Hegen ne se hen se fa akaa a a wase se se zua a mlumun sha mpin u, Ka An Nan Lu Aôndo? la. Se hen ken Bibilo se fa ér iti i Aôndo ér Yehova man ieren na i hemban doon cii yô ka dooshima. Shi se hen se fa kwagh u a er man kwagh u una va er sha ci u iwasen i uumace yô. Nahan cii kpa, akaa nga kpishi a se fatyô u henen sha kwagh u Aôndo yô, kpa alaghga u hen wer aluer u er nahan yô, a wase u nena?

Yehova tôndo zwa ér “aluer ú ker Un yô, ú zua a Na.” (1 Kroniku 28:9) Aluer u fa Aôndo yô, u zua a kwagh u injaa tsung; inja na yô, u ya “ijende a na kôôsôô.” (Pasalmi 25:14, NW ) Aluer u ya ijende a na yô, a wase u nena?

Aôndo una na u msaanyol u mimi. Bibilo ôr kwagh u Yehova ér ka “Aôndo u sar sar.” (1 Timoteu 1:11, NW ) Aluer u ya ikyar a na shi u ngu dondon igbenda na yô, u zua a msaanyol u mimi, u una fatyô u wasen we sha gbenda u u henen kwagh la man er ka i lu ken ishima la kua sha iyol kpaa. (Pasalmi 33:12) Shi u fatyô u zuan a msaanyol ken uma, sha u palegh aeren a a na se ku la, geman lun a aeren a dedoo shi zan hemen u lun ken mzough vea mbagenev. Nahan u va lumun a kwagh u orpasalmi ôr ne, ér: “Doom u mgbôghom a Aôndo.”—Pasalmi 73:28.

Aôndo una wa u ikyo. Yehova er ityendezwa a hanma or u nan civir un la ér: “Me wase u henen; ishe Yam ia lu sha a we.” (Pasalmi 32:8) Kwagh ne tese ér Yehova we mba ve civir un la ikyo asange asange shi ne hanma ve kwagh u kwagh a gbe nan a mi la. (Pasalmi 139:1, 2) Aluer u ya ikyar i kôôsôô vea Yehova yô, una wasen we hanma shighe cii.

Mlu u dedoo u ken hemen. Yehova Aôndo una wase u u zuan a msaanyol man uma u dedoo hegen, kpa ka cii la ga, una wase u u va zuan a mlu u doon tsung u ken hemen la kpaa. (Yesaia 48:17, 18) Bibilo kaa ér: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.” (Yohane 17:3) Ken ashighe a ican ne, ishimaverenkeghen i Aôndo a ne la, ia fatyô u lun er ka imandetso i ia wase se u tilen ‘dông shi tenger’ ga yô.—Mbaheberu 6:19.

Ka atôakaa kpuaa ken atôakaa a hange hange kpishi a a wase se u seer fan Aôndo tsembelee shi yan ikyar kôôsôô vea na je ne. U ngu a ian i lamen a hanma Orshiada u Yehova cii gayô zan sha jw.org/tiv za seer zuan a mkaanem ma ma a wase u yô.