Bem U Kristu Una Fatyô U Lun Orhemen Ken Asema A Ase Nena?

“Bem u Kristu a̱ lu orhemen ken asema a en gadia ka sha ci u kwagh ne man i yila ne ken iyol i môm ye.”—MBAKOLOSE 3:15.

1, 2. Ka sha nyi gbenda “bem u Kristu” a hemen ishima i Orkristu?

 HEMEN ka ishemberti i i vihi ior kpishi ishima yô, sha ci u ka i na or nan hen kwagh u mkighir man u numben sha iyol i or. Sha nahan yô, alaghga mbagenev vea nenge kwaghwan u Paulu yange wa mba ve lu Mbakristu a na imôngo ken Kolose wener, “Bem u Kristu a̱ lu orhemen ken asema a en” la inja er ka u injaa ga nahan. (Mbakolose 3:15) Se mba mbà lun a ian gbar gbar i eren kwagh sha asema ase gaa? A er nan ve se na ma kwagh shin ma or ian i hemen asema asa?

² Paulu yange lu kaan a Mbakolose ér ve̱ gema ian ve i eren kwagh sha asema a ve la ve̱ ta kera ga. Ishemberti i ken zwa Grika i̱ í gem ér ‘hemen’ ken Mbakolose 3:15 la i zua sha ishember i orhemen anumbe u yange nan naan ior iyua i gesa u ayemegh u sha ayange ve la la. Mbagban gesa mbara yange ve pande ve lu a ian gbar gbar kpa ve lu sha ikyev i atindi a anumbe la, kpa a̱ been cii yô, orhemen anumbe la a tese or u nan dondo atindi a anumbe la ve nan hembe la. Kape se kpa i lu je la, se mba a ian i tsuan u eren akaa kpishi a se soo ken uma wase la, kpa se nguren tsuan á yô, bem u Kristu a̱ zeren lun “orhemen anumbe” wase—shin, orgeman takerada Edgar J. Goodspeed una kera kaa ga yô, “iniezwa i hemen la” i̱ lu ken asema ase.

3. “Bem u Kristu” kanyi?

³ “Bem u Kristu” kanyi? Ka mkunduyol shin myôhôryol u shin ishima, u ka se zua a mi zum u se hingir mbahenen mba Yesu shi se fe ser se doo Yehova Aôndo man Wan na ishima shi ve lumun a vese la. Zum u yange shi kpuaa u Yesu una undu mbahenen nav yô, a kaa a ve ér: “M ngu nan ne bem Wam. . . . Asema a̱ de kera te ne kwe ga, man shi de kera cie nen kpaa ga.” (Yohane 14:27) Mba i shigh ve mkurem mba jighjigh mba ve lu iyol i Kristu la ve zua a bem la tsa hegen zurum er anyom 2,000 nahan, man ainge ne akar a ve, “iyôngo igen” la, kpa mba a ci ker. (Yohane 10:16) Bem la a̱ lu kwagh u hemen ken uuma asev. Zum u se lu yan ican tsung yô, una fatyô u wasen se sha er mciem maa kera hemba se tahav ga, shin ishima ia nyian se a za gande ikyaa inya ga yô. De se nenge er kwagh ne una lu nahan zum u i nzughul a vese sha ishô yase, man zum u ishimanyian i kase se cii man zum u i lu se inja er se kuma kwagh ga yô.

Zum u I Nzughul a Vese sha Ishô Yase La

4. (a) Yange Yesu kav kwagh u mnzughul u nzughul a or la nena? (b) I er a Mbakristu dang kpa ve gema ve er nena?

⁴ Tor Solomon lu kaa ér: “Or ka nana lu a tahav sha orgen yô, nan eren nan ican.” (Orpasenkwagh 8:9) Yesu yange fa mimi u mkaanem mara. Zum u yange lu sha la, yange nenge a mnzughul u uumace lu nzughul a mbagenev sha ishô ve tsung la. Va lun shin tar yô, un iyol na kpa i nzughul a na sha gbenda u hemban cii, je yô, shin er lu or u eren isholibo ga nahan kpaa, i wa un kwagh iyol ér ngu or u ityuhwan shi i wua un e̱r ka ormbaiv nahan. (Mateu  26:63-66; Marku 15:27) Ainge ne kpa mnzughul u nzughul a ior a ishô ve iyol la dumbur, man Mbakristu mba mimi ya atsan gande ve iyol inya, ‘akuraior cii kôr ve ihom.’ (Mateu 24:9) Nahan kpa, shin er yange ve ya atsan a cier iyol ken afo a kuugh a Nazi man Afo a Ican a ken Soviet la, shi shin er ikpelaior ta sha ave tuse tu tuse shi i wa ve akaa iyol shi i er mbaaie sha ave nahan kpaa, bem u Kristu la na ve u tilen dông. Ve kav Yesu, un u i nger kwagh na nahan la, ér: “Zum u i laha Un kpaa mayange A or iyev sha mlaha la ga, er A ya ican kpaa A ta hwa ga, kpa A gema A wa sha ikev i Un u A er ijiir sha mimi la.”—1 Peteru 2:23.

