpa, saan mo iyol hen ijiir ne. Ior i Myanmar ka ior mba ve eren kwagh ken uma akuma akuma yô, shi ka ve lam a ior kundu kundu shi ve soo u keghen ato a loho u dedoo kpaa. Ka kwagh u saan mo iyol kpishi u nengen er Yehova a lu yevese a tom u sunda ne yô. M ngu a vangertiôr je mer, ka ishima i Yehova u mo va lun hen Mandalay heen.”

Mbashiada mba ve yem ve lu za eren tom sha ajiir a kwagh a hembe gban sha mbapasenkwagh la kpishi nenge er msen a lu a tahav yô. Nenge ase ikyav sha kwagh u Jumpei u a lu anyom 37, kwase na Nao, di a lu a anyom  35 la. Yange ve lu ken tiônnongo u eren mkombo ken iliam i sha ave ken tar u Japan. Er nan ve yange ve mough ve yem ken tar u Myanmar? Jumpei kaa ér: “Mo vea kwase wam yange se vande lun a awashima u yemen ken tar ugen ape kwagh a hembe gban sha mbapasenkwagh yô. Anmgbian ugen u ken tiônnongo wase u eren mkombo ken iliam i sha ave ken tar u Japan yange mough yem ken Myanmar. Er se koso di inyaregh kpuaa tseegh nahan kpa, ken uwer u Mei inyom i 2010 la, se kpa se mough se yem. Yange anmgbianev mba nomso man mba kasev mba ken Myanmar ngohol se sar sar!” Kpa Jumpei nenge kwagh u za wasen ken Myanmar la nena? A kaa ér: “Ior ka ve soo u keghen ato kpen kpen. Ka sea tese mbaakondoato uvidio mba ken iliam i sha ave la yô, i kpiligh ve iyol. Saan se iyol kpishi er yange se tsua u va eren Yehova tom heen yô!”

Nahan Jumpei vea Nao nenge sha mbamgbe vev mba sha inyar nena? Jumpei kaa wener: “Anyom yange nga kar atar yô, inyaregh ki se koso la cii bee shi se kera lu a inyaregh kuma ki se kimbi haya ken inyom i dondon la ga. Mo vea kwase wam se er mbamsen kpoghuloo. Maa Afishi a Branci va tindi se a washika ér se er tom u ikpur pania sha anshighe kpuaa, man cuku kpa se lu veren ashe a imba kwagh ne ga! Yange se suur sha Yehova shi se nenge er kende se ga yô. A nenge sha ugbayol asev cii.” Semberee ne, Jumpei vea Nao kpa za Makeranta u Mbapasen Ivangeli i Tartor la.

Anmgbian ugen u a lu marnya u tar u Italy yô, iti na ér Simone, ngu anyom 43, kwase na Anna u a lu marnya u tar u New Zealand la di ngu anyom 37. Ka nyi yange i mgbegha ve u yemen ken tar u Myanmar? Anna kaa ér: “Ka ibaver i sha kwagh u Myanmar i ken Yearbook u inyom i 2013 la!” Simone kaa ér: “Kam kwagh u icivirigh kpishi u van ken Myanmar. Uma ngu guda heen, shi me fatyô u hemban nan shighe wam sha tom u Yehova. Doom kpishi u nengen er Yehova a nengen sha a vese er se lu hen ijiir i kwagh a hembe gban sha mbapasenkwagh ne yô.” (Ps. 121:5) Anna shi kaa ér: “Hemba saan mo iyol hegen. Se kera wa akaa ave ken uma kumba kumba ga. Mo man nomom se mba hembe lun imôngo, shi se hemba mban kôôsôô. Se zua a azende a he kpishi a injaa. Ior mba hen ijiir ne mba nyaghen shin mba tswamen Mbashiada ga, shi gbenda u ka ve kegh ato la ka u kpiligh iyol!” Sha nena yôô?

Anna kaa ér: “Iyange igen la m pase wankwase ugen u a ze yunivasiti yô kwagh ken kasua, maa m sôr ian i hiden za sôron un. M ze yô, a va a ijende na igen kpaa. Ka hulugh kwagen yô, shi a va a azende agen seer. Shighe karen yô, shi va a ve hemba er ve vande lun la. Hegen ne, m ngu henen kwagh a ve utaan.” Simone kaa ér: “Ior mba hen haregh ne ka ve lu a ior sar sar, shi ka i sar ve u fan kwagh u u lu ôron ior la. Ve kpishi mba a isharen. Ka shighe tsô se zough a mi u henen kwagh a ve cii ga ye.”

