Ka Hanma Shighe Mkurtar Una Va? Kwagh u Yesu Ôr Yô
Er ngeren u ken ijime la a pase se nahan, Bibilo ka ia ôron kwagh u mkurtar yô, ka i lu mkur u tar u se tem sha u ne shin uumace ga. Kpa ka i lu mkur u akaa a tar u ifer ne u eren la, kua ior mba ve suen u la cii i ôron ye. Bibilo pase shighe u mkur u tar u hegen una va yôô?
HEN SHA AKAA AHAR A YESU ÔR SHA KWAGH U MKURTAR YÔ:
“Kuran nen, sha ci u ne fa iyange shin ihwa la ga.”—MATEU 25:13.
“Lu nen per, kuran nen, sha ci u ne fa shighe u i ver la ga.”—MARKU 13:33.
Sha nahan yô, or môm môm sha tar nan fa shighe u mkurtar una va la jighilii ga. Nahan kpa, Aôndo ver “shighe” shin “iyange man ihwa” i mkurtar un va yô. (Mateu 24:36) Kwagh ne tese ér gbenda môm kpa ngu u or a fa shighe u mkurtar una zurum gaa? Ka nahan ga cii. Yesu yange kaa a mbahenen nav ér ve ver ishima ve nenge akaa a aa lu eren u tesen ikyav ér mkurtar zurum yô.
AKAA A YESU ÔR ÉR AA LU IKYAV LA
Akaa ne aa lu eren u tesen ér “mkur u tar ne zurum.” Yesu yange kaa ér: “Ikyurior igen ia mough ityav a ikyurior igen, shi tartor ugen ua mough ityav a tartor ugen, shi ijen ia gba sha ajiir wue wue, shi tar ua tenger sha ajiir kposo kposo.” (Mateu 24:3, 7) Shi yange kaa ér “ubombauangev” vea lu, ka iangev mbi bov mbi tsaren je la. (Luka 21:11) U nenge akaa a Yesu tsenga ôron la nga eren hegen kpa?
Ityav mbi vihin tsung man ijen man mtenger u tar sha ajiir wue wue kua iangev kposo kposo na yô, ior mba yan ican kpishi sha ayange a ase ne. Ikyav i tesen yô, ken inyom i 2004 la, ityeku i i yilan ér Indian Ocean la gbuusu, nahan mngerem sar avenge wua ior je kuma 225,000. Angev mbu Korona di wua ior kuma miliôn 6 man dubu deri 9, ken atô u anyom atar. Yesu yange kaa ér akaa ne aa lu ikyav i tesen ér mkurtar zurum.
“AYANGE A MASEJIME”
Bibilo yila shighe u una mase karen maa mkurtar una va la ér “ayange a masejime.” (2 Peteru 3:3, 4) Kwaghôron u profeti ugen ken 2 Timoteu 3:1-5 kaa ér, ken ayange a masejime yô, ior kpishi vea venda u eren kwagh sha tindi. (Nenge ngeren u kiriki u a lu a itinekwagh ér “ Shighe u Una Mase Karen Maa Mkurtar Una Va La.”) U ngu nengen a ior mba soon ayol a ve tseegh, man mba wan tswam, kua mba lun a dooshima ga hegen kpa?.
Ayange a masejime ne aa lihe a kuma shighe nena? Bibilo kaa ér ‘shighe shon una vese ga.’ Maa Aôndo una tim “mba ve lu vihin tar la.”—Mpase 11:15-18; 12:12.
SE ZURUM A TAR U UA LU PARADISO LA!
Aôndo vande veren iyange man ihwa i una tim tar u ifer ne kera yô. (Mateu 24:36) Nahan kpa, shi i ôr se kwagh u dedoo ér, Aôndo “soo ér or môm nana tim ga.” (2 Peteru 3:9) Ngu nan uumace cii ian ér ve fa awashima na shi ve ungwan imo na. Sha ci u nyi? Sha ci u a soo ér se war mkur u tar ne, nahan se va lu uma ken tar u he, shighe u ua hingir paradiso la.
Aôndo ngu tesen ior sha tar cii er vea er ve vea fatyô u va lun ken tar u he la sha ikyev i Tartor na yô. Yesu yange kaa ér, a pase loho u dedoo u sha kwagh u Tartor u Aôndo la “a tser tar.” (Mateu 24:14) Mbashiada mba Yehova mba sha tar cii a ve tôô ahwa ubiliôn imôngo ve tese ior mimi u Bibilo shi ve pase loho u dedoo u nan ishimaverenkeghen. Yesu yange kaa ér a pase loho ne hanma ijiir sha tar cii, man mkurtar una va ye.
Ica ia kera gba ga tsô hemen u uumace ua bee. Kpa kwagh u dedoo yô, u fatyô u waren mkurtar, nahan va lun ken Paradiso shin tar, er Aôndo a tôndo zwa nahan. Ngeren u a dondo ne una pase kwagh u u er ve u fatyô u va lun ken tar u he la yô.
Kwaghôron u profeti u Yesu ôr sha kwagh u “ayange a masejime” la na se ishimaverenkeghen
Kwagh Ugen u Alaghga Shi Una Doo U Yô
IYOUKURA
Ka Hanma Shighe Tartor u Aôndo Ua Hemen Tara?
Yange mbadondon mba Yesu mbajighjigh mbagenev kpa soo u fan kwagh ne. Yange na ve mlumun ér nyi?
MBAMPIN MBA BIBILO I NE MLUMUN SHA MI LA
Ka Hanma Shighe Mkurtar Una Va?
Kwagh u se er ve se zua a mlumun yô, saa se kav kwagh u Bibilo i yer ér mkur shin mkurtar la jighilii.
MBAMPIN MBA BIBILO I NE MLUMUN SHA MI LA
Ka Nyi i Tese Ér Se Mba ken “Ayange a Masejime,” Shin “Ashighe a Mkur”?
Bibilo pase akaa a aa er shin mbamlu mba ior vea nyôr ker cii man “mkurtar” yô