5. Zum u se ongo i ôr kwagh inja er i nzughul a or ken tiônnongo yô, kanyi kwagh se hii gbidyen kwar sha mini?

⁵ Alaghga a lu zegekwagh keng ga, kpa a lu se inja er i er a or ken tiônnongo u Kristu sha inja ga nahan. Aluer kwagh ngu nahan yô, a lu se inja er yange lu Paulu nahan, un u yange kaa nahan la ér: “Ka an nan nenge gbev man i vihim ga?” (2 Mbakorinte 11:29) Se er nena? Doo u se pine ayol a ase ser, ‘Sha mimi yô, ka mnzughul i nzughul a or shon yee?’ Ashighe kpishi ka se fa kwagh la i kuma se ga. Alaghga ishima ia kpen vihin se zum u or u nan senge ér nan fa ma kwaghmyer shon vindi vindi la nan va er se kwagh shon yô. Ka sha ityôkyaa i dedoo man i hii ve Bibilo i kaa nahan ye, ér: “Orlanenkwagh ka nan gba nan jighjigh sha hanma kwaghôron tsô.” (Anzaakaa 14:15) Nahan a gba u se er teghelee.

6. Aluer se nenge ser i nzughul a vese ken tiônnongo sha ishô yase yô, kanyi i gbe u se ere?

⁶ Kpa aluer ka se ayol a ase man i lu se inja er i nzughul a vese di ye? Or u nan lu a bem u Kristu ken ishima i nan yô, nana er nena? A lu se pe lamen a or u se hen ser nan hii se iyongo la. A been heela kera yô, u̱ ma ú gbe ôron hanma or u nan kegh ato cii kwagh shon yô, hii nan ú kera ze a kwagh la hen Yehova ken msen, ú suur sha a na wer a̱ ôr ijir sha mimi ga? (Pasalmi 9:10; Anzaakaa 3:5) Alaghga je yô, se eren nahan se been kera yô, á kuma se u kuren kwagh la ken ishima yase nahan se ‘lu ving.’ (Pasalmi 4:4) Ashighe kpishi a gba u eren tom a kwaghwan u Paulu wa nahan la, ér: “Waan nen ishima a ayol a en, deen nen ayol a en kwaghbo aluer kwagh á nzughul orgen a orgen yô, er Ter A de ne akaabo nahan, ne kpaa kape eren nen la.”—Mbakolose 3:13.

7. Kanyi kwagh se zeren umbur hanma shighe cii ken mlu wase a anmgbianev asev laa?

⁷ Nyityô kwagh i se er cii kpa, kwagh u i gbe u se umbur yô, e̱r i lu u se fatyô u kôôm kwagh u a er i kar la ga nahan kpaa, se fatyô u kôôm ieren i í kenden se ken ishima u eren la. Aluer se nenge ser í nzughul a vese sha ishô yase maa se er kwagh gaagh yô, alaghga ieren la ia vihi bem wase a hemba mnzughul u i nzughul a vese la je kpaa. (Anzaakaa 18:14) Alaghga je yô, se nôngo gbeev se de u zuan imôngo a tiônnongo ser saa ijirôron i mimi ia kar van. Orpasalmi yange nger wener mba atindiakaa a Yehova a doo ve ishima yô “ma kwagh u nan ve gbev mbu nôngon kera ngu ga.” (Pasalmi 119:165) Kwagh u a lu jighilii yô, hanmaor cii ashighe agen ka i nzughul a nan sha ishô i nan. Mayange de deen wer ma kwagh u vihin môm a̱ tagher we mcivir u ú civir Yehova la ga. Kpa guda yô, de bem u Kristu a̱ lu orhemen ken ishima you.

