NGEREN U TIMEN SHA MI 20
ICAM 67 Pasen Kwagh
Dooshima a Za Hemen u Mgbeghan We u Pasen Kwagh!
“A vande pasen loho u dedoo hen akuraior cii.”—MARKU 13:10.
KWAGH U SE LU HENEN YÔ
Ken ngeren ne, se lu nengen er dooshima ka a wase se u lun a gbashima shi a mgbegha se u pasen kwagh a ishima yase cii yô.
1. Ka nyi yange se hen ken mkombo u sha inyom u 2023 laa?
KEN mkombo u sha inyom u 2023 la, a yange i seer tan iwanger sha akaa agen a se ne jighjigh a mi yô, shi i ôr se akaa a doon sha kwagh u tom wase u pasen kwagh la kpaa. Ikyav i tesen yô, yange i pase se ér shighe u a va tim Zegebabilon kera la je kpa, alaghga ior mbagenev vea zua a ian i kohol vea ior mba Yehova. Shi i kaa ér hii ken uwer u Novemba inyom i 2023 la je, mbapasenkwagh u Tartor vea de u nan ripoti sha hanma kwagh u ve er ken tom u pasen kwagh la. Nahan kwagh ne tese ér tom u pasen kwagh ne kera ngu a inja yum ga, shin kera ngu torough torough gaa? Eihe!
2. Tom wase u pasen kwagh ne ngu hemban lun torough torough hanma iyange sha ci u nyi? (Marku 13:10)
2 Hanma iyange yô, ka i hemba gban u se er tom u pasen kwagh ne torough torough. Sha ci u nyi? Sha ci u shighe kera shi vese ga. Nenge ase kwagh u yange Yesu tsenga ôron sha kwagh u tom u pasen kwagh ken ayange a masejime ne yô. (Ôr Marku 13:10.) Sha kwagh u takeda u Mateu u ôr yô, Yesu yange kaa ér a pase loho u dedoo u Tartor ne a tser tar cii ve “mkur” una va ye. (Mat. 24:14) Kwagh la tese ér ka u a va tim tar u ifer u Satan ne kera vindi vindi. Yehova ver ‘iyange man ihwa’ i ica a gba ga tsô, akaa ne aa er yô. (Mat. 24:36; 25:13; Aer. 1:7) Hanma iyange i sev mbu av yô, ka se hemba mgbôghom a iyange la cii. (Rom. 13:11) Nahan gba u se za hemen u pasen kwagh zan zan mkur una kar van.
3. Ka nyi ka i mgbegha se u pasen kwagha?
3 Mpin u vesen u i gbe u se cii se hen sha mi yô ka un ne: Se mba pasen loho u dedoo sha ci u nyi? U ôron zevera yô, ka dooshima ka a mgbegha se u pasen ior kwagh ye. Ka sea pasen kwagh yô, kwagh la a tese ér loho u se pasen la doo se ishima, shi ior doo se ishima, man u hemban cii yô, Yehova man iti na doo se ishima. De se time nen sha akaa ne môm môm.
SE MBA PASEN KWAGH SHA CI U LOHO U DEDOO DOO SE ISHIMA
4. Ka sea ungwa loho u dedoo nahan i lu se nena?
4 U umbur er yange lu u ken ishima shighe u u ungwa ma loho u doon we kpa? Alaghga yange i mar wan hen tsombor wou shin u zua a tom u u lu keren yô. Ka keng yange a saan we iyol u ôron mba hen tsombor wou kua azende a ou kwagh u dedoo u er u la. Nahan loho u dedoo u sha kwagh u Tartor u Aôndo, u u lu loho u hemban doon cii la kpa, kape yange u ungwa u ve lu u ken ishima vough laa?
5. Yange u hen mimi u ken Mkaanem ma Aôndo la nahan lu u nena? (Shi nenge ufoto kpaa.)
5 Hide hen er yange lu u ken ishima shighe u u hii fan mimi u ken Mkaanem ma Aôndo la yô. Yange u hen u fa er u doo Teru u sha la ishima, shi a soo ér we u lu ken tsombor u mbacivir un, man er a tende zwa u va karen a mnyoon man ican i yan kera yô. Shi u fa er a va nder ior ou mba ve kpe la, vea hide a lu uma ken tar u he la nahan u nenge a ve yô, man akaa agen kpaa. (Mar. 10:29, 30; Yoh. 5:28, 29; Rom. 8:38, 39; Mpa. 21:3, 4) Akaa a yange u hen ne doo u kpishi. (Luka 24:32) Er akaa a u lu henen la doo u yô, u soo u ôron hanma or kwagh u a!—Nenge Yeremia 20:9.