Kpa aluer or tsua u yemen ken tar u Myanmar yô, ka akaa a nyi nahan nana fatyô u eren cii ve nana mase yemene? Anmgbian u kwase Mizuho, u a lu marnya u tar u Japan yô, kaa ér: “Mo vea orya wam Sachio yange se soo u za pasen kwagh ken tar u kwagh a hembe gban sha mbapasenkwagh yô. Kpa se fa ape se za jighilii ga. Kpa se mba ôron akaa a ken tar u Myanmar ken Yearbook u inyom i 2013 la yô, kwagh la kôr se ken ishima  tsung. Maa se hii u gbidyen kwar, aluer ka u se fatyô u za pasen kwagh ken tar la yô.” Sachio di kaa ér: “Yange se za ken Yangon, geri u vesen u tar u Myanmar la, se zende ker kasua môm se nenge er haregh shon a lu yô. Zende u se za kpa se ngôôr ga ne wase se u fan je ér, se fatyô u za lun hen ijiir ne.”

Anmgbian Rodney ka marnya u tar u Australia; un vea kwase na Jane cii ve hemba anyom 50. Yange ve yem ape kwagh a hembe gban sha mbapasenkwagh yô, ken tar u Myanmar ken inyom i 2010 la, vea wan ve u nomso Jordan man u kwase Danica. Rodney kaa ér; “Ka i doo se u nengen er ka i sagher ior mban iyol u henen kwagh u Aôndo yô. M ngu taver icombor igen kpa ishima mer ve za pase kwagh hen ijiir i lun er Myanmar nahan.” Sha ci u nyi? A kaa ér: “Mve wase heen ne na yô, se seer kporom ikyua a Yehova cii! Agumaior kpishi kwagh u hanseeti man mato man tom u uke man akaa agen ya ve ishima, mba kera lu a shighe ga. Kpa mbayev asev yô, ve uve ityough u henen asember a he sha er vea lam a ior shighe u ve dugh kwaghpasen yô. Ka ve hen er vea lam a ior mba ve fe kwagh u Bibilo tsembelee ga la, shi ve hen er vea na ikyar ken mkombo ken zwa la yô. Shi ve na ishima ve u eren akaa agen ken jijingi kpishi a nan ve msaanyol.”

Anmgbian ugen ken tar u Amerika ngu anyom 37, iti na ér Oliver. A pase er i hii ve una fatyô u kaan ér tom ne doo u orgen kpa nana fatyô u eren yô, ér: “Er m undu ijiir yam, m lu va eren Yehova tom ape uma u her a kaha a u hen ijiir yam yô, m zua a averen kpishi. Er m kera lu hen ya wam ga yô, m seer suur sha Yehova shi ka m ver ishima yam sha a na ken nyityôkwagh i m nyer ker cii. M ngu eren tom imôngo vea ior mba m vande fan ve ga, kpa se cii akaa a se ne jighjigh a mi la a lu kwagh môm yô. Kwagh la wasem u nengen er i lu ken nongo u Yehova tseegh kwagh a fatyô u lun nahan yô.” Oliver vea kwase na Anna, mba pasen kwagh kpoghuloo hen haregh u i lamen zwa Chinese her yô, zan zan nyian.

Anmgbian u kwase ugen ken tar u Australia, u a hembe anyom 50 yô, mba yer iti na ér Trazel, un yange yem ken tar u Myanmar ken inyom i 2004 la. A kaa ér: “M ngu taver mba vea fatyô u za pasen kwagh ape gen la cii ishima mer, ve za er tom ape kwagh a hembe gban sha mbapasenkwagh yô. M nenge yô, ka wea soo u eren Yehova tom yô, Yehova a ver iniôngon you. Cuku kpa yange m tsa m hen mer me lu nahan ga. Ka uma u hemban doon man u saan mo iyol je ne.”

Akaa a mba ve lu za pasen kwagh ape kwagh a hembe gban sha mbapasenkwagh ken tar u Myanmar ve ôr ne, a mgbegha u u wasen mbaasemaamimi hen haregh u i lu a pase kwagh her ga yô. Jighilii yô, anmgbianev mba ve lu za pasen kwagh ape kwagh a hembe gban sha mbapasenkwagh la mba zamber ér, “Shi per va yande Myanmar keen, va wase se!”