Shighe u u lu ken zayol yô, ka u soo wer ma ijende you i ishima ishima i wase u je ka u henen a hen ga. Sha nahan yô, mbagenev kaa ér Aôndo ka ijende i mimi ga, sha ci u ve nenge ér ngu eren kwaghmôm sha u wasen ve ga. Kpa sha mimi yô, Aôndo vande eren akaa kpishi sha ci u iwasen yase. Shi una va er kwagh sha u been a mbamzeyol man ican i se lu yan la cii kera. Aôndo una va er nyi?

Aôndo una bee a iferkwagh cii kera, sha u karen a kwagh u a ve a iferkwagh la kera. Bibilo pase kwagh u a ne ve iferkwagh i lu yô, ér: “Tar cii ngu sha ikev i Orbo.” (1 Yohane 5:19) “Orbo” la, ka orgen kposo ga, ka or u ken jijingi u Yesu yange yila un ér “tor u tar ne” la, ka Satan Diabolo je la. (Yohane 12:31) Er tar u uumace u lu sha ikyev i Satan yô, kwagh ne na mbamlu mba vihin tsung nyôr shin tar ne. Aôndo una va er nyi?

Ica ia gba ga tsô, Yehova Aôndo una er kwagh sha ikyev i Wan na, Yesu Kristu, sha u ‘vihin agee a un u a lu a tahav mbu kuugh la kera, ka diabolo je la.’ (Mbaheberu 2:14; 1 Yohane 3:8) Jighilii yô, Bibilo tese ér, Diabolo iyolna kpa fa er “shighe na a kera vese ga” tsô a tim un kera yô. (Mpase 12:12) Shi Aôndo una bee a iferkwagh cii kera shi una tim mba ve eren aferakaa la kpa kera.—Pasalmi 37:9; Anzaakaa 2:22.

Orgbanakaa una been a iferkwagh cii shin tar kera yô, una er kwagh sha u kuren awashima na u ior mba lun vough ve lu uma ken paradiso shin tar gbem sha won la. Ka nyi se fatyô u veren ashe a mini?

Bem man mkor u been mayange. “Mbaasemaleghlegh yô, vea ya dyako u tar, á saan ve iyol sha mngee u bem.”—Pasalmi 37:11.

Kwaghyan u dedoo una dumbur. “Iyiav mbi̱ ngee shin tar sha ityouv mbi iwoov je kpaa.”—Pasalmi 72:16.

Uya mba dedoo man tom u nan mkom. “Vea maa uya man vea tema keregh, vea kaha ishule i ikon i wain, man vea ya atam a i. . . . Uicuwan Av kpaa vea ya tom u ave ve zan zan je.”—Yesaia 65:21, 22.

U ngu veren ashe u nengen a mbamlu mba i ter sha heen nee? Ica ia gba ga tsô, ior cii vea nenge a mbamlu mban.

Hanma or nyian ka nan gba angev, shighe a karen yô nan kpe, kpa kwagh a va kera lu nahan ga. Ica a kera gba ga tsô, Aôndo una er akaa a dedoo a nagh ku ipaan ku Yesu kura ku ne i gbe u una er la. Aôndo una er kwagh ne, sha er “anti or u nan ne Un jighjigh yô, nana̱ de timin ga kpa nana̱ zua a uma u tsôron” yô. (Yohane 3:16) Ka mbamtsera mba nyi nahan se zua a mini?

A bee a angev kera. “Ma or u nan tem ker kpaa nana kera kaa ér: Kwagh nyoon mo, ga; ior mba ve tem heregh kpaa, á de ve asorabo a ve.”—Yesaia 33:24.

Ku ua kera na uumace ican ga. “Una tim ku sha won kera; Ter AÔNDO Una ese mliam sha ishiv mbi iorov cii.”—Yesaia 25:8.

Ior vea lu uma gbem sha won. “Iyua i sha mlumun u sha mhôôn u Aôndo yô, ka uma u tsôron ken Kristu Yesu Ter wase.”—Mbaromanu 6:23.

A nder mbakpenev. “Aôndo ngu va nderen mbaperapera man mbaperapera ga kpaa shin ku.” (Aerenakaa 24:15, NW ) Vea va zua a mtsera ken nagh ku ipaan ku Aôndo a ne la.

Aôndo una er akaa ne cii nena?

Aôndo una kure awashima na sha ci u uumace man tar la, sha ikyev i gomoti na u sha, u Kristu Yesu una lu Tor la. (Pasalmi 110:1, 2) Ka gomoti shin tartor u Yesu yange tese mba dondon un ér ve eren msen sha mkaanem man la, ér: “Ter wase u Sha, . . . tartor Wou u̱ va.”—Mateu 6:9, 10.

Tartor u Aôndo ua hemen tar shi ua bee a mbamzeyol man ican i yan cii shin tar ne kera. Tartor ne ka gomoti u hemban doon cii u uumace vea va lu a mi je ne! Ka sha ityôkyaa ne, Yesu nôngo sha a fatyô na cii pase “Loho u Dedoo u tartor,” shighe u lu shin tar ne la shi kaa a mbahenen nav ér ve kpa ve er nahan ye.—Mateu 4:23; 24:14.

Er uumace mba Yehova Aôndo a gbe la ve doo un ishima kpishi yô, a tôndo zwa ér, una er ve akaa a doon tsung ne cii. Kwagh ne na yô, u soo u fan Aôndo shi kporom ikyua a na ga zee? Aluer u tsua u eren nahan yô, u zua a iwasen nena? Ngeren u dondon ne una pase.