Shighe u U Lu a Bouange Yô
Linda u a lu anyom 71 la kaa ér: “Shighe u ortwer pasem ér m ngu a kyansa i sha huhu kua sha gwarmya la, m hen mer ku kôrom a kôr je. Kpa m moughon ken iyouci m hidi ken ya yô, m kaa mer, ‘Ka kwagh u yange m ver ishima u zuan a mi ne ga, kpa a gba u me ker gbenda me nôngo a mi.’”
Elise u a lu anyom 49 la kaa ér: “M ngu a angev mbu sha igbila mbu nyoon tsung ken uwasegh agh ku imese. Shighe ugen, mnyoon u angev mbun ne ka a na yô, m hingir u uren. Ashighe kpishi ka m nenge mer m ngu tswen shi i lum pe wuan iyol yam je kpaa.”
ALUER i kar or wou shin we iyol you i zua u a angev mbu mbua fatyô u wuan we yô, u fa er kwagh ne ka a va a ishimanyian tsung yô. Kwagh ugen yô, ka i gba u u nôngo a mbamlu mba ken ishima kposo kposo mba ior ou. Heela tseegh ga, ka a gba u u za nenge a ortwer shin wea zuan a inyaregh ki u sôr angev ou ga shin wea hen sha mbamnyoon mba icigh ki i gbe u u mena la kia va va u a mi la nahan, ishimanyian man mciem ka ma seer gban we iyol. Hang u ka u zua a mi hen shighe ne man angev ou mbura ka ve na yô, u vôr.
Ka hana, se zua a iwasena? Mbagenev kpishi suur sha Aôndo, sha u eren msen hen a na, shi ôron avur a Bibilo a nan ishimasurun, nahan ve zua a ishimasurun i hemban cii. Iwasen igen yô, ka msue u mba hen tsombor man azende a ve nga a suen ve sha dooshima la.
KWAGH U UNA WASE U U WAN ISHIMA YÔ
Robert u a lu anyom 58 la wa kwagh nahan ér: “Shighe u u lu uange la suur sha Aôndo, nahan una wase u u wan ishima a angev mbu shon. Er msen hen Yehova pase un er i lu u ken ishima la. Sôn un a na u icighan jijingi na. Sôn un a wase u u lu a mnenge u vough shi u taver mba hen tsombor wou ishima shi u za hemen u wan ishima a angev ou a ishima i bem bem.
“Shighe u ior mba hen tsombor wou ve sue u sha u nan we mpever iyol u ken ishima shin ve lu wasen we hanma shighe yô, kwagh ne ka a wase u kpen kpen. Or shin iorov uhar mba hen tsombor wam ka ve yilam hanma iyange sha ajiir kposo kposo a ve lu la, ve pinem ér ‘U nder nyian nena?’ Shi azende a am a a lu sha ajiir kposo kposo la kpa, ka a yilam a taver mo ishima. Ka ve na i lum ken ishima guda je ka u henen a hen ga, nahan kwagh ne wasem u zan hemen u wan ishima a mnyoon wam ne.”
Aluer u ngu za sôron ma ijende you i i lu uange yô, ver ishima sha kwagh u Linda a kaa ne, ér: “Oruange kpa ka nan soo u lamen sha akaa a ior ve lamen sha mi ayange ayange la je ka u henen a hen ga, shi alaghga nana soo u lamen sha kwagh u angev mbu nan la hanma shighe cii ga. Sha nahan yô, lamen a nan sha akaa a ne vanden lamen sha mi la.”
Sha tahav mbu Aôndo man ishimasurun i Ruamabera a ne se kua msue u mba hen tsombor man azende a suen se la yô, se fatyô u lun a vangertiôr ser ityôkyaa i injaa ngi i se za hemen u lun uma, aluer se mba wan ishima a bouange je kpaa.
Kwagh Ugen u Alaghga Shi Una Doo U Yô
MBAMPIN MBA BIBILO I NE MLUMUN SHA MI LA
Ican i Icôronuange—Bibilo Ia Fatyô u Wasen Je He?
Een! Fa akaa atar a aa wase u u wan ishima a icôronuange yô.
IYOUKURA
Shighe u Or Wou Nan Gbe Angev mbu Nana War Ga Yô
Mba hen tsombor vea fatyô u surun or ve u nan gbe angev mbu nana war ga la ishima nena? Ka nyi ia wase mba ve lu nengen sha oruange la u wan ishima a akaavihin a vea tagher a mi hen shighe u or ve nan lu uange la ciili?