Yange se mba va fe mimi u Bibilo la yô, saan se iyol nahan se soo ser se ôr hanma or nana ungwa! (Nenge ikyumhiange i sha 5)
6. Ka nyi u hen ken kwagh u Ernest man Rose laa?
6 Nenge ikyav i anmgbian ugen, iti na ér Ernest. b Yange lu anyom pue maa ter na saa ku. Ernest kaa ér: “Yange m pine mer: ‘A yem shaa? Una tsa a hide jee?’ Yange mea nenge a mbayev mba ve lu a uter nahan i sarem er ma i lu mo yô.” Hanma shighe yô, Ernest yange a za hen uwar u ter na a za er msen, a kaa ér: “Aôndo, wea lumun yô, tesem henpe terem a lu yô.” Ter u Ernest yange kpen anyom nga kar 17 nahan yô, i kaa ér a hen Bibilo a na, nahan a lumun ér i hen kwagh a na. Yange doo un kpishi er va fa ér mbakpenev fa kwagh môm ga, kpa mba yaven mem mem, man er Bibilo i kaa ér a va nder ve shin ku yô. (Orpa. 9:5, 10; Aer. 24:15) Yange mase va zuan a mbamlumun sha akaa a yange tsume un ica i gba kpishi la! Yange saan Ernest iyol kpishi sha akaa a lu henen ken Bibilo la. Kwase na Rose kpa yange kohol un hen Bibilo, nahan un kpa kwagh u lu henen la doo un. Nahan i er ve batisema ken inyom i 1978 la. Yange saan ve iyol u pasen tsombor ve, man azende a ve kua mbagenev mba ve lumun u keghen ato a ve la cii akaainjaa a ve hen la. Kwagh la na yô, Ernest man Rose wase iorov mba hemban er 70 nahan u fan Yehova shi eren batisema.
7. Mimi u ken Bibilo la ka una doo se ishima yô, se er nena? (Luka 6:45)
7 Akaa a se hen ken Bibilo la ka aa doo se ishima yô, se nenge ser gba u se ôr hanma or kwagh u a. (Ôr Luka 6:45.) Se kpa, ka i lu se ken ishima er lu mbahenen mba Yesu mba sha ayange a mbaapostoli la nahan. Yange ve kaa ér: “Se fatyô u den u ôron akaa a se ongo man a se nenge la ga.” (Aer. 4:20) Mimi ne doo se ishima je yô, se soo u pasen ior kpishi mimi ne er se fetyô la.
SE MBA PASEN KWAGH SHA CI U IOR DOO SE ISHIMA
8. Ka nyi ka i mgbegha se u pasen mbagenev loho u dedoo? (Nenge ngeren u kiriki u a lu a itinekwagh ér: “ Ior Ve Doo U Ishima—Tesen Ve” la.) (Shi nenge foto kpaa.)
8 Ior doo se ishima vough er Yehova man Wan na kpa ior ve doo ve ishima nahan. (Anz. 8:31; Yoh. 3:16) Mhôônom ka ma kôr se tsung a mba ve ‘lu a Aôndo ga,’ shi ve “lu a ishimaverenkeghen kpaa ga” la. (Ef. 2:12) Mbamzeyol mba ve lu tagher a mi la na yô, ka inja er mba shin ihyungwa i i ze kweng nahan, man se gema se mba a kor u dughun ve shin ihyungwa shon kera; ka u pasen ve loho u dedoo u Tartor u Aôndo je la. Er ve doo se ishima shi mhôônom ma ker se a ve yô, se soo ser se nôngo kpoghuloo se pase ve loho u dedoo. Ka vea ungwa loho ne yô, kwagh la a na ve ishimaverenkeghen shi a na i saan ve iyol hegen je kpaa, shi a bugh ve gbenda u va zuan a uma u tsôron “u a lu uma jim jim la” ken tar u he u Aôndo a tende zwa u van a mi la.—1 Tim. 6:19.
