“Aôndo Yange Lu Hana?”
“KA M ZER PINEN MPIN NE: AÔNDO YANGE LU HANA?”—Ka mpin u Poopu Benedict XVI, yange za hen afo a mbakwarev a sha ayange a tsuaa, a ken geri u Auschwitz, tar u Poland ve pine je la.
I LU NAHAN AAHE ER, MAA U PINE WER, ‘AÔNDO YANGE LU HANA’ VEE? SHIN I LU NAHAN KWAGH U VIHIN TSUNG ER U KEN UMA, MAA U PINE WER AÔNDO WA U IKYO JE KPA VEE?
Alaghga ka u ken ishima er yange lu Sheila, u a lu ken tar u Amerika la nahan. Er i mar un hen tsombor u kwaghaôndo a doo u ishima kpishi yô, a kaa ér: “Yange kwagh u Aôndo doom, sha ci u ka Orgban wase, hii yev je. Nahan kpa mayange m nenge mer m ngu ikyua a na ga. Yange m hen mer ngu nengen a mo, kpa ka ken ica. Yange m nenge mer kwagh wam vihi Aôndo ishima ga, kpa shi m na jighjigh mer a wam ikyo ga.” Sheila yange lu a akperan sha ci u nyi? A pase wener: “Aahe yange er tsombor wam acin imôngo shi lu inja er Aôndo lu wasen se cuku tsô kpaa ga nahan.”
Er Sheila nahan, alaghga u fa wang wer Aôndo u Hembanagee ngu. Nahan kpa alaghga u hen wer Aôndo wa u ikyo ga. Orperapera Yobu, u yange lu a vangertiôr ken tahav man kwaghfan u Orgban se la kpa, lu a imba akperan a tan ne. (Yobu 2:3; 9:4) Yobu yange tagher a uaahe acin imôngo, a mmem shio, been kera yô, a pine Aôndo wener: “Ka nyi U yer ishigh Yough, U gem U nengen mo er m ngu orihom Wouwe?”—Yobu 13:24.
Bibilo kaa ér nyi? Gba u a na Aôndo ibo sha uaahe mba ve eren se laa? Ikyav ngi i i tese ér Aôndo wa uumace cii ikyo shi a wa se asange asange ikyo yôô? Hide sha se asange asange yô, se fatyô u nengen ser mimi je, Aôndo nengen a vese shi a fa se shi mhôônom ma ker un a vese gayô wasen se sha mbamzeyol asev kpa?
Ken ungeren mba ve dondo ne, se time sha kwagh u akaa a Aôndo a gbe la, a tese se er a we se ikyo yô. (Mbaromanu 1:20) Shi se time sha kwagh u Bibilo i tese sha kwagh u ikyo i wan i Aôndo la. Er u lu seer u ‘fan un’ ken akaa a agbe man ken Mkaanem nam la, u seer lun a vangertiôr wer, ngu ‘koson we’ shin a wa u ikyo.—1 Yohane 2:3; 1 Peteru 5:7.
