Averen a Tartor Aa Fatyô u Lun A̱ Ou

ORKRISTU apostoli Paulu yange a lam ijô igen i vesen i sha ayange a na la tsembelee. Yange hen makeranta u ú lu kwagh môm a kwaghhenen u ken yunivasiti ainge yô. Lu a hanma mtsera man ian i marnya u Roma lu a mi la cii. (Aerenakaa 21:37-40; 22:3, 28) Mlu na la yange ma na un u hingir ornyar shi zan iti kpaa. Kpa, a kaa ér: “Akaa a a lum mtsera la cii, a gema hingir mo msaa sha ci u Kristu . . . m nenge a hingir mo hôngor sha u Kristu Una lu mtsera wam yô.” (Mbafilipi 3:7, 8) Er nan ve Paulu yange ôr imba kwagh laa?

Paulu u i vanden yilan un ér Saulu u Tarsu man or u tôvon mba “ve lu sha gbenda la” a ican la gema hingir or u nan jighjigh shighe u i tese un mpase u sha mnenge u Yesu u iengem man u í nder un shin ku la. (Aerenakaa 9:1-19) Hen Paulu yô, kwagh u yange er un sha gbenda u yemen ken Damaseku la yange tese un wang ér Yesu lu Mesiya u ityendezwa la, shin Kristu, tor u una va hemen ken Tartor u ityendezwa la. Shi kwagh la va a mgem u vesen ken uma u Paulu er i tese ken mkaanem ma i er sha heen ne nahan. U ôron sha mkaanem magenem yô, Paulu yange gema ishima sha er lu a ishima i mimi man i jighjigh yô.—Mbagalatia 1:13-16.

Ken Bibilo yô, ishemberti i í yer ér “gema ishima” la mbá hembe geman i̱ ken ishember i ken zwa Grika i̱ ikyav i i̱ í lu “u masen fan” kpa i kera lu “u vanden fan kera ga la.”  Nahan, mgemshima ka mgem u ken ishima i or man ieren i nan shin awashima u nan, man mvende u vendan igbenda i or i tse la ér i kera gba kwagh ga. (Aerenakaa 3:19; Mpase 2:5) Hen Paulu yô, yange de ér kwagh u yange er un sha gbenda u yemen ken gar u Damaseku la a̱ gba di lun un kwagh u ngaghen mhen na shin lun di mkav u kwaghaôndo tsô ga. Hen a na yô, yange lu kwagh u kpoghor un u kaven ér uma na u tse u̱ lu a Kristu ga la, lu gbilin tsô. Shi yange kav ér u̱ una zua a iwasen i mfe na u he u sha kwagh u Kristu la yô, saa una er kwagh sha u geman mlu u uma na la keng.—Mbaromanu 2:4; Mbaefese 4:24.

Mgem u Yange Va a Averen Yô

Mfe u Paulu vande lun a mi kera sha kwagh u Aôndo la yange hemba zuan a mi sha ikyev i nongo u Mbafarishi, ú un kpa lu môm ker la. Akaa a ve na a jighjigh la yange wa kwaghfan u taregh u ior kpishi ker kua aeren a uter kpaa. Gbashima u Paulu lu a mi kua iniôngon na cii yange nzughul sha ci u ihyom i kwaghaôndo. Shin er yange hen ér un ngu eren Aôndo tom nahan kpaa, gema lu hendan a hendan a na.—Mbafilipi 3:5, 6.

Er Paulu va zuan a mfe u vough sha kwagh u Kristu man tom na u ken awashima u Aôndo kera yô, a mase nengen wang e̱r gba u una tsua kwagh u una er yô: Una lu Orfarishi her una za hemen u lun sha ian i vesen na man itiduen na la shinii, shin una gema mlu u uma na una hii eren nyityôkwagh i i lu hange hange sha u zuan a mkom sha ishigh ki Aôndo ciili? Kwagh u doon yô, Paulu yange tsua kwagh u dedoo, sha ci u a kaa ér: “Kunya kôrom sha ci u Loho u Dedoo la ga gadia ka agee a Aôndo a sha myom u yiman hanma or u nan ne jighjigh cii, hii sha or u Yuda man shi or u Grika kpaa.” (Mbaromanu 1:16) Paulu yange hingir or u pasen loho u dedoo u Kristu man Tartor na sha gbashima.

Anyom nga karen kpishi yô, Paulu kaa a mba ve lu Mbakristu a na imôngo la ér: “M ngu henen mer m zua a mi hingir kwagh wam ve ga, kpa kwagh u m lu eren yô, ngu môm, akaa a ken ijime la hungur mo kera m ngu naregh zan sha akaa a ken hemen la. M ngu yevese zan hen ikighir i i ver la sha u zuan a iwua i myila u a sen sha, u Aôndo A lu yilan ken Kristu Yesu la.” (Mbafilipi 3:13, 14) Paulu yange zua a mtsera ken loho u dedoo ne sha ci u yange kar a ishima na undu kwagh u yange lu tagher un u fan Aôndo la shi a har ishima u eren akaa a á zough sha awashima u Aôndo la a ishima i môm.

Ú Er Nyi?