 Zum u Ishimanyian I̱ Te sha Avese Yô

8. Ka akaa a nyi nahan a ne ishimanyiana, man ishimanyian ia fatyô u van a nyi?

⁸ Ishimanyian ka kwagh u a lu ken uma wase kpôô kpôô ken “ayange a masejime” ne yô. (2 Timoteu 3:1) Sha mimi yô, Yesu yange kaa wener: “Asema a̱ de nyian ne sha ci u uma wen sha kwagh u né ya shin sha ci u iyol yen sha kwagh u né zer la ga.” (Luka 12:22) Kpa ka asema a nyian cii a lu a sha ci u akaa a iyolough ga. Yange Loti “ya ican ken ishima tsung” sha ci u dang u Sodom lu eren la. (2 Peteru 2:7) Yange “ishima i nyian i sha iniongo i Kristu cii” ta sha Paulu. (2 Mbakorinte 11:28) Yesu yange ya ican hen tugh mbu lu u kper a wua un la je yô, “iusa Na gema hingir er ka aberawambe nahan, gba nôndon inya.” (Luka 22:44) Nahan wanger wang e̱r i lu asema a nyian cii a lu ikyav i jighjigh u nan u or vôron ga yô. A̱ lu nyi i nyi je i̱ ne ishimanyian la kpaa, aluer i za hemen gbem yô, ia yange se bem. Ishimanyian gande ior mbagenev iyol inya je yô, i̱ na ve hen ér ve kera kuma u zan hemen a ityom i i lu ken mcivir u civir Yehova ne ga. Bibilo kaa ér: “Ishima i nyian ka i na or nan ure, kpa kwaghôron u saan saan ka a na nan iember.” (Anzaakaa 12:25) Aluer ishimanyian tser se yô, se er nena?

9. Ka akaa a wasen agen a nyi nahan or a fatyô u eren sha u panden ishimanyiana, kpa ka akaa a van a ishimanyian a nyi nahan a fatyô u been a a ga?

⁹ Sha ashighe agenegh yô, se fatyô u eren akaa a aa wase yô. Aluer ka mshiyol a ne ishimanyian la yô, a doo u eren kwagh shami, kpa ambaakaa la ka a or a tsua u eren nan ikyangegh yô. * (Mateu 9:12) Aluer ityom yuhwa se ikyav yô, se fatyô u panden i nan mbagenev. (Ekesodu 18:13-23) Kpa mbagenev—er mbamaren nahan—mba ve lu a ityom i vea fatyô u geman i nan mbagenev ga la di ye? Orkristu u nan vese kwase shin nom, man nan lu hendan a nan la di ye? Tsombor u ican i̱ gbe ú tsung shin ú lu hen ijiir i í nôngon ityav la di ye? Sha mimi yô, se fatyô u been a akaa a a ve a ishimanyian la kera cii shin tar ungun ga. Nahan kpa, se fatyô u kuran bem u Kristu ken asema ase. Sha nena yô?

10. Ka igbenda ihiar i nyi nahan Orkristu nana fatyô u keren gbenda u heghem ishimanyian i nana?

 ¹⁰ Gbenda môm yô ka u keren ishimasurun ken Mkaanem ma Aôndo. Tor Davidi yange nger ér: “Zum u mbamhen ve ngeem ken ishima yô, mbamsurshima Ou nam ishima i saan saan.” (Pasalmi 94:19) A fatyô u zuan a “mbamsurshima” mba Yehova ken Bibilo. U zeren ôron Takerada u í ne i nger la una wase u̱ kuran bem u Kristu la ken asema ase. Bibilo kaa ér: “Haa akaa a zan we iyol cii sha TER, tsô Una taver we; Una rumun er i̱ tenger a mbaperapera mayange ga.” (Pasalmi 55:22) Kape shi Paulu kpa a nger je la, wener: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun, man bem u Aôndo u a gande hanma mfe wase cii una kura asema a en man mbamhen enev ken Kristu Yesu ye.” (Mbafilipi 4:6, 7) U eren msen a ishima i môm sha hanma shighe la una wase se u kuran bem wase.

11. (a) Yesu yange tese ikyav i dedoo sha kwagh u msen u eren nena? (b) Gba u se nenge msen u eren nena?