Er ior ve doo se ishima shi mhôônom ma ker se a ve yô, ka se nôngo sha afatyô wase cii se pase ve loho u dedoo (Nenge ikyumhiange i sha 8)
9. Ka icintan i nyi se lu tan ior sha kwagh u ken hemen, man ka sha ci u nyi? (Esekiel 33:7, 8)
9 Shi er ior ve doo se ishima yô, kwagh la ka a mgbegha se u tan ve icin ser mba sôôn timin tar u ifer ne kera. (Ôr Esekiel 33:7, 8.) Mhôônom ka ma kôr se a mbawanndor a vese kua mba hen tsombor wase mba ve civir Yehova ga la. Bibilo kaa ér “zegecan una er, man a lu ican i i gbe tar je i lu a er ga yô, shi mayange je ia kera er ga.” Nahan kpa, ior kpishi ka ve yem u eren akaa a ve, ve fa kwagh u a lu van ken hemen ne cuku ga. (Mat. 24:21) Se soo ser ve fa akaa a aa er hen shighe u Aôndo una ôr tar ne ijir la. Hiihii yô, una tim kwaghaôndo u aiegh, una been yô, una tim botar ne sha ityav mbi Armagedon la. (Mpa. 16:14, 16; 17:16, 17; 19:11, 19, 20) Se sôn ser ior kpishi ma ve ungwa icintan yase ne, shi ma ve va civir Yehova a vese imôngo hegen. Kpa mba ve vende u keghen ato a vese hegen kua ior asev mba doon se ishima mba ve civir Yehova ga la di ye?
10. Er nan i gbe hange hange u se za hemen u tan ior icin sha kwagh u una va er ken hemen laa?
10 Er se vande henen ken ngeren u a kar la nahan, alaghga mbagenev mba vea nenge mtim u Zegebabilon ve vea gema asema la, Yehova una yima ve. Aluer ka nahan yô, hemba kan hange hange u se za hemen u tan ve icin hegen cii. Hen ase sha kwagh ne: Alaghga akaa a se lu pasen ve hegen ne vea va umbur a hen shighe la. (Nenge Esekiel 33:33.) Alaghga vea hide vea umbur akaa a yange se lu tan ve icin sha mi la, nahan vea va kohol se ken mcivir u mimi ne cii ve tso a kua a kar ihyongo ye. Ve mbagenev mba ve vende loho wase hegen ne alaghga vea va gema ishima shighe u vea nenge mtim u Zegebabilon la, vough er or u kuran purusu u ken Filipi yange gema ishima shighe u nenge “tar tenger sha utaha tsung” la nahan.—Aer. 16:25-34.
SE MBA PASEN KWAGH SHA CI U YEHOVA MAN ITI NA DOO SE ISHIMA
11. Ka se na Yehova iengem man icivir man tahav nena? (Mpase 4:11) (Shi nenge ufoto kpaa.)
11 Ityôkyaa i vesen i se pasen loho u dedoo yô, ka sha ci u Yehova Aôndo man icighanti na doo se ishima. Ka se nenge tom u pasen kwagh ne ser ka gbenda u wuese Aôndo u a doo se ishima la. (Ôr Mpase 4:11.) Se lumun ser Yehova, Aôndo kuma u ngohol iengem man icivir man tahav hen mba ve civir un sha mimi la. Ka se na un iengem man icivir sha u pasen mbagenev er i lu un a “[gbe] akaa cii” shi a ne se uma yô. Ka sea eren tom a shighe wase man agee a ase kua akaa a se lu a mi la, er mbamlu asev ve ne se ian la u pasen mbagenev kwagh yô, se naan un tahav asev. (Mat. 6:33; Luka 13:24; Kol. 3:23) Jighilii yô, ka i doo se u lamen a ior sha kwagh u Aôndo u a doo se ishima la. Shi ka i doo se u pasen ior iti na kua inja i iti shon kpaa. Sha ci u nyi?
Ka sea eren tom a shighe wase man agee a ase kua akaa a se lu a mi la, er mbamlu asev ve ne se ian la u pasen mbagenev kwagh yô, se naan Yehova tahav asev (Nenge ikyumhiange i sha 11)
12. Ka se tsegha iti i Yehova shighe u se lu pasen kwagh la nena?
12 Er Yehova a doo se ishima yô, kwagh la ka a mgbegha se u tseghan iti na. (Mat. 6:9) Se soo u pasen mbagenev er akaa a vihin a Satan a ôr sha Yehova la cii, a lu mimi ga yô. (Gen. 3:1-5; Yobu 2:4; Yoh. 8:44) Nahan shighe u se lu pasen kwagh yô, ka i sar se u ôron hanma or u nan kegh ato a vese cii, or u Yehova a lu yô. Se soo ser hanma or nana fa er dooshima a lu ieren na i hemban cii, man er gbenda u a hemen la u hembe doon kua er i lu u ica a gba ga tsô Tartor na ua va kar a ican i yan kera, ua gema a va uumace a bem man msaanyol yô. (Ps. 37:10, 11, 29; 1 Yoh. 4:8) Ka sea pasen ior akaa ne yô, se tseghan iti i Yehova. Shi ka i saan se iyol sha ci u se mba eren tom u i gbe u Mbashiada mba Yehova vea er yô. Er nan ve se ôr nahana?