Alaghga ú sember ungwan loho u dedoo u Tartor ne. Ishimaverenkeghen i lun uma gbem sha won ken paradiso u lun vough la i̱ doo ú wee? Ka keng ia doo ú, sha ci u se cii i mar se a isharen i lun uma shi ember uma ken bem man mkpeyol kpaa. Bibilo kaa ér Aôndo ver “mtsôr” ken asema a ase. (Orpasenkwagh 3:11) Nahan ka kwagh u igbetar u sé veren ishima keghen shighe u ior vea fatyô u lun gbem sha won ken bem man msaanyol la. Man ka kwagh u loho u dedoo ú Tartor ne ú er je la.

U ishimaverenkeghen la i̱ lu mimi yô, ka keng gba u ú time shi ú ker ú fa kwagh u loho u dedoo la ú ver ishigh sha mi yô. Apostoli Paulu ngise wa ior kwagh ér: “Kar [nen] er ishima i Aôndo i lu yô man kwagh u a doo man a kom u rumun un man shi a lu vough la kpaa yô.” (Mbaromanu 12:2) Nahan, ú zuan a mfe man mkav kera yô, gba u ú tsua kwagh u i gbe u ú er la keng, di er Paulu nahan.

Kpa hide sha vegher ugen yô, alaghga ú vande nan akaa agenegh a sha kwagh u mlu wou u ken hemen la jighjigh. Umbur wer Saulu yange lu a mbamhen nav sha kwagh u ishima i Aôndo cii man va hingir apostoli Paulu ye. Kpa u̱ den veren ashe a ma ivande i kpilighyol hen Aôndo la yô, er nan ú nenge sha kwagh la sha gbenda u ikyoogh ga? Pine iyol you ase: ‘Mimi mimi je m fa awashima u Aôndo a we a orumace man tar ne kpa? Ka nyi ikyav nahan m lu a mi i tesen akaa a m ne a jighjigh laa? Ikyav yam ne ia sôghul angahar shin inya zum u i gbe sha er, í lu tôvon ken Bibilo, Mkaanem ma Aôndo la kpa?’ Aluer ú time sha akaa a ú ne a jighjigh la sha imba gbenda ne kpa kwagh a saa ú ga. Sha kpôô yô, i̱ sar ú u̱ eren nahan sha ci u Bibilo taver se ishima ér: “Karen nen akaa cii, kôr nen u dedoo la gbang je.” (1 Mbatesalonika 5:21) Kera ga je kpa, ka mkom  u sha ishigh ki Aôndo la i lu kwagh ye gaa?—Yohane 17:3; 1 Timoteu 2:3, 4.

Alaghga mbahemenev mba ukwaghaôndo vea lu tôndon zwa u nan se mlu u ken hemen u tsôron. Kpa saa ityendezwa la ia har sha atesen a ken Bibilo keng, ga yô ia wase se u zuan a averen a Tartor u Aôndo ga. Yesu yange ta icin ken Ityesen na i sha Uwo i hemban la gbar gbar je ér: “Ka hanma or u nana kaa a Mo er, Tere! Tere! man nana nyôr sha tartor u Sha ga, saa u nan eren ishima i Terem u A lu Sha yô.”—Mateu 7:21.

Ver ishima nenge er yange Yesu kume acin sha m-er u eren ishima i Ter na ér ka kwagh u a lu gbenda u zuan a averen a Tartor u Aôndo la. U ôron sha gbenda ugen yô, ka keng u Aôndo una lumun a kwagh u alaghga a lu inja er ngu sha ishima i Aôndo la ga. Sha kpôô yô, Yesu yange seer kaan ér: “Sha iyange la ior kpishi vea kaa a Mo er: Tere! Tere! Ka ken iti You man se lu ôron kwaghôron u profeti gaa? Man ka ken iti You se lu dughun ujijingi mba bov gaa? Man shi ka ken iti You se lu eren akaa a ageegh kpishi kpaa gaa? Tsô Me kaa a ve Mer: Mayange je M ngu a fa ne ga, yem nen heen kera, ne mbavendanatindi mban.” (Mateu 7:22, 23) Wanger e̱r kwagh u a lu kwagh u hange hange i lu u se veren ishima kaven kwagh u loho u dedoo u Tartor u lu jim jim shi eren sha mi kpaa yô.—Mateu 7:24, 25.

Iwasen Ngi

Mbashiada mba Yehova zer pasen kwagh u loho u dedoo u Tartor u Aôndo ne hemba anyom 100 hegen. Mba eren kwagh ne ken ityakerada man sha mkaanem ma sha zwa, mba wasen ior tar sha won cii u zuan a mfe u vough u fan kwagh u a lu Tartor u Aôndo, man averen a kwagh ne una va a mi la, man kwagh u or a er keng ve nana zua a amba averenegh shon la kpaa.

Se mba taver we ishima ser ngohol loho u Mbashiada mba Yehova ve lu pasen ne. Aluer ú ngohol loho u dedoo ne shi ú er tom sha ú yô, ú fatyô u zuan a averen a masejime la hegen tseegh ga kpa shi á lu ken hemen shighe u Tartor u Aôndo ua lu hemen sha tar cii la.—1 Timoteu 4:8.

Er kwagh sha mi hegen, sha ci u averen a Tartor u Aôndo ne mgbôghom ve!

[Pictures on page 7]

Mbashiada mba Yehova mba pasen loho u dedoo u Tartor u Aôndo sha ikyev i ityakerada i gberen man sha mkaanem ma sha zwa kpaa