Ikyoiwan—Ka Ityesen I Injaa i Zuan a Mi Iyevee?

“MBAMAREN Soo Mbayev Mba Wan Ikyo Tseegh Ga, Kua Ior Kpaa.” Kape i nger sha ityough ki pipa i̱ tôôn abaver je la. Kwagh u i nger ne yange har sha mker u yange i gba ken tar u New Zealand u yange pase ér ka “iorov 22 tseegh ken deri ve hen ér doo u a tese mbayev ikyo i wan ken ya” la. Mker la shi pase e̱r mbamaren ve lumun ér hemba kan kwagh u injaa nyian u tesen mbayev ambaakaa er ieren i dedoo man mlu u sha tseeneke man tom u lun a mi sha ikyev yô.

Hen shighe u̱ i̱ lú mo-hiihii man msoo u or soon iyol i nan tseegh ne, kera ka kwagh u cieryol er ior kpishi ve lu a mnenge u cimin sha kwagh u ikyoiwan man u tesen mbayev i̱ nahan ga. Kpa ka u a gba huren di ikyoiwan i uye la kera ér ka kwagh u mbatsev man kera ngi sha ityôkwagh gaa? Shin ngi ken akaa a injaa a mbayev vea hen shi vea zua a iwasen sha mi yôô? U hemban lun a inja je yô, Yehova Aôndo Orhiin mserakaa u tsombor la nengen mwe u wan mbamaren ikyo la nena, man ka averen agen a nyi a ve ken imba ikyo i wan laa?—Aerenakaa 17:28; Mbaefese 3:14, 15.

“Ka Nahan Je i Lu Vough Ye”

Apostoli Paulu yange nger tiônnongo u Mbakristu mba ken Efese mba sha derianyom u hiihii la kwagh kaa ér: “Ne ônov, ungwan nen imo i mbamaren enev ken Ter. Gadia ka nahan je i lu vough ye.” (Mbaefese 6:1) Nahan, ityôkyaa i lun a imba ikyo i wan la yô ka sha er kwagh la a zough kwagh môm vea tindi u Aôndo sha kwagh u a lu u shami la yô. Di er Paulu a nger nahan, “ka nahan je i lu vough ye.”

Sha nahan yô, se kav er Mkaanem ma Aôndo ma pase e̱r tsaha u mbamaren u sha dooshima ú lu kwagh u doon yô, “gadia vea hingir we kwagh u hweegh sha icul, kua mshirim sha mon wou kpaa,” shi ma kaa ér ka kwagh “u doon Ter” kpaa. (Anzaakaa 1:8, 9; Mbakolose 3:20) Kwagh u a gem a kaha kposo yô, ka mhembe u hemban mbamaren ato u̱ á ne Aôndo á kera lumun a or ga la.—Mbaromanu 1:30, 32.

“Ka Nahan man Á Kpe u Iyol” Ye

Paulu yange ôr kwagh u mluainja u ikyo i wan zum u a nger nahan la, ér: “Civir teru man ngôu, ka tindi u hiihii u ityendezwa i lu sha mi je la, ka nahan man á kpe u iyol man ú tsa sha won ye.” (Mbaefese 6:2, 3; Ekesodu 20:12) U or wan mbamaren mba nanev ikyo la una va nan a mkpeyol sha nyi igbenda nahana?

Sha hiihii yô, ka kwagh u mimi u kaan ér mbamaren hemba mban a ian sha ci u mtse ve man m-er u akaa a á vande eren ve la gaa? Shin er alaghga a lu inja er ve fa kwagh u kômputa kuma ve ga shin ma gbar tyesenegh ugen u ken makeranta nahan kpa ve fa kwagh sha kwagh u uma kpishi man u wan ishima a mbamzeyol mba umav kpaa. Sha vegher ugen yô, agumaior ban a mhen u akuma akuma u a ve shighe u or nan tsoghul or la. Nahan, ka ve hingir u eren akaa gagh gagh je yô ashighe kpishi ve er kwagh sha mkumbur u mbakov ve kumbur a ve la man i gema i lu ve ve ya ican ye. Bibilo i kaa sha mimi nahan ér: “Lanegh kange wanye ken ishima.” Kanyi i lu icighi? “Kwagir u tsahan a mi ua zenda ku ua kende ica a nan.”—Anzaakaa 22:15.