¹¹ Yesu yange lu ikyav i dedoo sha gbaa ne. Sha shighe ugen la, a lam a Ter na u sha la ken msen shí kuma ahwa imôngo je. (Mateu 14:23; Luka 6:12) Msen yange wase un u wan ishima a atsan a hemban vihin cii. Hen tugh nav mbu masetyô la, ican na seer ngee gande. Lu nyi yange gema ere? A “seer” eren msen “ishima i môm.” (Luka 22:44) Een, Wan u Aôndo u yange yina ga la, lu or u eren msen. Man hire mbadondon un mba ve yen mban ve vea kera zaan hemen u lun a inja i eren msen la ga yee! Yesu yange tese mbahenen nav “u eren msen zumbee, gban uwer ga.” (Luka 18:1) Msen ka kwagh kpôô kpôô shi ka kwaghôron u hange hange u ôron vea Un u a hembe fan mlu wase a vese ayol a ase la. (Pasalmi 103:14) Aluer ka u se kura bem u Kristu la ken asema a ase yô, se “eren nen msen gbem.”—1 Mbatesalonika 5:17.

U Hemban Mbamyina Asev

12. Ka atôakyaa a nyi nahan aa na mbagenev vea hen ér tom ve kera kuma ga?

¹² Yehova nenge hanma or u nan civir un cii ér nan ngu un kwagh u injaa, nan gba un kwagh. (Hagai 2:7) Nahan kpa, ior kpishi ican ka i er ve u nan kwagh ne jighjigh. Alaghga uwer a gba mbagenev sha ci u iyolbeen, man mseer u tom u hen tsombor u seer la shin mvihiyol u a gbe a gba kera yô. Alaghga shawon a due mbagenev ishima sha ci u akaa a yange nzughur a ve zum u ve lu iyev la. Shi alaghga ishima ia lu eren mbagenev ican sha ci u mbamtsum mba yange ve tsume tsuaa la, vea gba henen ér shin Yehova una de ve a asorabo je o. (Pasalmi 51:3) Kanyi kwagh i gbe u a er sha imba mlu nee?

13. Ka msurshima u nyi a lu ken Ruamabera sha ci u mba i lu ve inja er ve gba kwagh ga laa?

¹³ Bem u Kristu la una na se lu a vangertiôr ser se doo Yehova ishima. Se fatyô u hiden a bem la ken asema a ase her sha u gbidyen kwar fan ser mayange Yesu kaa ér mba fe mluainja wase ka lu sha u tôôn kwagh u se eren la karen sha u mbagenev la ga. (Mateu 25:14, 15; Marku 12:41-44) Kwagh u yange ôr var var yô, lu mtil u tilen sha mimi la. Yange kaa a mbahenen nav ér: “Or u nana taver ishima zan zan mkur yô, ka nan á yima nan ye.” (Mateu 24:13) Yesu iyol na kpa yange ior “laha Un,” nahan cii kpa yange hen a hen ér shin un doo Ter na ishima kpaa o, ga. (Yesaia 53:3; Yohane 10:17) Shi yange kaa a mbahenen nav ér ve kpa kwagh ve doo un ishima. (Yohane 14:21) Yange Yesu ôr kwagh ne var var kaa ér: “Mba teen mbaatsator uhar sha toro gaa? Nahan kpaa mô ve môm tsô kpaa una gba gban shin inya ga saa Ter wen Una fa. Zan zan ice yen i sha ityou kpaa, i ôr i cii. Nahan yô, de cie nen ga; mbaatsator kpishi kpaa ne hemba ve.” (Mateu 10:29-31) Nenge imba ishima i í sur se ér se doo Yehova ishima ne sha wono!

14. Ka ishimataver i nyi í ne se ér kwagh wase gba Yehova ishima asange asange?

¹⁴ Shi Yesu yange kaa ér: “Ma or nana fatyô u gban van her a mo ga, saa Ter u A tindim la, Una urugh nan.” (Yohane 6:44) Er Yehova a urugh se ér se̱ dondo Yesu di tsô yô, A soo ér se̱ war kpee. Yesu yange kaa a mbahenen nav ér: “Kape i lu ishima i Ter wen u A lu Sha la, u mbakiriki mban, mô ve nana̱ saa ga la.” (Mateu 18:14) Sha nahan yô, aluer ú ngu shiren tom a ishima you i môm yô, ú fatyô u ember ken ityom you i  dedoo la. (Mbagalatia 6:4) Aluer mbamtsum ou mba ve kar la mba hiden nan we ican yô, fa dedoo wer Yehova una ‘de’ mba ve gem ishima sha mimi mbara a “kwaghbo wuee.” (Yesaia 43:25; 55:7) Aluer ka ma ityôkyaa igen i ne ve uwer u lu gban we yô, umbur wer “TER ngu ikua a mba asema a vihin ve la, yem mba ve lu a ishima i zamber yô.”—Pasalmi 34:18.

