Bibilo I Henen—Ngi Sha Ci Wou Wee?

“PRISTI nana lu ga yô, i̱ de er i̱ ga.” I nger icintan ne ken mhii u Bibilo mbagenev mba Mbakatoliko. Kay Murdy u a lu ken Catholic Bible Institute ken Los Angeles la kaa wener, “Se Mbakatoliko yô, se fa hoghor a Bibilo ga, kpa kwagh ne ngu geman.” Shi a seer wener, Mbakatoliko ka vea va faan er Icighanruamabera ia fatyô u benden a uma ve je yô, maa “ijen man imura i ôron Bibilo i hii u kôron ve.”

Sha kwagh u mgem ne yô, magazin u i yer ér U.S. Catholic la kimbir kwagh u or u nengen sha kwaghhenen u ukwaghaôndo yange ôr yô, ér Mbakatoliko yange vea nyôr klase u henen Bibilo yô, i lu ve e̱r “í nyume ve Mbakatoliko kwagh nahan, shi ve kav ér kwagh u injaa ngu ken Bibilo kpishi je. Ve soo u panden zuan a kwagh u injaa u ve hen ér yange lu karen ve la.”

Er i lu cii kpa, ka “kwagh u injaa” u nyi or u henen Bibilo nana zua a mini? Nenge ase yôô: Ú soo u fan er ú nôngo a ishimanyian i uma a ve a mi ayange ayange la kpa? Ú za hemen u zuan a bem hen tsombor nena? Er nan icihi man inja i dang i dumbur yum nahana? Kanyi i ne ve ipila i̱ ngee hen atô u agumaior yum nahana? A fatyô u zuan a mbamlumun mba kuman sha mbampin mban kua mbagenev mba ve tsoghor kpishi mbara ken Bibilo, Mkaanem ma Aôndo, man mbamlumun mban vea lu “kwagh u injaa” kpen kpen, a lu hen Mbakatoliko shin Mbaprotestanti tseegh ga, kpa a kua Mbabuddha man Mbahindu man Mbamusulumi man Mbashinto, kua mba ve nyiman ér Aôndo ngu ga man mba ve ton ér una lu kpa or fa ga mbara kpaa. Er orpasalmi yange ôr nahan, ‘mkaanem ma Aôndo yange ma lu imenger i angahar a na, man iwanger i gbenda na kpaa.’ We kpa ma a fatyô u lun nahan hen a we.—Pasalmi 119:105.