Averen a m-ongo u  ungwan kwagh kar mlu u wan a mbamaren yem ica. Cii man ityô i orumace i̱ lu vaanaa shi i̱ er tom sha inja vough yô, gba u ijoughzwa ia lu keng, man ia gba lun ga saa m-ongo u ungwan kwagh una lu. Nenge ikyav ken ivese, ka mkegh u keghen iyol sha u wan orgen ikyo la a ve a bem man mlu u zwa môm man msaanyol ye, ka lu u gban di zan iyol shin hulen ian i orgen nan lu a mi la kera kua mbamlu mba mbagenev la ga. Ken tom kpaa, u ungwan imo i orhemen tom la ka kwagh u hange hange u una na mzehemen u kpenga shin ma kwaghgen ye. Sha kwagh u atindi a gomoti yô, tindi kor or sha ikyev i mtsaha tseegh ga kpa shi panden ve a mwar man mkor kpaa.—Mbaromanu 13:1-7; Mbaefese 5:21-25; 6:5-8.

Agumaior a a hembe mbautahav ato la ashighe kpishi ka ze ve iyol u lun hen ityô vough. Gema sha vegher ugen yô, ityesen i ikyo i wan i or ka nan hen iyev la ia fatyô u wasen nan ken uma u nan cii. Nenge imba er i doo u fan kwagh ne shighe u or nan lu iyev la sha wono!

Ikyo i Wan Ngi a Injar i Vesen

Ikyo i wan i̱ ve a mlu u ken tsombor u saan saan kua mbamtsera mba tsan a or sha ayange a uma u nan cii tseegh ga kpa shi ka i ver imaagh ki a fatyô u maan mlu u hemban cii shami yô—ka mlu u hen atô u or man Orgban nan je la. Gba u se wa Yehova Aôndo ikyo i̱ i̱ kom sha a na yô aa u̱ shin uwegh shio, sha er á lu ‘Orgban u Hembancii’ u i lu un a lu “imbor i uma” yô.—Orpasenkwagh 12:1; Pasalmi 36:9.

Ishember i̱ “wa ikyo” la i̱ due ken Bibilo sha mbamgem kposo kposo kuma kwa imôngo imôngo. Heela tseegh ga, ajiir hemba uderi imôngo a i er kwagh i ter tindi u Aôndo, man uiniezwa nav man atindiakaa a na man akaaôron a jirigh a na, man ajiir ne cii á lu ôron i lu kwagh u nan iyol sha tindi yô. Kwagh ne tese se je ér sha mimi yô, Aôndo nengen ikyo i wan ér ka kwagh u a lu u or a er ve una lumun a nan yô. Een, ikyo i wan ka kwagh u a lu hange hange sha u maan mlu u dedoo vea Yehova yô. (1 Samuel 15:22) Kwagh ka a er i vihi yô, isharen i uumace i sha marami u nan la ka ikyo i wan ga kpa ka ihyembeato. Bibilo i kaa ér “mhen u ishima i or ka u bo, hii sha iyev mbu nan je.” (Genese 8:21) Sha nahan yô, ityesen i ikyo i wan ka kwagh u se hen shighe u se lu iyev la tseegh ga kpa ka kwagh u ken uma wase cii. U eren nahan la ve a injar i vesen.

Umbur wer, er apostoli Paulu yange nger nahan, tindi u u ungwan imo i mbamaren la ngu a ityendezwa igbenda ihiar, ér “ka nahan man á kpe u iyol man ú tsa sha won ye.” (Ka se se nger i yier ye.) I tese ér ityendezwa ne ka i mimi ken Anzaakaa 3:1, 2. I kaa her ér: “Wan wam, ityesen yam i̱ de hungur we ga, ishima you i̱ waan atindi am iko, gadia vea seer we ayange á ngee, man anyom a uma kua bem kpaa.” Injar i vesen i i lu sha ci u mba ve we ikyo yô ka ikyaryan i or vea Yehova hegen man uma u tsôron ken tar u he u bem la.—Mpase 21:3, 4.

[Picture on page 31]

Ikyo i wan i̱ ve or a mlu u saan saan ken tsombor man hen ijiir tom man vea Yehova kpaa