Bebe yange lu vea ter na kôôsôô. Ka kwase u a lu kôôsôô a tsombor u Bebe yô, yange ôr mkaanem ma i ter sha heen man a na ye. Kpa mkaanem man sur Bebe ishima ga, gema vihi un a vihi ishima ker. Nahan a shi henen sha kwagh ne kaan ér: ‘Hemba doon u terem una kpe ga.’ Er anyom kar kpishi kpa Bebe va nger kwagh sha kwagh ne ken takerada na yô, tese wang je ér yange lu a de u zungwen ku u ter na ga.

Er kwagh u Bebe ne a tese nahan, shighe ka a kar cii ve se de u zungwen ku u or wase ye, hemban cii je yô or u yange se lu a nan kôôsôô yô. Bibilo pase wang ér ku ka “orihyom u masetyô.” (1 Mbakorinte 15:26) Ku ka u va a kwagh u yangen u shio, man ashighe kpishi ka u va aburabur, u va tôô ior asev mba se lu a ve kôôsôô la kera. Or u ku u ne nan ishimavihin shin ijungwen ga je kpa nan ngu ga. Ka nahan ve or wase ka nana kpe ve se fatyô u wan ishima ga, se zungwe kpishi ye.

Alaghga u pine wer: ‘Shighe ngu a kar i kuma nan ve or de u zungwen ku? Ka nyi or a er ve nana zungwe ku kpishi ga? Me sur mba ve lu zungwen ikyu i ior vev la asema nena? Shi se tsa se nenge a ior asev mba ve kpe la je kpa?’