Avur a a kase ivur shon la tese je ér, apostoli Paulu yange lu ôron kwagh u loho, shin awashima u a Aôndo, u a lu ken Bibilo la.

Ashighe kpishi ka i ôr kwagh u Mbaheberu 4:12 ken ityakerada yase sha u tesen ér, Bibilo ngi a tahav mbu geman uuma mba iorov, shi ka vough u ôron kwagh nahan kpaa. Nahan kpa, doo u se nenge kwagh u Mbaheberu 4:12 a ôr la a hemba heela ica je. Paulu yange lu taver Mbaheberu mba ve lu Mbakristu mbara asema ér ve ta ikyaa a mbaawashima mba Aôndo. I nger mbaawashima mban kpishi ken icighanruamabera. Paulu yange tese ve ikyav sha kwagh u Mbaiserael mba i due a ve ken Igipiti kera la. Yange ve lu a ian i nyôron ken tar u ityendezwa, u “atumbabua man iyough ve dumbur ker” la, man ape vea zua a mmem u mimi yô.—Eks. 3:8; Dut. 12:9, 10.

Lu awashima u Aôndo sha ci ve je la. Kpa, shighe kar yô, Mbaiserael cighir asema, ve kera na Aôndo jighjigh ga, nahan mbagenev ken ve kpishi nyôr ken mmem la ga. (Num. 14:30; Yos. 14:6-10) Nahan kpa, Paulu shi kaa ér, “ityendezwa i nyôron ken mmem” u Aôndo la ngi her. (Heb. 3:16-19; 4:1) “Ityendezwa” la, ka vegher u awashima u Aôndo ugen je ka u henen a hen ga. Se fatyô u henen kwagh u awashima u Aôndo shi tan ikyaa a na, er Mbaheberu mba ve lu Mbakristu la kpa er nahan. Paulu yange ôr vegher u mkaanem ma ma lu ken Genese 2:2 man Pasalmi 95:11 la, sha u tesen ér, ityendezwa la due ken Bibilo.

Jighilii yô, saan se iyol kpishi er se fe ser, ‘ityendezwa i nyôron ken mmem u [Aôndo] la i lu her yô.’ Se na jighjigh ser, se fatyô u nyôron ken mmem u Aôndo er Bibilo i kaa nahan, shi se mba eren akaa a tesen ér se nyôr ken mmem shon kpaa. Se er kwagh ne sha u dondon Tindi u Mose la shin nôngon ser Yehova a lumun se sha ityom igen i se eren la ga. Kpa, se ta ikyaa a awashima u Aôndo u i pase se ken Bibilo la saan saan shi se za hemen u eren nahan sha jighjigh wase u nan la. Kwagh ugen yô, er i vande pasen nahan, ior umiliôn imôngo sha tar cii hii u henen Bibilo shi ve hen awashima u Aôndo kpaa. Kwagh la mgbegha mbagenev kpishi ken ve, ve gema gbenda u ve eren kwagh ken uma ve la, shi ve na Aôndo jighjigh, nahan ve hingir Mbakristu mba i er ve batisema yô. Gbenda u kwagh la a bende a ve la, tese wang ér, “mkaanem ma Aôndo ma uma je, ma tem gbilin ga.” Awashima u Aôndo u i pase ken Bibilo la bende a uma wase shi una za hemen u eren tom ken uma wase her.