15. (a) Satan nôngon wener una yange se bem nena? (b) Ka vangertiôr u nyi se fatyô u lun a mi sha Yehova?

¹⁵ Satan una ker ma kwagh u doon môm sha a we ga saa u yangen ér u̱ de zough a bem ga tseegh. Ka un a lu icôr-or u yange hii duen a isholibo i se ye dyako u i̱, i̱ se cii se nôngon a mi ne ye. (Mbaromanu 7:21-24) Una soo ér u̱ hen wer myen u ú yen la na yô, Aôndo una kera ngohol mcivir wou la ga. Mayange de deen Diabolo a̱ naan we uwer gban ga! Fa ayom a na dedoo, nahan de mfe la a̱ na ú tahav mbu taver ishima. (2 Mbakorinte 2:11; Mbaefese 6:11-13) Umbur wer “Aôndo hemba ishima yase man A fa akaa cii kpaa.” (1 Yohane 3:20) Yehova nengen ka hembe mlu u i lun se shin ishima la. Shi nengen kwagh u se soo u eren la kpaa. Yô, zua a ishimasurun ken mkaanem ma orpasalmi ma a kaa nahan la, ér: “Gadia TER Una ta ior Nav kera ga, man Una undu dyako Na kpaa ga.”—Pasalmi 94:14.

U Zuan Imôngo ken Bem u Kristu La

16. Ka sha nyi gbenda se nôngon a ishima i wan se tswen ga?

¹⁶ Paulu yange nger wener se̱ na bem u Kristu ian a̱ lu orhemen ken asema a ase sha ci u yange i ‘yila se ken iyol i môm.’ Yange i yila Mbakristu mba i shigh ve mkurem mba yange Paulu nger kwagh tindi ve a mi la ér ve̱ lu alegh a iyol i Kristu, di vough er asande a mba i shigh ve mkurem mba ainge mban nahan. “Iyôngo igen” i i lu ahuraior a ve la zua vea ve kwagh môm hingir “ikum i môm” sha ikyev i “orkuran môm kpaa,” ka Yesu Kristu je la. (Yohane 10:16) “Ikum” i kuman umiliôn imôngo kohol tar sha won cii mba nan bem u Kristu ian ér a̱ lu orhemen ken asema a ve. U fan ser se mba tswen ga la ka zege iwasen u a wasen se u wan ishima yô. Peteru nger wener: “Hendan nen a [Satan], tile nen dông sha jighjigh u nan gadia ne fa anmgbianev enev sha won cii kpaa i ver ve ican shon i môm i môm i ne lu yan i ne vough.”—1 Peteru 5:9.

17. Kanyi kwagh ia mgbegha se u nan sha u bem u Kristu a̱ lu orhemen ken asema asa?

¹⁷ Yô, se cii, se za nen hemen u lun ken bem, ityamegh ki injaagh ki icighan jijingi u Aôndo la. (Mbagalatia 5:22, 23) Ior mba Yehova una va kohol ve vea lu wang a acôghor iyol ga shi vea lu ken bem la yô, a va ver ve doo doo, a na ve uma u tsôron ken paradiso shin tar, hen ape perapera una tema ker la. (2 Peteru 3:13, 14) Se mba a hanma ityôkyaa i nan bem u Kristu ian sha u a̱ lu orhemen ken asema ase yô.

[Footnote]

Baver We Kpa?

• Bem u Kristu kanyi?

• Zum u i nzughur a vese sha ishô yase yô, bem u Kristu una fatyô u lun orhemen ken asema ase nena?

• Bem u Kristu una fatyô u wasen se u wan ishima a ishimanyian nena?

• Zum u i lu se inja er se kuma ga yô, bem u Kristu una fatyô u surun se ishima nena?

[Study Questions]

[Picture on page 27]

Yange Yesu wa iyol na sha ikyev i Yehova sha ishigh ki mba ve wa un kwagh iyol la

[Picture on page 28]

Ishimasurun i Yehova ia fatyô u nan se myôhôryol sha ikyev i ishimanyian yase, di er mkuve u ter u doon ishima nahan

[Picture on page 30]

Ishimawan gba kwagh sha ishigh ki Aôndo kpen kpen