13. Ka se kwagh u icivirigh u lun Mbashiada mba Yehova sha ci u nyi? (Yesaia 43:10-12)
13 Yehova lôhô se ér se va lu “mbashiada” nav. (Ôr Yesaia 43:10-12.) Ken anyom a karen la, Mbahemenev mba Shin Itine nger washika ugen kaa ér: “Icivir i hemban cii i hanma wase nana fatyô u zuan a mi yô, ka i lun Orshiada u Yehova.” Se ôr nahan sha ci u nyi? De se tese ikyav. Aluer u soo wer or a er shiada sha kwagh wou ken koti yô, u tsua or u u fe nan tsembelee shi u ne nan jighjigh shi nan lu a iti i dedoo sha er kwagh u nan ôr la mbagenev kpa vea na nan jighjigh yô. Nahan er Yehova a tsua se ér se lu Mbashiada nav yô, tese ér a fa se tsembelee shi a na jighjigh ér se ôr mbagenev er un lu Aôndo u mimi tswen yô. Ka se kwagh u icivirigh kpishi u lun Mbashiada nav. Sha nahan yô, ka se er tom a hanma ian i se zough a mi cii u ôron mbagenev kwagh u iti na shi paase un iyol sha mbaaie kpishi mba i we un iyol la. Ka sea eren nahan yô, se eren kwagh u a zough sha iti i i yer se sha mi ér Mbashiada mba Yehova la!—Ps. 83:18; Rom. 10:13-15.
SE ZA HEMEN U PASEN KWAGH ZAN ZAN MKUR
14. Ka akaa a doon a nyi aa va er ken hemene?
14 Saan se iyol kpishi u fan akaa a aa va er ken hemen la. Sha iwasen i Yehova yô, se mba veren ishima ser ior kpishi vea va civir un a vese imôngo cii ve zegecan una hii ye. Shi doo se kpishi u fan ser hen shighe u zegecan, u uma una hemba taver la je kpa, ior kpishi ken tar u Satan ne vea undu un vea va kohol se u civir Yehova.—Aer. 13:48.
15-16. Ka tom u nyi i gbe u se za hemen u erene, man ka hanma shighe se de u eren u?
15 Kpa hegen yô, se mba a tom u hange hange u i gbe u se er yô. Se mba a ian i icivirigh i eren tom u mayange a kera kimbir u ga yô. Ka tom u pasen loho u dedoo u Tartor u Aôndo sha tar jimin cii, shi hen shighe shon môm tan ior icin sha akaa a aa va er la. Gba u ior vea fa er mkur u botar ne a sôôn van yô. Nahan shighe u ôron tar ne ijir la una kuman yô, vea fa er loho u yange se pasen la u dugh hen Yehova Aôndo yô.—Esek. 38:23.
16 Nahan ka nyi se kange ishima u erene? Er loho u dedoo u doo se ishima, shi ior kpa ve doo se ishima man u hemban cii yô, Yehova Aôndo kua iti na i doo se ishima yô, se za hemen u pasen kwagh torough torough man sha gbashima zan zan shighe u Yehova una kaa ér, “Kuma” la!
ICAM 54 “Ka Gbenda Je Ne”
a Yange i er mkombo u sha inyom ne ken uwer u Oktoba 7, inyom i 2023, hen ijiir i eren mkohol u Mbashiada mba Yehova hen geri u Newburgh, hen kpentar u New York, tar u Amerika. Yange i kura porogeram la cii i tese un sha Ityôgh ki Televishen ki Mbashiada mba Yehova®, i tese vegher u sha 1 la ken uwer u Novemba, inyom i 2023, vegher u sha 2 la di i va tese un ken uwer u Janawari, inyom i 2024 ne.
b Nenge ngeren u ken zwa buter u a lu a itinekwagh ér “The Bible Changes Lives—I Was Impressed by the Bible’s Clear, Logical Answers,” u yange i gber ken Iyoukura i Febewari 1, 2015 la.
